පොහොර සමාගමේ මිලියන 8.8ක මූල්‍ය වංචා නඩුව: "මම චෝදනාවලට නිවැරදිකරු" - කුමාර ජයකොඩි මහාධිකරණයට කියයි.. ඊමේල් පණිවිඩයක් ගැනත් සාක්ෂිකාරියකගෙන් හෙළිදරව්වක්..

Jun 22, 2026 at 06:02 AM

|

Lanka Leader

ලංකා පොහොර සමාගමට අයත් අරමුදල් අවභාවිත කරමින් රජයට රුපියල් මිලියන 8.8කට අධික පාඩුවක් සිදුකළ බවට චෝදනා එල්ල වී සිටින එහි හිටපු සභාපති කුමාර ජයකොඩි මහතා, තමන් එම චෝදනාවලට නිවැරදිකරු බව (චෝදනා ප්‍රතික්ෂේප කරන බව) ප්‍රකාශ කිරීමෙන් අනතුරුව නඩුවේ සාක්ෂි විභාගය කොළඹ මහාධිකරණයේදී ආරම්භ විය.

කොළඹ මහාධිකරණ විනිසුරු රෂාන්ත ගොඩවෙල ඉදිරියේ මෙම නඩුව කැඳවනු ලැබූ අතර, එහිදී විත්තිකරුට එරෙහි චෝදනා පත්‍රය කියවා දෙනු ලැබීය.

ඒ අනුව, නඩුවේ පළමු සාක්ෂිකාරිය වූ ජාතික සේවක සංගමයේ හිටපු වෘත්තීය සමිති නිලධාරිනියක වන ධම්මිකා පෙරේරා මහත්මිය සාක්ෂි දීම සඳහා කැඳවනු ලැබූ අතර, අල්ලස් හෝ දූෂණ චෝදනා විමර්ශන කොමිෂන් සභාවේ අතිරේක අධ්‍යක්ෂ අසිත ඇන්තනි මහතා විසින් මෙහිදී සාක්ෂි මෙහෙයවන ලදී.

ඇය උසාවිය හමුවේ කියාසිටියේ, මීට වසර 11කට පෙර තමන් විසින් යවන ලද ඊමේල් පණිවිඩයක් සම්බන්ධයෙන් සාක්ෂි දෙන ලෙස තමන්ට දන්වා තිබූ බවයි. එම ඊමේල් පණිවුඩය එවකට ජාතික සේවක සංගමයේ සභාපතිවරයාව සිටි එඩ්වඩ් නැමැත්තාගේ ඉල්ලීම පරිදි තමන් විසින් යවන ලද්දක් බව ඇය පැවසුවාය.

එඩ්වඩ් නැමැත්තාට ඊමේල් පණිවුඩයක් යැවීමට තාක්ෂණික හැකියාවක් නොමැති බව පවසා ඒ සඳහා තමන්ගේ සහාය ඉල්ලා සිටි බවත්, අල්ලස් කොමිසම වෙත යැවූ එම පැමිණිල්ලේ අඩංගු කරුණු සත්‍ය ද නැද්ද යන්න පිළිබඳව තමන් පෞද්ගලිකව නොදන්නා බවත් පෙරේරා මහත්මිය මෙහිදී වැඩිදුරටත් සඳහන් කළාය.

විත්ති පාර්ශවයේ නීතිඥවරුන් විසින් ඇයගෙන් හරස් ප්‍රශ්න ඇසීමක් සිදු නොකළේය.

විත්තිකාර හිටපු සභාපතිවරයා වෙනුවෙන් ජනාධිපති නීතිඥ නාලින්ද ඉන්දතිස්ස සමඟ නීතිඥ අකලංක උක්වත්ත පෙනීසිටියහ.