මීගමුවේ ගැටුමෙන් මිය ගිය රැඳවියන්ට වන්දි ඉල්ලයි..

Jul 22, 2026 at 09:05 AM

|

Lanka Leader

මීගමුව බන්ධනාගාරය තුළ පසුගියදා ඇති වූ නොසන්සුන්කාරී තත්ත්වය හේතුවෙන් ජීවිතක්ෂයට පත් වූ රැඳවියන් 21 දෙනාගේ පවුල් සඳහා වහාම සාධාරණ වන්දි මුදලක් ලබා දීමට පියවර ගන්නා ලෙස සිරකරු අයිතිවාසිකම් සුරැකීමේ කමිටුව රජයෙන් ඉල්ලා සිටියි.

අධිකරණ අමාත්‍යවරයා වෙත ලිපියක් යොමු කරමින් එම කමිටුවේ සභාපති නීතිඥ සේනක පෙරේරා මහතා පෙන්වා දෙන්නේ, පසුගිය ජූලි 05 සහ 06 යන දිනවල මීගමුව බන්ධනාගාරය තුළ සිදු වූ සිදුවීම්වලින් මෙම පිරිස මියගිය බවයි.

රක්ෂිත බන්ධනාගාරගතව සිටි මෙම රැඳවියන්ගේ ජීවිත සම්බන්ධයෙන් රජය සෘජුවම වගකිව යුතු බවත්, බන්ධනාගාරයක් තුළ සිදුවන මරණ සම්බන්ධයෙන් රජය සම්පූර්ණ වගකීම දැරිය යුතු බවට ජනාධිපතිවරයා ද මීට පෙර ප්‍රකාශ කර ඇති බවත් එම ලිපියේ සඳහන් වේ.

මියගිය රැඳවියන්ගේ පවුල්වල සුබසාධනය වෙනුවෙන් වන්දි ලබා දීම රජයේ වගකීමක් බව පෙන්වා දෙන එම කමිටුව, මීට පෙර 2012 වසරේ වැලිකඩ බන්ධනාගාරයේදී රැඳවියන් 27 දෙනෙකු සහ 2020 වසරේ මහර බන්ධනාගාරයේදී රැඳවියන් 11 දෙනෙකු ඝාතනය වූ සිදුවීම් පිළිබඳව ද සිහිපත් කර දෙයි.

එවැනි සිදුවීම් සම්බන්ධයෙන් පත් කළ කොමිෂන් සභා වාර්තාවල නිර්දේශ නිසි පරිදි ක්‍රියාත්මක නොකිරීම හේතුවෙන් මෙවැනි අවාසනාවන්ත තත්ත්වයන් නැවත නැවතත් සිදු වන බවට එම ලිපිය මගින් චෝදනා කර ඇත.

ශ්‍රී ලංකා රජය ද අත්සන් තබා ඇති සිරකරුවන්ට සැලකීම පිළිබඳ අවම සම්මුතිය හෙවත් 'නෙල්සන් මැන්ඩෙලා' ජාත්‍යන්තර රීතීන්ට අනුව ද මෙවැනි අවස්ථාවක රජය වගකීමෙන් බැඳී සිටින බව එම කමිටුව අවධාරණය කරයි.