ආසියානු සංවර්ධන බැංකුව ලංකාවට ඩොලර් මිලියන 200ක ණයක් දෙයි..

Jul 31, 2026 at 12:45 PM

|

Lanka Leader

මැදපෙරදිග පවතින ගැටුම් හේතුවෙන් ඇතිවිය හැකි ආර්ථික බලපෑම් අවම කිරීම සඳහා ශ්‍රී ලංකාවට අමෙරිකානු ඩොලර් මිලියන 200ක ප්‍රතිපත්තිමය ණය ආධාරයක් ලබාදීමට ආසියානු සංවර්ධන බැංකුව (ADB) තීරණය කර තිබේ.

මෙම මුදල ශ්‍රී ලංකාව සඳහා ක්‍රියාත්මක කෙරෙන වෙළෙඳාම, ආයෝජන සහ කර්මාන්ත සංවර්ධන වැඩසටහන යටතේ ලබාදෙන අතර, ඉන් අමෙරිකානු ඩොලර් මිලියන 100ක් මැදපෙරදිග ගැටුම් හේතුවෙන් එල්ල වී ඇති ආර්ථික පීඩනයට මුහුණදීමට අතිරේක මූල්‍ය සහාය ලෙස වෙන් කර ඇති බව සඳහන්.

ආසියානු සංවර්ධන බැංකුව ඊයේ (30) නිවේදනය කර ඇත්තේ, ශ්‍රී ලංකාව සහ කාම්බෝජය සඳහා සමස්තයෙන් අමෙරිකානු ඩොලර් මිලියන 450ක මූල්‍ය පැකේජයක් ක්‍රියාත්මක කරන බවයි.

ADB සභාපති මසතෝ කන්ඩා (Masato Kanda) සඳහන් කර තිබෙන්නේ, කිලෝමීටර් දහස් ගණනක් ඈතින් පවතින ගැටුමක් හේතුවෙන් කිසිදු පවුලක් තවදුරටත් දරිද්‍රතාවයට ඇද නොවැටිය යුතු බවයි.

ශ්‍රී ලංකාව සඳහා වන වැඩසටහන යටතේ වෙළෙඳ පද්ධති නවීකරණය කිරීම, කුඩා හා මධ්‍ය පරිමාණ ව්‍යවසායන්ගේ තරගකාරීත්වය ඉහළ නැංවීම, ආර්ථික කලාප සඳහා ආයෝජන ආකර්ෂණය කර ගැනීම සහ පෞද්ගලික අංශය මූලික කරගත් ආර්ථික වර්ධනයට සහාය ලබාදීම අරමුණු කර තිබේ.

එමෙන්ම, අපනයන විවිධාංගීකරණය කිරීම, ව්‍යවසායන්ට කලාපීය හා ගෝලීය සැපයුම් දාමවලට සම්බන්ධ වීමට අවස්ථා පුළුල් කිරීම සහ නව රැකියා අවස්ථා බිහිකිරීම මගින් අනාගතයේදී ඇතිවිය හැකි බාහිර ආර්ථික කම්පනවලට ඔරොත්තු දීමේ හැකියාව ශක්තිමත් කිරීම ද මෙම වැඩසටහනේ අරමුණ බව ADB සඳහන් කර ඇති බවටයි වාර්තා වෙන්නේ.