පාස්කු ප්‍රහාරය වළක්වා නොගැනීම සම්බන්ධයෙන් හිටපු ආරක්ෂක ලේකම් හේමසිරි ප්‍රනාන්දුගේ නඩු තීන්දුවත් ජුලි 31 වැනිදා..

Jun 16, 2026 at 05:38 AM

|

Lanka Leader

බුද්ධි තොරතුරු ලැබී තිබියදීත් පාස්කු ප්‍රහාරය වළක්වා නොගැනීම සම්බන්ධයෙන් විත්තිකාර හිටපු ආරක්ෂක ලේකම් හේමසිරි ප්‍රනාන්දුට එරෙහිව නීතිපතිවරයා විසින් ගොනුකරනු ලැබ ඇති නඩුවේ තීන්දුව ලබන ජූලි මස 31 දින ප්‍රකාශයට පත් කිරීමට ස්ථිර ත්‍රිපුද්ගල මහාධිකරණය ඊයේ (15) තීරණය කර තිබේ.

විත්තිකරු වෙනුවෙන් පෙනී සිටි ජනාධිපති නීතිඥ චමින්ද අතුකෝරළ කළ වාචික දේශන ඉදිරිපත් කිරිම අවසන් කිරීමෙන් අනතුරුව මේ බව ප්‍රකාශ කෙරුනි.

මහාධිකරණ විනිසුරු ප්‍රියන්ත ලියනගේ (සභාපති), විරාජ් වීරසූරිය, තිලකරත්න බණ්ඩාර යන ස්ථිර ත්‍රිපුද්ගල මහාධිකරණ විනිසුරු මඩුල්ල හමුවේ මෙම නඩුව අද (15) කැඳවනු ලැබීය.

එහිදී විත්තිකාර හේමසිරි ප්‍රනාන්දු වෙනුවෙන් අධිකරණයේ පෙනී සිටි ජනාධිපති නීතිඥ චමින්ද අතුකෝරල විත්තියේ දේශනය වැඩිදුරටත් ඉදිරිපත් කරමින් මෙසේ ප්‍රකාශ කළේය.

"මෙය තහවුරු නොකළ බුද්ධි තොරතුරක් බව නිලන්ත ජයවර්ධන තමන්ට ප්‍රකාශ කළ බව විත්තිකරු විත්ති කූඩුවේ සිට කළ ප්‍රකාශය නිලන්ත ජයවර්ධන මූලික සාක්ෂියේදී තහවුරු කළා. ප්‍රහාරයක් එල්ල විය හැකි බවට ලැබුණු තොරතුර බුද්ධි තොරතුරක් ලෙස වර්ධනය වී නැති බව එහිදී නිලන්ත කියලා තියෙනවා. බුද්ධි සමාලෝචන රැස්වීමේ දී හැමෝම කරුණු දක්වලා ඉවර වුණාම විත්තිකරු ඒ තොරතුර ගැන අහනවා. එතකොට තමයි එය තහවුරු කර නොගත් තොරතුරක් බව කියන්නේ. මේ තොරතුර ගැන අනිත් අයව දැනුවත් කරන ලෙස සිසිර මෙන්ඩිස් ට දැනුම් දුන්නා. එහෙත් නිලන්ත ජයවර්ධන පොලිස්පතිට දැනුම් දීමක් කරන්නේ සැර බාල කරලා.

මේ නඩුවේ චෝදනා 755ක් තිබෙනවා. විත්තිකරුට තියෙන්නේ අනුබල දීම. අපරාධ නඩු විධාන සංග්‍රහ අනුව ඕනෑකමින් ආධාර අනුබල දිය යුතුයි. හේමසිරි ප්‍රනාන්දුට මිනීමැරුම් චෝදනා එල්ල වී නෑ. එම චෝදනා එල්ල වූ අය සමඟ කිසිම අවස්ථාවක කිසිම සම්බන්ධයක් විත්තිකරුට තිබූ බව කොහේවත් කියලා නෑ. හදිසි නීතිය පනවා හමුදාව කැඳවීමේ බලයක් ආරක්ෂක ලේකම්ට නෑ.

"ස්වාමීනී, ගහන බව දැනගෙන හිටියා.මෙහෙම ගහයි කියලා හිතුවේ නෑ කියලා විත්තිකරු මාධ්‍යයට කළ ප්‍රකාශය ගැන සඳහන් කළා.

හේමසිරි ප්‍රනාන්දු කිව්වාම තමයි හැමෝම දැනගත්තේ මෙහෙම බුද්ධි තොරතුරු ආව බව. නිලන්ත ජයවර්ධන, සිරිසේන කිව්වෙත් නෑ. බෝම්බ ගහනවා කියලා තාත්තා කිව්වා කියලා මන්ත්‍රී කෙනෙක් කිව්වෙත් ඊට පස්සේ. මේ විත්තිකරු විතරයි ඒ ගැන කිව්වේ ඒ කියපු පව් තමයි මේ ගෙවන්නේ.”

මෙහිදී නීතිපතිවරයා වෙනුවෙන් පෙනී සිටි අතිරේක සොලිස්ටර් ජනරාල් සුදර්ශන ද සිල්වා සදහන් කළේ තොරතුරු දැන ගෙන ආරක්ෂක ලේකම් හේමසිරි ප්‍රනාන්දු බරපතල නොකර හැරීමක් සිදු කර ඇති බව යි.

එම නොකර හැරීම වෙනුවෙන් ඔහුට දඩුවම් ලබා දිය යුතු බව පැමිණිල්ල ස්ථාවරය වන බව ද අතිරේක සොලිස්ටර් ජනරාල්වරයා සඳහන් කළේය.

එම කරුණු දැක්වීමෙන් අනතුරුව නඩු විභාගය අවසන් කිරීමට අධිකරණය තීරණය කළේය.