සත්ව ගොවිපොළක මුවාවෙන් මැදවච්චියේ රජයේ කැලයක් ඩෝසර් කරයි..

Jul 17, 2026 at 09:49 AM

|

Lanka Leader

මැදවච්චිය ප්‍රාදේශීය ලේකම් කොට්ඨාසයට අයත් ආනේකෙට්ටිය ග්‍රාම නිලධාරී වසමේ මහකෝන්ගස්කඩ විහාරස්ථානය ආසන්නයේ පිහිටි රජයට අයත් අක්කර සියයක පමණ වටිනා වනාන්තර පද්ධතියක් කිසියම් පිරිසක් විසින් මේ වන විට දැඩි ලෙස විනාශ කරමින් පවතින බව වාර්තා වේ.

ප්‍රදේශවාසීන් චෝදනා කරන්නේ සත්ව ගොවිපොළක් ඉදිකිරීමේ මුවාවෙන් මෙම මහා පරිමාණ වන විනාශය සිදුකරන බවයි. මෙම ම්ලේච්ඡ ක්‍රියාව හේතුවෙන් වනාන්තරය තුළ වසර ගණනාවක් පුරා ආරක්ෂිතව තිබූ කළුවර, බුරුත සහ හල්මිල්ල වැනි ඉතා වටිනා දැවැන්ත ශාක රැසක් මේ වන විටත් කපා ඉවත් කර විනාශ කර දමා ඇත.

මේ සම්බන්ධයෙන් අදහස් දැක්වූ ප්‍රදේශයේ වැඩවසන උලුක්කුලමේ ඉන්දසාර හිමියන් පෙන්වා දුන්නේ මහකෝන්ගස්කඩ ප්‍රදේශය අවට ආරක්ෂා වී තිබූ එකම කැලෑ භූමිය මෙය බවයි. අලි ඇතුන්, දිවියන් සහ මුවන් වැනි සතුන් රැසකගේ ස්වභාවික වාසභූමියක් වූ මෙම වනාන්තරය විනාශ කිරීම හේතුවෙන් දැඩි ලෙස අසරණ වී සිටින වන අලි, මේ වන විට තම්මැන්නාකුලම ගම්මානයට කඩා වැදී දේපළ හා වගාවන්ට දැඩි හානි සිදු කරති. වන අලි තර්ජනයෙන් තමන්ගේ ජීවිත බේරා ගැනීම සඳහා අසරණ වූ ගම්වැසියන්ට තමන්ගේම ශ්‍රමයෙන් අලි අගල් කපා ගැනීමට පවා සිදුව ඇති බව උන්වහන්සේ වැඩිදුරටත් අනාවරණය කළහ.

වන විනාශයේ නිරත පිරිස් තමන් සතුව ඒ සඳහා අවශ්‍ය සියලු බලපත්‍ර පවතින බව ප්‍රකාශ කළද, ප්‍රදේශයේ වනජීවී හා ගොවිජන සේවා නිලධාරීන් පවසන්නේ තමන් මේ පිළිබඳව කිසිවක් නොදන්නා බවයි. ප්‍රාදේශීය ලේකම්වරයා පවා මෙම බරපතළ පරිසර විනාශය හමුවේ මුළුමනින්ම නිහඬ පිළිවෙතක් අනුගමනය කරන බවට ඉන්දසාර හිමියෝ චෝදනා කරති. කෙසේ වෙතත්, මේ පිළිබඳව මැදවච්චිය ප්‍රාදේශීය ලේකම්වරයාගෙන් විමසූ විට ඔහු ප්‍රකාශ කළේ, පැනනැඟී ඇති ගැටලුකාරී තත්ත්වය සම්බන්ධයෙන් ඉදිරි තීරණයක් ගන්නා තෙක් අදාළ වනාන්තරය එළිපෙහෙළි කිරීමේ කටයුතු තාවකාලිකව අත්හිටුවීමට පියවර ගෙන ඇති බවයි.