ලලිත් සහ කුගන් අතුරුදන්වීමේ නඩුව: ගෝඨාභය රාජපක්ෂට සැප්තැම්බර් 29 වැනිදා සාක්ෂි ලබාදෙන ලෙස නියෝග..

Aug 7, 2026 at 01:54 PM

|

Lanka Leader

යාපනයේ දී අතුරුදන් වූ ලලිත්කුමාර් වීරරාජ් සහ කුගන් මුරුගානන්දන් සම්බන්ධ නඩුවේ සාක්ෂි ලබාදීම සඳහා හිටපු ආරක්ෂක ලේකම් සහ හිටපු ජනාධිපති ගෝඨාභය රාජපක්ෂ මහතා ලබන සැප්තැම්බර් 29 වැනිදා කොළඹ මහේස්ත්‍රාත් අධිකරණයේ පෙනී සිටින ලෙස යාපනය මහේස්ත්‍රාත් අධිකරණය නියෝග කර තිබේ.

2011 වසරේ දෙසැම්බර් 10 වැනිදා, ජාත්‍යන්තර මානව හිමිකම් දිනයට සමගාමීව යාපනය නගරයේ පැවැත්වීමට සැලසුම් කර තිබූ අතුරුදන්වූවන්ගේ ඥාතීන්ගේ විරෝධතාවයක් සංවිධානය කරමින් සිටි ලලිත්කුමාර් වීරරාජ් සහ කුගන් මුරුගානන්දන් යන දෙදෙනා ආවරංගල් ප්‍රදේශයේදී අතුරුදන් වූ බව සඳහන්.

ඒ අනුව, ඔවුන්ගේ ඥාතීන් විසින් 2012 වසරේ කොළඹ අභියාචනාධිකරණයට හේබියස් කෝපස් පෙත්සමක් ගොනු කර තිබූ අතර, එම සිද්ධියට අදාළ සාක්ෂිකරුවන් විභාග කර වාර්තාවක් ඉදිරිපත් කරන ලෙස අභියාචනාධිකරණය යාපනය මහේස්ත්‍රාත් අධිකරණයට නියෝග කර තිබුණි.

ඒ අනුව නඩු විභාගය 2012 සැප්තැම්බර් 19 වැනිදා යාපනය මහේස්ත්‍රාත් අධිකරණයේදී ආරම්භ කෙරිණි.

2017 වසරේදී මෙම නඩුවේ සාක්ෂිකරුවන්ගේ ලැයිස්තුවට හිටපු ආරක්ෂක ලේකම් ගෝඨාභය රාජපක්ෂගේ නමද ඇතුළත් කෙරුණු අතර, ඔහු අධිකරණයේ පෙනී සිට සාක්ෂි ලබාදෙන ලෙස නියෝග නිකුත් කෙරුණි.

ආරක්ෂක හේතූන් මත යාපනයට පැමිණිය නොහැකි බව ගෝඨාභය රාජපක්ෂ අධිකරණයට දැනුම් දී තිබූ අතර, පසුව නීතිඥවරුන් මාර්ගයෙන් මාර්ගගත ක්‍රමය ඔස්සේ සාක්ෂි ලබාදීමට අවසර ඉල්ලා සිටියේය.

එම ඉල්ලීම පිළිගත් අධිකරණය, සුදුසු දිනයක අදාළ මහේස්ත්‍රාත් අධිකරණයකට පෞද්ගලිකව පෙනී සිට එම ස්ථානයේ සිට මාර්ගගත ක්‍රමය ඔස්සේ සාක්ෂි ලබාදෙන ලෙස නියෝග කර කළේය.

අද යාපනය මහේස්ත්‍රාත් අධිකරණයේදී නඩුව යළි කැඳවූ අවස්ථාවේදී, ගෝඨාභය රාජපක්ෂ මහතා සැප්තැම්බර් 29 වැනිදා කොළඹ මහේස්ත්‍රාත් අධිකරණයේ පෙනී සිට මාර්ගගත ක්‍රමය ඔස්සේ යාපනය මහේස්ත්‍රාත් අධිකරණයට සාක්ෂි ලබාදෙන ලෙස අධිකරණය නියෝග කෙරිණි.