වත්කම් සහ බැරකම් හෙළිදරව්ව අහෝසි කරන සංශෝධන වහා ඉල්ලා අස්කර ගන්න.. - Transparency International රජයෙන් ඉල්ලයි

Aug 6, 2026 at 05:58 PM

|

Lanka Leader

වත්කම් සහ බැරකම් ප්‍රකාශන වෙත මහජනයාට ඇති ප්‍රවේශය දුර්වල කෙරෙන යෝජිත දූෂණ විරෝධී පනත් සංශෝධන වහාම ඉල්ලා අස්කර ගන්නා ලෙස ට්‍රාන්ස්පේරන්සි ඉන්ටනැෂනල් ශ්‍රී ලංකා (TISL) ආයතනය රජයෙන් දැඩි ලෙස ඉල්ලා සිටියි. 

2023 අංක 9 දරන දූෂණ විරෝධී පනත හරහා ලබාගත් විනිවිදභාවය සහ වගවීම පිළිබඳ ජයග්‍රහණ, ජූලි 24 වන දින ගැසට් කරන ලද මෙම නව පනත් කෙටුම්පත මගින් ආපසු හැරවීමට ලක්කර ඇති බව එම ආයතනය පෙන්වා දෙයි.

මෙම යෝජිත සංශෝධන මගින් සිදුවන බරපතලම හානිය වන්නේ නීත්‍යනුකූලව මහජනතාව වෙත විවෘත කර ඇති තොරතුරු මහජනයා හෝ මාධ්‍යවේදීන් විසින් භාවිත කිරීම අපරාධයක් බවට පත්කිරීමයි. 

යම් තොරතුරක් භාවිත කිරීම නිශ්චිතව දක්වා ඇති ආයතනයකට හෝ නිලධාරියෙකුට ඉදිරිපත් කිරීමට පමණක් සීමා කිරීම මගින්, ආණ්ඩුක්‍රම ව්‍යවස්ථාවෙන් තහවුරු කර ඇති තොරතුරු දැනගැනීමේ අයිතිය සහ ප්‍රකාශනයේ නිදහස දැඩි ලෙස උල්ලංඝනය වන බව TISL ආයතනය අවධාරණය කරයි. එමෙන්ම, පැහැදිලි නිර්ණායකවලින් තොරව පෞද්ගලිකත්වයට හානි වන බව සලකන ඕනෑම තොරතුරක් වසන් කිරීමට අල්ලස් හෝ දූෂණ චෝදනා විමර්ශන කොමිෂන් සභාවට පුළුල් බලතල පැවරීම නිසා අර්ථවත් මහජන අධීක්ෂණයක් සිදුවීමේ අවකාශය අහෝසි වී යයි.

තවද, වත්කම් ප්‍රකාශකයා සමඟ අවම වශයෙන් මාස හයක්වත් එකට ජීවත් වූ තැනැත්තන්ගේ වත්කම් සහ බැරකම් හෙළිදරව් කිරීමේ අවශ්‍යතාව ඉවත් කිරීම මගින් නීතිවිරෝධී ලෙස උපයාගත් වත්කම් සහකරුවන්ගේ හෝ වෙනත් අයගේ නමට පවරා සැඟවීමට පැහැදිලි මාර්ගයක් විවර වේ. දූෂණය පිටුදැකීමේ සහ පාරදෘශ්‍යභාවය ශක්තිමත් කිරීමේ මහජන වරමකින් බලයට පත් වූ රජයක් මෙවැනි සංශෝධන ගෙන ඒම කනගාටුදායකය. 

තොරතුරු අවභාවිතය වැළැක්වීමට දැනටමත් අපහාස නීති පවතින බැවින්, ප්‍රසිද්ධියට පත් කර ඇති තොරතුරු භාවිතය මත මෙවැනි සීමා පැනවීමට කිසිදු සාධාරණීකරණයක් නොමැති අතර, අදාළ සංශෝධන වහා හකුලාගෙන මහජනතාවට හිමි අධීක්ෂණ අයිතිය ආරක්ෂා කරන ලෙස TISL ආයතනය රජයෙන් සහ පාර්ලිමේන්තුවෙන් වැඩිදුරටත් ඉල්ලා සිටී.