වධකාගාරයක් බවට පත් වූ සපුගස්කන්ද පොහොර කම්හලේ බේදවාචකය..

Jul 13, 2026 at 01:51 PM

|

Lanka Leader

👉 ශ්‍රී ලංකාවේ යූරියා පොහොර අවශ්‍යතාව මුළුමනින්ම පාහේ සපුරාලිය හැකිව තිබූ දේශීය යූරියා කර්මාන්ත ශාලාවක් වසා දමා එය පරණ යකඩවලට විකුණා දැමූ අවාසනාවන්ත පුවතක් ඔබ අසා තිබේද?

👉 1988-1989 භීෂණ සමයේ දී ක්‍රියාත්මක වූ බටලන්ද වධකාගාරය ගැන බොහෝ දෙනා කරුණු අසා තිබුණද ඊට සම්බන්ධ කතාවක් වන සපුගස්කන්දේ යූරියා පොහොර කම්හල ගැන බොහෝදෙනාට ඇත්තේ අල්ප අවබෝධයකි. 

👉 මේ කියන්නට යන්නේ බටලන්ද වධකාගාරය ගැන නොව මෙරට මහගු ජාතික සම්පතක් වූ මෙම යූරියා පොහොර කම්හලේ බේදනීය කතාව ගැනය. 

👉 මෙහි දේශපාලන පක්ෂ හා නායකයන්ගේ නම් ගම් පිළිබඳ කරුණු සදහන් වුවද මෙය හුදු පක්ෂවල ප්‍රශ්නයකට වඩා 1977න් පසු බලයට ආ සියලුම ආණ්ඩු අඩුවැඩි වශයෙන් අනුගමනය කරමින් සිටින යටත්විජිත ගැති ලිබරල් ආර්ථික ප්‍රතිපත්ති විසින් ජනිත කරන ලද ඛේදවාචකයක් බව අප ගැඹුරින් අවබෝධ කරගත යුතුය. 

👉 මේ යූරියා පොහොර කම්හල ආරම්භ කෙරෙන්නේ 1975 වසරේදී ය. එවක බලයේ සිටි අග්‍රාමාත්‍ය සිරිමාවෝ බණ්ඩාරනායක මැතිනියගේ සමගි පෙරමුණ ආණ්ඩුව විසින් රාජ්‍ය කාර්මික සංස්ථා පනත නමින් පනතක් සම්මත කරන ලද අතර, ඒ යටතේ රාජ්‍ය පොහොර නිෂ්පාදන සංස්ථාව පිහිටුවනු ලැබිණි. එකල කර්මාන්ත සහ විද්‍යා කටයුතු ඇමතිවරයා වූයේ ටී. බී සුබසිංහ මහතාය. 

👉 අද මෙන්ම එදා ද පොහොර ආනයනය සඳහා විශාල මුදලක් වැය කිරීමට රජයට සිදු වූ අතර, සමගි පෙරමුණ රජයේ ප්‍රතිපත්තිය වූයේ ආනයන භාණ්ඩ හැකි පමණින් රට තුළම නිෂ්පාදනය කර ගැනීමය.

ඒ අනුව අරඹන ලද සපුගස්කන්දේ යූරියා පොහොර කම්හල සඳහා විශාල මුදලක් ආයෝජනය කෙරිණි. මූලික ප්‍රාග්ධනය සඳහා ආසියානු සංවර්ධන බැංකුවෙන් ණය මුදලක් ලබා ගත් අතර, බ්‍රිතාන්‍ය සමාගමක්, ලංකාවේ රාජ්‍ය ආයතන කිහිපයක් ද මේ සඳහා ප්‍රාග්ධන දායකත්වය සපයනු ලැබීය. 

👉 බොරතෙල් මගින් ඛනිජ තෙල් නිෂ්පාදනය කිරීමෙන් පසුව ඉතිරිවන අතුරු නිෂ්පාදනයක් වන (Nafta) නැෆ්තා නම් දියරය යූරියා පොහොර නිෂ්පාදනට භාවිත වූ අමුද්‍රව්‍යයකි. මීට අමතරව පොහොර නිෂ්පාදනයට විශාල ජල පරිමාවක් ද වේ. කැළණි ගග හා සපුගස්කන්ද තෙල් පිරිපහදුව ආශ්‍රිත ප්‍රදේශයකින් අක්කර සීයක් මේ සඳහා  තෝරාගත්තේ මේ කරුණු සලකමිනි. 

👉 මෙම ව්‍යාපෘතිය සඳහා දායකත්වය සපයන දේශීය සහ විදේශීය නිලධාරීන් වෙනුවෙන් නේවාසික පහසුකම් සලසා දීමට අවශ්‍ය නිවාස සංකීර්ණයක් ඉදි කිරීමට තවත් අක්කර 50ක භූමි ප්‍රමාණයක් වෙන් කර තිබිණි. පසුව බටලන්ද වධකාගාරය බවට පත් වූයේ සපුගස්කන්ද යූරියා කම්හල් පරිශ්‍රය තුළ තිබූ එම ප්‍රදේශයයි. 

👉 1975 වසරේදී කම්හල ඉදිකිරීමේ කටයුතු ආරම්භ වූවද එය නිම කිරීම සඳහා වසර 04ක කාල සීමාවක් ගත වී ඇත. ෙමේ අතරවාරයේ දී 1977 මහ මැතිවරණයෙන් සිරිමාවෝ මැතිනියගේ ආණ්ඩුව පරාජයට පත්වන අතර මේ සඳහා මූලිකත්වය ගෙන කටයුතු කළ කිසිවෙකුට පොහොර කම්හලෙහි නිමාවක් දක්නට නොලැබිණි. 

👉 අලුතෙන් පත් වූ ආණ්ඩුවේ නව කර්මාන්ත ඇමතිවරයා වූයේ කැලණියෙන් තේරී පත් වූ කළුවාදේවගේ සිරිල් මැතිව් ය. අලුතින් ඉදි කරනු ලබන මෙම පොහොර කම්හල පිහිටා තිබුණේ මොහුගේ මැතිවරණ කොට්ඨාසයට මායිම්වය. 

👉 කම්හලෙහි මූලික ඉදිකිරීම් අවසන් කිරීමෙන් අනතුරුව 1979 වසරේදී යූරියා නිෂ්පාදනය කිරීම ආරම්භ කරනු ලැබීය. දිනකට යූරියා මෙට්‍රික් ටොන් 980ක් නිෂ්පාදනය කරනු ලැබූ මෙම කම්හල නිසාවෙන් ලංකාවට වාර්ෂිකව නිෂ්පාදනය කර ගැනීමට අවශ්‍ය යූරියා ප්‍රමාණය සකස් කර ගැනීම සඳහා ගත වී ඇත්තේ මාස තුනක පමණ කාලයකි.

👉 මේ හේතුව නිසාවෙන් වසරේ ඉතිරි මාස 09ක කාලය පුරාවට සිය වෘත්තියේ නියලීමට නොහැකි වීමේ අවධානමක් සේවකයින්ට පැන නැගුණ මුත්, කම්හලෙහි ස්වභාවය අනුවම අඛණ්ඩව මාස කීපයක් ක්‍රියාත්මක වීමෙන් පසු තවත් මාස කිහිපයක් එය ක්‍රියාත්මක නොකොට නඩත්තු කටයුතු සිදු කළ යුතුව තිබී ඇත.

👉 මේ කාලසීමාව අතරවාරයේදී යූරියා කම්හලෙහි සේවකයින්ට, කාර්මික ශිල්පීන්ට මෙන්ම යන්ත්‍රාගාර සේවකයන් හට ද විදේශ පුහුණුවක් ලබාදීමට ආයතන පාලනාධිකාරිය විසින් කටයුතු කර ඇත. මේ ආදි හේතු නිසාම  එවකට ශ්‍රී ලංකාවේ යූරියා පොහොර කම්හලෙහි නිෂ්පාදන ප්‍රමිතිය ඉතා ඉහළ මට්ටමක පැවති බව කියැවේ. වෙනත් රටවලින් පවා එවකට අපගේ පොහොර සඳහා ඇණවුම් ලැබීමට පටන් ගෙන ඇත්තේ ඒ අනුවය.

👉 මේ සඳහා හොඳම නිදසුනක් වන්නේ අදාළ කාල සීමාවේදී ශ්‍රී ලංකාවට බුරුමයෙන් යූරියා මෙට්‍රික් ටොන් පනස්දහසක ඇණවුමක් ලැබීමය. කම්හලෙහි සේවකයන් දිවා රෑ නොබලා සති අන්ත මෙන්ම පෝය නිවාඩු ද කිසිවක් නොගෙන මෙකී යූරියා මෙට්‍රික් ටොන් පනස්දහසක ප්‍රමාණය දින විසි ගණනක් ඇතුළත නිෂ්පාදනය කොට බාරදීමට සමත් වී ඇත. පොහොර රැගෙන යාම සඳහා පැමිණ සිටි නැව් වලට ද මේ හරහා විශාල වාසියක් සැලසී ඇත. 

👉 එහෙත් මෙකී දැවැන්ත වූත් ස්ථාවර වූත් ව්‍යාපාරය සඳහා කණකොකා හැඩීම ආරම්භ වනුයේ ජේ. ආර්. ජයවර්ධන ආණ්ඩුවේ විවෘත ආර්ථික ප්‍රතිපත්තිය සමගිනි. 

👉 ඒ අනුව සුපුරුදු ලෙස යූරියා පොහොර අඩු මිලකට ගෙන්විය හැකිව තිබියදී වැඩි පිරිවැයක් යොදා  රට තුළ යූරියා නිෂ්පාදනය කරන්නේ මන්ද යන මුග්ධ ලිබරල් තර්කය පදනම් වූ විශාල කතාබහක් ආණ්ඩුව තුළ ඇති වූ අතර, එහි අවසානය වූයේ ආණ්ඩුව මෙම කම්හල විකුණා දැමීමට එකගතාවයකට පැමිණීමය. 

👉 ඒ අනුව 1986 දී අන්තර්ජාතික මිල ගණන් කැඳවීමක් ආණ්ඩුව විසින් ප්‍රකාශයට පත් කරනු ලැබීය. මුල් කාලීනව ඒ සඳහා අන්තර්ජාතික වශයෙන් සාධනීය පිළිතුරක් නොලැබෙන මුත් ඊට පසු අවුරුද්දේ දී එනම් 1987 දී කැබිනට් මණ්ඩල සංශෝධනයක් සිදු වන අතර ඒ යටතේ නව කර්මාන්ත ඇමතිවරයා වශයෙන් පත්වන්නේ අන් ජේ. ආර් ජයවර්ධනගේ බෑනා වන රනිල් වික්‍රමසිංහය.

👉 කර්මාන්ත ඇමතිවරයා වන රනිල් වික්‍රමසිංහ මෙම යූරියා පොහොර කම්හලෙහි සියලු යන්ත්‍ර සූත්‍ර විකිණීමේ ක්‍රියා පටිපාටියට එළඹෙන්නේ මේ අතරවාරයේය. කම්හල මිලදී ගැනීම සඳහා කිසිදු සමාගමක් ඉදිරිපත් නොවූ පසුබිමක රනිල් වික්‍රමසිංහගේ තීරණය වූයේ කෝටි ගණනක් වටිනා කම්හලට අයත්වන දැවැන්ත යන්ත්‍ර සූත්‍ර තොගය විකුණා දැමීමය.

👉 ඔහු මෙම කටයුත්ත භාර කළේ ඔහුගේම ඥාතියෙකු හා ඔහු ඩී එස් සේනානායක අගමැතිවරයාගේ මුණුබුරෙකු වූ අශෝක සේනානායකටය. ඔහු එම කටයුත්ත කෙතරම් හොඳින් ඉටු කළේ ද කිවහොත් යූරියා පොහොර කම්හලෙහි වටිනා යන්ත්‍ර සූත්‍ර විකුණා දමන්නේ අබලි යකඩ වශයෙන් තක්සේරු කරමිනි. ඉන්දියාවේ Southern Petroleum Industries Corporation සමාගම විසින් මේ අබලි යකඩ තොගය මිලට ගනු ලැබීය. 

👉 මීටත් අමතරව කම්හල තුළ නවීන සන්නිවේදන උපකරණවලින් සමන්විත අති දැවැන්ත සන්නිවේදන පද්ධතියක් පැවතුණු අතර ඒ සියල්ල විකුණා දමන ලද්දේ පරණ වයර් වශයෙනි. අවසානයේ යූරියා පොහොර කම්හලෙහි යන්ත්‍ර සූත්‍ර පැරණි යකඩ වශයෙන් මිලට ගත් Southern Petroleum Industries Corporation සමාගම මෙකී යන්ත්‍ර සූත්‍ර සියල්ල රැගෙන ගොස් එක්සත් අරාබි එමීර් රාජ්‍යයේ ජමිල් අලී නම් ආයෝජන කලාපයෙහි සවි කරන ලද බවට තොරතුරු අනාවරණය වේ.

👉 කර්මාන්තශාලාව ස්ථාපිත කිරීමෙන් පසු එහි එක් දිනකට යූරියා පොහොර මෙට්‍රික් ටොන් දහසක් පමණ නිෂ්පාදනය කර ඇතැයි වාර්තා වල සඳහන් ය. ඉන් පසුව සිදු වූ හාස්‍යජනකම කරුණ නම් මෙරටට විශාල සම්පතක් වූ මෙම පොහොර කම්හල අප රටේ පාලකයන් විසින් පරණ යකඩවලට විකුණා, එම කම්හල අරාබියේ සවි කිරීමෙන් පසු නිෂ්පාදනය කරන ලද යූරියා පොහොර ආනයනය කිරීමට කටයුතු කොට තිබීමය.

(Next page සමාජ මාධ්‍ය පිටුවෙන් උපුටා ගන්නා ලදී)