ඩෙංගු රෝගීන් 10ක් වනතුරු දුම් නොගහන ප්‍රාදේශීය සභා ගැන නාමල් කියන කතාව..

Jun 18, 2026 at 03:44 PM

|

Lanka Leader

ඩෙංගු මර්දනය සහ පාලනය සම්බන්ධයෙන් වත්මන් රජය මෙන්ම ජනතා විමුක්ති පෙරමුණ බලය හොබවන බහුතරයක් ප්‍රාදේශීය සභා නිසි ක්‍රියාමාර්ගයක් ගෙන නොමැති බව ශ්‍රී ලංකා පොදුජන පෙරමුණේ ජාතික සංවිධායක, පාර්ලිමේන්තු මන්ත්‍රී නාමල් රාජපක්ෂ පවසයි.

නෙළුම් මාවතේ පිහිටි පක්ෂ මූලස්ථානයේදී මන්ත්‍රීවරයා මාධ්‍ය අමතමින් කියා සිටියේ, කොළඹ අවට එක්තරා ප්‍රාදේශීය සභාවකට ඩෙංගු රෝගියෙකු වාර්තා වී ඇති බවට පැමිණිලි කළ අවස්ථාවක, මදුරු මර්දන දුම් ගැසීම සඳහා අඩුම තරමින් රෝගීන් දහ දෙනෙකුවත් සිටිය යුතු බවට බලධාරීන් ප්‍රකාශ කර ඇති බවයි.

රෝගීන් වැඩි වනතුරු බලා නොසිට, රෝගය හඳුනාගත් මුල් අවස්ථාවේදීම ප්‍රදේශයේ කුඩා දරුවන් ආරක්ෂා කර ගැනීමට කටයුතු කිරීම වගකිවයුතු ආයතනවල වගකීමක් බවත්, රජය මේ පිළිබඳව මීට වඩා අවධානය යොමු කළ යුතු බවත් ඔහු අවධාරණය කළේ.

කොළඹ මහ නගර සභාව ඇතුළු පළාත් පාලන ආයතන ඩෙංගු මර්දනය සඳහා සැබෑ වගකීමකින් යුතුව මැදිහත් විය යුතු බව පෙන්වා දුන් මන්ත්‍රීවරයා, කොළඹ නගරාධිපතිනිය මුල් වකවානුවේදී බේරේ වැව පවිත්‍ර කරන බව පැවසුවද පසුගිය වෙසක් කලාප සමයේදී එහි සැබෑ අසාර්ථකත්වය දැකගත හැකි වූ බවයි සඳහන් කර සිටියේ.

මෙවැනි අකාර්යක්ෂම ක්‍රියාමාර්ග හේතුවෙන් රටේ දරුවන් විශාල පිරිසකට හානි විය හැකි බව ඔහු පෙන්වා දුන්නේය.

තවද, වත්මන් ආණ්ඩුව මැදපෙරදිග අර්බුදය සිය ප්‍රධාන දේශපාලන සාධකය බවට පත් කරගනිමින් ජනතාව මත අසීමිත ලෙස බදු පටවමින් තෙල් මිල ඉහළ දමන බවට ද ඔහු චෝදනා කර සිටියේය.

ලෝක වෙළෙඳපොළේ සහ කලාපයේ සෙසු රටවල තෙල් මිල අඩු වෙද්දී, මෙරට මිල ඉහළ දමන්නේ බාල ගල් අඟුරු නිසා සිදු වූ පාඩුව පියවා ගැනීමට සහ ආණ්ඩුවේ වංචා, දූෂණ මෙන්ම නොහැකියාව වසා ගැනීමට බවයි ඔහු පවසා සිටියේ.

ජාතික ජන බලවේගයට සහයෝගය දක්වමින් ස්ටිකර් ගසාගත් ත්‍රිරෝද රථ රියදුරන් වත්මන් ඉන්ධන මිල හමුවේ දැඩි ජීවන පීඩනයකට ලක්ව ඇති බැවින්, ජනාධිපති අනුර කුමාර දිසානායක හමුවී තමන්ගේ ගැටලු ඉදිරිපත් කිරීමට ඔවුන්ට පූර්ණ අයිතියක් ඇති බව නාමල් රාජපක්ෂ ප්‍රකාශ කර සිටියේය.

පක්ෂයේ අනාගත සංවිධාන කටයුතු පිළිබඳව අදහස් දක්වමින් ඔහු කියා සිටියේ මහින්ද, ගෝඨාභය, බැසිල් සහ චමල් යන රාජපක්ෂවරුන්ගේ මඟපෙන්වීම සහ ආශිර්වාදය යටතේ දේශපාලනය ඊළඟ පරම්පරාවට භාරදීමේ වැඩපිළිවෙළක් ක්‍රියාත්මක වන බවයි.