මාලි රාජ්‍යයට හමුදා ආක්‍රමණයකට ට්‍රම්ප්ගේ සූදානමක්.. එම කලාපයේ සිටින රුසියානු හමුදා සමඟ සෘජු ගැටුම් ඇතිවීමේ අවදානමක්..

Jul 23, 2026 at 07:15 AM

|

Lanka Leader

බටහිර අප්‍රිකානු රාජ්‍යයක් වන මාලි හි සක්‍රීය අල්-කයිඩා සබඳතා සහිත JNIM (Jama’at Nusrat al-Islam wal-Muslimin) ත්‍රස්ත කණ්ඩායමට එරෙහිව සෘජු හමුදා ක්‍රියාමාර්ග ගැනීමට ජනාධිපති ඩොනල්ඩ් ට්‍රම්ප්ගේ පරිපාලනය දැඩි ලෙස සලකා බලමින් සිටින බව වාර්තා වේ. 

ගෝලීය ගැටුම්වලින් ඇමරිකාව මුදවා ගන්නා බවට මීට පෙර ප්‍රකාශ කළද, ට්‍රම්ප් පාලනාධිකාරිය මෙලෙස හමුදා මැදිහත්වීමකට සැරසීම විශේෂ විදේශ ප්‍රතිපත්ති වෙනසක් පෙන්නුම් කරයි. මෙම තීරණය ක්‍රියාත්මක වුවහොත්, ට්‍රම්ප් සිය දෙවන ධුර කාලය තුළ හමුදා ප්‍රහාර එල්ල කිරීමට තීරණය කළ අටවන රට බවට මාලි රාජ්‍යය පත්වනු ඇත.

කෙසේ වෙතත්, මෙම හමුදා ක්‍රියාමාර්ගය සම්බන්ධයෙන් ඇමරිකානු ඉහළ නිලධාරීන් අතර තවමත් මතභේද පවතී. ජාතික ආරක්ෂක මණ්ඩලයේ ත්‍රස්ත විරෝධී අංශයේ ජ්‍යෙෂ්ඨ අධ්‍යක්ෂ සෙබස්තියන් ගෝර්කා හමුදා බලය භාවිතා කිරීමට දැඩි ලෙස පෙනී සිටින අතර, JNIM සංවිධානය කලාපයේ වඩාත්ම සන්නද්ධ සහ බලවත් ත්‍රස්ත කණ්ඩායම ලෙස වර්ධනය වී තිබීම ඇමරිකාවේ දැඩි අවධානයට ලක්ව ඇත. 

මීට අමතරව, දැනට මාලි හි සිරකරගෙන සිටින බවට විශ්වාස කෙරෙන ඇමරිකානු මිෂනාරිවරයෙකු වන කෙවින් රයිඩවුට් (Kevin Rideout) මුදාගැනීමද මෙම උපායමාර්ගික පියවර පිටුපස ඇති තවත් ප්‍රධාන හේතුවකි.

මෙම තත්ත්වය තවත් සංකීර්ණ වන්නේ මාලි හි වත්මන් හමුදා පාලනය බටහිර සබඳතා අතහැර රුසියානු 'වැග්නර්' (Wagner) සහ 'ඇෆ්රිකා කෝප්ස්' වැනි හමුදා කණ්ඩායම්වල සහය ලබා ගැනීමට යොමු වී සිටීම හේතුවෙනි. ඇමරිකාව මාලි රාජ්‍යය තුළ සෘජු හමුදා ප්‍රහාර එල්ල කළහොත්, එම කලාපයේ සිටින රුසියානු හමුදා සමඟ සෘජු ගැටුම් ඇතිවීමේ දැඩි අවදානමක් පවතින බව විදේශ ප්‍රතිපත්ති විචාරකයෝ පෙන්වා දෙති.

එසේම, ඇමරිකානු ප්‍රහාර හමුවේ JNIM සංවිධානය දුර්වල වුවහොත්, එහි වාසිය ඔවුන්ගේ ප්‍රතිවාදී අයිසිස් (ISIS) ත්‍රස්ත කණ්ඩායමට හිමිවිය හැකි බවට බුද්ධි අංශ අනතුරු අඟවයි. 

එම නිසා, කලාපීය වශයෙන් අල්-කයිඩා ත්‍රස්තවාදය මර්දනය කිරීම අරමුණු කරගත්තද, මෙවැනි හමුදා මැදිහත්වීමක් රුසියාව සමඟ සෘජු ගැටුමකට මෙන්ම කලාපයේ අයිසිස් බලය වර්ධනය වීමටද මග පාදා දිය හැකි බව විශේෂඥයෝ වැඩිදුරටත් පෙන්වා දෙති.