දේශපාලන අවශ්‍යතාවයන් සපුරා ගන්න විනිශ්චයකාරවරුන්ගේ විශ්‍රාම වයස දීර්ඝ කිරීමට ආණ්ඩුව දරන පහත් සහ නිර්ලජ්ජිත උත්සාහයට විරුද්ධ විය යුතුයි - ශ‍්‍රී ලංකා පොදුජන පෙරමුණ

Jul 12, 2026 at 06:11 AM

|

Lanka Leader

ශ‍්‍රී ලංකා පොදුජන පෙරමුණ විසින් නිකුත් කරන ලද මාධ්‍ය නිවේදනයක් මෙහි දැක්වෙයි.

දේශපාලන අවශ්‍යතාවයන් සපුරා ගැනීම සඳහා මේ රටේ ඉහළ අධිකරණ වල විනිශ්චයකාරවරුන්ගේ විශ්‍රාම වයස දීර්ඝ කිරීමට මෙම ආණ්ඩුව දරනු ලබන්නා වූ ඉතාමත් පහත් සහ නිර්ලජ්ජිත උත්සාහයට විරුද්ධ විය යුතුය.

දේශපාලන අවශ්‍යතාවයන් සපුරා ගැනීම සඳහා මේ රටේ ඉහළ අධිකරණ වල විනිශ්චයකාරවරුන්ගේ විශ්‍රාම වයස දීර්ඝ කිරීමට මෙම ආණ්ඩුව දරනු ලබන්නා වූ ඉතාමත් පහත් සහ නිර්ලජ්ජිත උත්සාහයට විරුද්ධව මේ රටේ ඉතා විශාල ජනතා මතයක් ඇතිව තිබෙන බව අපි නිරීක්ෂණය කරමු. 

අප පක්ෂයක් වශයෙන් දිගින් දිගටම මෙම පහත් උත්සාහයට එරෙහි වූයේ එය අප රටේ  ප්‍රජාතන්ත්‍රවාදයට මරු පහරක් වන බැවිනි.

විනිශ්චකාරවරුන්ගේ සංගමය විසින් සම්මත කොට ඇත්තේ මෙම තීරණයට විරුද්ධ විය යුතු බවයි. රටේ විනිශ්චකාරවරුන් විසින්ම මෙම ආණ්ඩුවේ කූට සහ ප්‍රජාතන්ත්‍ර විරෝධී උත්සාහයට විරුද්ධව හඬක් නැගීම ‍ප්‍රජාතන්ත්‍රවාදය අගයන රටක් විසින් ඉතා ඉහලින් සලකා බැලිය යුතු කරුණකි. 

වත්මන් ආණ්ඩුව විසින් දේශපාලන අවශ්‍යතා මත ඉහළ අධිකරණවල විනිසුරුවන්ගේ සේවකාලය දීර්ඝ කිරීමට දරන්නා වූ මෙම නිර්ලජ්ජිත උත්සාහයට එරෙහිව විපක්ෂයේ සියලු පක්ෂ එකමුතු කොට හඬක් නැගිය යුතු බවට පසුගිය සතියේ අප පක්ෂයේ ජාතික සංවිධායකතුමා විසින් මේ රටේ පාර්ලිමේන්තුවේ විපක්ෂ නායකවරයාගෙන් ඉල්ලා සිටිනු ලැබූ අතර එම කරුණ සම්බන්ධයෙන් විපක්ෂ නායකවරයාගේ ඉක්මන් අවධානය යොමු වනු ඇතැයි මම විශ්වාස කරමි. 

අප මව්බිමෙහි ‍ප්‍රජාතන්ත්‍රවාදය රැක ගැනීමේදී එයට එරෙහිව කුමන තර්ජන හා බලපෑම් ඇතිවුවද ඒ වෙනුවෙන් පෙනී  සිටින බවටත් ‍ප්‍රජාතන්ත්‍රවාදය රැකගැනීම සඳහා උපරිම කැපවීම කරන බවටත් ප්‍රකාශ කර සිටීමට කැමැත්තෙමි.

නීතීඥ සාගර කාරියවසම්

මහ ලේකම්

ශ්‍රී ලංකා පොදුජන පෙරමුණ