“ඩොලර් බිලියනයක මහා පරිමාණ විනිමය වංචාවක්”.. මහ බැංකු අධිපති ඇතුළු ප්‍රධානීන් වහාම මුදල් කමිටුව හමුවට කැඳවා ප්‍රශ්න කරන්නැයි කියයි..

Jun 30, 2026 at 07:41 AM

|

Lanka Leader

ජනාධිපති අනුර කුමාර දිසානායක මහතා විසින් මෑතකදී අනාවරණය කරන ලද ඇමරිකානු ඩොලර් බිලියනයක දැවැන්ත විදේශ විනිමය වංචාව සම්බන්ධයෙන් විධිමත් පරීක්ෂණයක් පවත්වන ලෙස විපක්ෂ පාර්ලිමේන්තු මන්ත්‍රී රවී කරුණානායක මහතා රජයේ මුදල් පිළිබඳ කාරක සභාවෙන් (COPF) හදිසි ඉල්ලීමක් කර තිබේ. 

මේ සම්බන්ධයෙන් මුදල් කමිටුවේ සභාපතිවරයා වෙත විශේෂ ලිපියක් යොමු කරමින් මන්ත්‍රීවරයා අවධාරණය කර ඇත්තේ, මෙම බරපතළ චෝදනා පිළිබඳව කඩිනමින් විමර්ශනය කිරීම කාරක සභාව සතු ව්‍යවස්ථාපිත වගකීමක් වන අතර, එය ප්‍රමාද කිරීම රාජකාරිය පැහැරහැරීමක් වන බවයි.

ජනාධිපතිවරයා මුදල් අමාත්‍යවරයා ලෙස කළ ප්‍රකාශයන් පෙන්වා දෙමින් ඔහු සඳහන් කරන්නේ, 2024 වසරේ සිට වංචනික ටෙලිග්‍රාෆ් පණිවිඩ (TTs) සහ කිසිදු භාණ්ඩයක් රට තුළට නීත්‍යානුකූලව ඇතුළු නොවුණු ආනයන (Phantom Imports) සඳහා කල්තියා මුදල් ගෙවීම් කිරීම හරහා ශ්‍රී ලංකාවට ඇමරිකානු ඩොලර් බිලියනයක පමණ දැවැන්ත අලාභයක් සිදුව ඇති බවයි.

එසේම, ව්‍යාජ සමාගම් සහ නීති විරෝධී ගනුදෙනු හරහා බිලියන ගණනක මුදල් විදේශගත කර ඇති වෙළෙඳාම පාදක කරගත් මුදල් විශුද්ධිකරණ ජාලයක් පිළිබඳව මහජන ආරක්ෂක අමාත්‍ය ආනන්ද විජේපාල මහතා කළ අනාවරණයන් ද ඔහු මෙහිදී සිහිපත් කරයි.

මෙතරම් විශාල මුදලක් රටින් පිටවෙද්දී මහ බැංකුවේ මුදල් විශුද්ධිකරණ විරෝධී සහ මූල්‍ය නිරීක්ෂණ පද්ධති ක්‍රියාත්මක නොවූයේ මන්දැයි ප්‍රශ්න කරන මන්ත්‍රීවරයා, ක්‍රිප්ටොකරන්සි (Cryptocurrency) මඟින් සිදුවන අවදානම් පිළිබඳව තමන් 2025 ජනවාරි මාසයේදීම මුදල් කමිටුව දැනුවත් කළ බව පවසමින් මෙහි ඇති නියාමන දුර්වලතා ද පරීක්ෂාවට ලක්කළ යුතු බව කියා සිටී.

ඒ අනුව මුදල් කමිටුවේ මීළඟ රැස්වීමේ න්‍යාය පත්‍රයට මෙම විෂය ඇතුළත් කර, ශ්‍රී ලංකා මහ බැංකුවේ අධිපතිවරයා ඇතුළු ජ්‍යෙෂ්ඨ නිලධාරීන්, ආනයන හා අපනයන පාලක ජනරාල්වරයා, ශ්‍රී ලංකා රේගු අධ්‍යක්ෂ ජනරාල්වරයා මෙන්ම මෙම ගනුදෙනුවලට සම්බන්ධ බවට සැක කෙරෙන වාණිජ බැංකු 13ක ප්‍රධාන අනුකූලතා නිලධාරීන් (Chief Compliance Officers) සහ අනෙකුත් සියලුම රාජ්‍ය නීති බලාත්මක කිරීමේ ආයතන වහාම කැඳවන ලෙස රවී කරුණානායක මහතා වැඩිදුරටත් ඉල්ලා සිටී.