ශ්‍රී ලංකාවේ සෑම පුද්ගලයන් පස් දෙනෙකුගෙන් එක් අයෙකු දරිද්‍රතාවයෙන්.. පවුල් තුනෙන් එකකට හරිහමන් කෑම නෑ..- ලෝක බැංකුව

Jul 16, 2026 at 11:32 AM

|

Lanka Leader

ශ්‍රී ලංකාවේ සෑම පුද්ගලයන් පස් දෙනෙකුගෙන් එක් අයෙකු තවමත් දරිද්‍රතාවයෙන් පීඩා විඳින බවත්, මෙරට පවුල්වලින් තුනෙන් එකකට ප්‍රමාණවත් පෝෂ්‍යදායී ආහාර ලබා ගැනීමට නොහැකි වී ඇති බවත් ලෝක බැංකුව අනාවරණය කරයි.

ශ්‍රී ලංකාව සහ මාලදිවයින සඳහා වන ලෝක බැංකු කළමනාකරු ගෙවෝර්ග් සර්ග්සියාන් මහතා පෙන්වා දෙන්නේ, රටේ ආර්ථිකය ස්ථාවර වීම සහ ආර්ථිකය යථා තත්ත්වයට පත්වීම යනු කරුණු දෙකක් බවයි.

ආර්ථිකය ස්ථාවර වුවද, එහි ප්‍රතිලාභ ජනතාවට දෛනිකව දැනෙන මට්ටමට තවමත් යථා තත්ත්වයට පත්ව නොමැති බව ඔහු අවධාරණය කළේය.

ආර්ථික අර්බුදයට පෙර පැවති මට්ටමට සාපේක්ෂව ජනතාවගේ වැටුප් තවමත් ඉහළ ගොස් නොමැති අතර, රැකියා වෙළෙඳපොළ ද සාමාන්‍ය තත්ත්වයට පත්ව නොමැත.

මෙහි බලපෑම විශේෂයෙන්ම කාන්තාවන්ට දැඩිව දැනෙන බව ලෝක බැංකු වාර්තා පෙන්වා දෙයි. යුක්රේන යුද්ධය සහ මැදපෙරදිග අර්බුදය වැනි ගෝලීය තත්ත්වයන් හමුවේ ශ්‍රී ලංකාවේ ආර්ථිකය යථා තත්ත්වයට පත් කිරීමේ ගමන තවදුරටත් අභියෝගාත්මක වී තිබේ.

ඉදිරි දශකය තුළ මෙරට රැකියා වෙළෙඳපොළට තරුණ තරුණියන් ලක්ෂ 10ක් පමණ අලුතින් එක්වීමට නියමිතය. එහෙත් වත්මන් ආර්ථික වර්ධන වේගය අනුව ඉදිරි වසර 10 තුළ නිර්මාණය කළ හැක්කේ රැකියා ලක්ෂ තුනක් පමණක් බව සර්ග්සියාන් මහතා අනතුරු ඇඟවීය. ඒ අනුව, තරුණ තරුණියන් දස දෙනෙකුගෙන් හත් දෙනෙකුට විධිමත් රැකියා අවස්ථා අහිමි වීමේ අවදානමක් පවතී.

මෙරට ශ්‍රම බලකායෙන් 70%ක්ම දැනට නිරතව සිටින්නේ අවිධිමත් රැකියාවල බවත්, අනෙකුත් රටවල් සමඟ සැසඳීමේදී මෙය ඉතා ඉහළ අගයක් බවත් ලෝක බැංකුව පවසයි. මෙම තත්ත්වයට කඩිනම් විසඳුම් නොලැබුණහොත් තරුණ පරපුර දැඩි කලකිරීමකට පත්විය හැකි බවට ද හෙතෙම අනතුරු ඇඟවීය.

රටේ ආර්ථිකය ගොඩනැගීම සඳහා පෞද්ගලික අංශයේ දායකත්වය සහ ගුණාත්මක රැකියා උත්පාදනය අත්‍යවශ්‍ය බවත්, ඒ සඳහා අවශ්‍ය ආයෝජන දිරිගැන්වීමට සහ ලෝක වෙළෙඳපොළ සමඟ තරඟ කළ හැකි මට්ටමට දේශීය නිෂ්පාදන ඉහළ නැංවීමට ප්‍රතිසංස්කරණ අඛණ්ඩව සිදු කළ යුතු බවත් ලෝක බැංකුව වැඩිදුරටත් පෙන්වා දෙයි.