බන්ධනාගාර ගැටුම් සැලැස්මකට අනුව සිදුවෙන බව පේනවා.. ගැටුම් පසුපස සංවිධානාත්මක කුමන්ත්‍රණයක්..- ඇමති ආනන්ද විජේපාල

Aug 7, 2026 at 03:13 PM

|

Lanka Leader

දිවයිනේ බන්ධනාගාර කිහිපයක එකවර හටගෙන ඇති නොසන්සුන්කාරී තත්ත්වයන් යම් සැලසුම්සහගත කඩාකප්පල්කාරී ක්‍රියාවක හෝ කුමන්ත්‍රණයක ප්‍රතිඵලයක් විය හැකි බවට සැක පළ වන බව මහජන ආරක්ෂක අමාත්‍ය ආනන්ද විජේපාල මහතා අද (07) පාර්ලිමේන්තුවේදී පැවසීය.

විපක්ෂ නායකවරයා යොමු කළ ප්‍රශ්නයකට පිළිතුරු දෙමින් අමාත්‍යවරයා සඳහන් කළේ මත්ද්‍රව්‍ය හා පාතාල ක්‍රියාකාරකම් මර්දනය කිරීමට රජය ගෙන ඇති දැඩි ක්‍රියාමාර්ග මෙම සිදුවීම්වලට ආසන්නතම හේතුව වී ඇති බවයි.

මැගසින් බන්ධනාගාරයේ ඊයේ රාත්‍රී 10.15 ට පමණ රැඳවියන් 40 කගේ පමණ පිරිසක් වාට්ටුවක දොරක් කඩාගෙන විත් කලහකාරී ලෙස හැසිරී ඇත. බන්ධනාගාර නිලධාරීන් සහ පොලිස් විශේෂ කාර්ය බලකාය (STF) එක්ව තත්ත්වය පාලනය කර ඇති අතර, එහිදී එක් රැඳවියෙකු මියගොස් 10 දෙනෙකු තුවාල ලබා කොළඹ ජාතික රෝහලට ඇතුළත් කර තිබේ.

කුරුවිට බන්ධනාගාරයේ අද උදෑසන 6.30 ට පමණ ඇති වූ ගැටුමකින් රැඳවියන් දෙදෙනෙකු මියගොස් 13 දෙනෙකු තුවාල ලබා රත්නපුර රෝහලේ ප්‍රතිකාර ලබයි.

පල්ලන්සේන බන්ධනාගාරයේ රැඳවියන් 30 දෙනෙකු පමණ වහළ මත නැග විරෝධතාවක නිරත වන අතර, පොලිසිය සහ බන්ධනාගාර නිලධාරීන් එක්ව එම තත්ත්වය පාලනය කිරීමට මේ වන විටත් පියවර ගනිමින් සිටී.

මීට අමතරව මීගමුව සහ මහර බන්ධනාගාරවලද නොසන්සුන්කාරී තත්ත්වයන් වාර්තා වී ඇති නමුත්, අනෙකුත් සියලුම බන්ධනාගාරවල තත්ත්වය මේ වන විට පාලනය කර ඇති බව අමාත්‍යවරයා තහවුරු කළේය.

මෙම සිදුවීම් මාලාව සම්බන්ධයෙන් පූර්ණ විමර්ශනයක් පවත්වා වාර්තාවක් ලබා ගැනීමට පියවර ගන්නා බවත්, රැඳවියන්ගේ මෙන්ම නිලධාරීන්ගේ ද ආරක්ෂාව තහවුරු කරමින් බන්ධනාගාර තුළ විනය පවත්වාගෙන යාමට රජය කැපවී සිටින බවත් අමාත්‍යවරයා වැඩිදුරටත් අවධාරණය කළේය.