“පාස්කු ප්‍රහාරය වළක්වා ගැනීමට අපොහොසත් වූ නිලධාරීන් දැන් මට එරෙහිව පරීක්ෂණ මෙහෙයවනවා”..- සලේ අභියාචනාධිකරණයට කියයි

Jun 13, 2026 at 05:27 AM

|

Lanka Leader

2019 පාස්කු ඉරිදා ත්‍රස්ත ප්‍රහාරය වළක්වා ගැනීමට අපොහොසත් වූ බවට විවිධ විමර්ශන මඟින් හඳුනාගෙන ඇති ෂානි අබේසේකර සහ රවි සෙනෙවිරත්න ඇතුළු ජ්‍යෙෂ්ඨ පොලිස් නිලධාරීන් පිරිසක්, මේ වන විට තමන්ට එරෙහිව විමර්ශන මෙහෙයවමින් සිටින බව රාජ්‍ය බුද්ධි සේවයේ හිටපු අධ්‍යක්ෂ, මේජර් ජෙනරාල් සුරේෂ් සලේ සිය නීතිඥවරයා මාර්ගයෙන් පෙරේදා (11) අභියාචනාධිකරණයට දැනුම්දී ඇත.

පාස්කු ප්‍රහාරය සම්බන්ධ විමර්ශනවලට අදාළව තමන්ව අත්අඩංගුවට ගැනීම සහ රැඳවුම් භාරයේ තබාගැනීමේ නීත්‍යානුකූලභාවය අභියෝගයට ලක්කරමින් සුරේෂ් සලේ ගොනුකර තිබූ රිට් පෙත්සම අභියාචනාධිකරණය හමුවේ කැඳවූ අවස්ථාවේදී, ඔහු වෙනුවෙන් පෙනීසිටි ජනාධිපති නීතිඥ සංජීව ජයවර්ධන මෙම කරුණු ඉදිරිපත් කර තිබේ.

ජනාධිපති නීතිඥවරයා අධිකරණයට පෙන්වාදී ඇත්තේ, විනිසුරු ජායකි ද අල්විස්ගේ ප්‍රධානත්වයෙන් යුත් කමිටුව ඇතුළු පාස්කු ප්‍රහාරය පිළිබඳව සිදුකළ විමර්ශන කිහිපයකදීම, ප්‍රහාරය පිළිබඳ පූර්ව අනතුරු ඇඟවීම් ලැබී තිබියදීත් සිය රාජකාරිය පැහැරහැරීමේ චෝදනාව මත එවකට අපරාධ පරීක්ෂණ දෙපාර්තමේන්තුවේ අධ්‍යක්ෂ ෂානි අබේසේකර සහ එහි ජ්‍යෙෂ්ඨ නියෝජ්‍ය පොලිස්පතිවරයාව සිටි රවි සෙනෙවිරත්න යන අයට එරෙහිව අපරාධමය පියවර ගන්නා ලෙස නිර්දේශ කර තිබූ බවයි.

එමෙන්ම, පාස්කු ඉරිදා බෝම්බ ප්‍රහාරයෙන් පසුව පවත්වන ලද ජනාධිපති විමර්ශන කොමිෂන් සභාව, පාර්ලිමේන්තු තේරීම් කාරක සභාව, අංශභාර අධීක්ෂණ කාරක සභාව, විනිසුරු ඒ.එච්.එම්.ඩී. නවාස් ඉමාම්, විනිසුරු ජායකි ද අල්විස්, විනිසුරු ජනක් ද සිල්වා යන අයගේ කමිටු වාර්තා මෙන්ම ශ්‍රේෂ්ඨාධිකරණය හමුවේ පැවැති නඩු කටයුතුවලදී ද සුරේෂ් සලේට එරෙහිව කිසිදු සාක්ෂියක් අනාවරණය වී නොමැති බව ඔහු තවදුරටත් කියා ඇත.

මෙහිදී විනිසුරු ජනක් ද සිල්වා කමිටුවේ සොයාගැනීම් සවිස්තරාත්මකව ඉදිරිපත් කර ඇති ජනාධිපති නීතිඥවරයා, ශ්‍රී ලංකාව ඉලක්ක කර ගනිමින් ක්‍රියාත්මක වූ අයි.එස්.අයි.එස්. අන්තවාදීකරණ ප්‍රයත්නයන් පිළිබඳව බුද්ධි තොරතුරු වාර්තා රැසක් එම වාර්තාවේ අඩංගු වන බව පවසා ඇත. “අපරාධ පරීක්ෂණ දෙපාර්තමේන්තුවේ අධ්‍යක්ෂවරයා ලෙස සිය රාජකාරිය පැහැර හැර ඇති ෂානි අබේසේකර, දැන් සුරේෂ් සලේගේ විමර්ශකයා බවට පත්ව සිටිනවා” යැයි නීතිඥ ජයවර්ධන සඳහන් කර තිබේ.

මෙම රිට් පෙත්සම සලකා බලන ලද්දේ, අභියාචනාධිකරණයේ සභාපති විනිසුරු රෝහන්ත අබේසූරිය සහ ප්‍රියන්ත ප්‍රනාන්දු ගෙන් සමන්විත ද්විපුද්ගල විනිසුරු මඩුල්ලක් හමුවේය.

ඉදිරිපත් වූ කරුණු සලකා බැලූ අධිකරණය, පෙත්සම පිළිබඳ වැඩිදුර සලකා බැලීම ලබන ජූලි මස 10 වැනිදාට නියම කර තිබේ. නීතිපතිවරයා වෙනුවෙන් නියෝජ්‍ය සොලිසිටර් ජනරාල් සුහර්ෂි හේරත් පෙනීසිට ඇත.

ත්‍රස්තවාදය වැළැක්වීමේ පනත යටතේ තමන්ට එරෙහිව නිකුත් කර ඇති රැඳවුම් නියෝගය ක්‍රියාත්මක වීම අත්හිටුවන අතුරු නියෝගයක් සහ කොළඹ කොටුව මහේස්ත්‍රාත් අධිකරණය හමුවේ පවතින සියලුම නඩු කටයුතු අත්හිටුවන අතුරු නියෝගයක් සුරේෂ් සලේ මෙම පෙත්සම මඟින් ඉල්ලා ඇත.

පෙත්සමේ වගඋත්තරකරුවන් ලෙස පොලිස්පති ප්‍රියන්ත වීරසූරිය, අපරාධ පරීක්ෂණ දෙපාර්තමේන්තුවේ අධ්‍යක්ෂ ෂානි අබේසේකර, කොළඹ කොටුව මහේස්ත්‍රාත්වරයා සහ නීතිපතිවරයා ඇතුළු පිරිසක් නම්කර තිබේ.

පෙත්සමට අනුව, මෙම විමර්ශනය ආරම්භ වී ඇත්තේ බ්‍රිතාන්‍යයේ ‘චැනල් 4’ (Channel 4) නාලිකාව විකාශය කළ වාර්තා චිත්‍රපටයක අඩංගු කරුණු සම්බන්ධයෙන් ගරු රොහාන් ද සිල්වා පියතුමන් විසින් 2024 ඔක්තෝබර් 4 වැනිදා අපරාධ පරීක්ෂණ දෙපාර්තමේන්තුවට කරන ලද පැමිණිල්ලක් මතය.

එම වාර්තා චිත්‍රපටයේදී ‘අසාත් මවුලානා’ ලෙස හැඳින්වෙන මොහොමඩ් මිහිලාල් මොහොමඩ් හන්සිර් නැමැත්තා, සුරේෂ් සලෙයි සහ පාස්කු ප්‍රහාරය අතර සබඳතාවක් ඇති බවට චෝදනා කර තිබිණි.

කෙසේවෙතත්, සුරේෂ් සලේ මෙම චෝදනා තරයේ ප්‍රතික්ෂේප කර ඇති අතර, තමන් අන්තවාදී දේශක සහරාන් හෂීම් හෝ ඔහුගේ සගයන් සමඟ සබඳතා පැවැත්වූවා යැයි කියන කාල සීමාවන් තුළ තමන් ශ්‍රී ලංකාවේ නොසිටි බව පෙන්වා දී ඇත.

2016 දෙසැම්බර් සිට 2018 දෙසැම්බර් දක්වා තමන් මැලේසියාවේ ශ්‍රී ලංකා මහකොමසාරිස් කාර්යාලයේ අමාත්‍ය උපදේශකවරයෙකු ලෙස සේවය කරමින් එහි පදිංචිව සිටි බවත්, 2019 ජනවාරි 07 සිට 2019 නොවැම්බර් 29 දක්වා නවදිල්ලියේ ජාතික ආරක්ෂක විද්‍යාලයේ උපාධි පාඨමාලාවක් හැදෑරීම සඳහා ඉන්දියාවේ රැඳී සිටි බවත් ඔහු ප්‍රකාශ කරයි.

2019 අප්‍රේල් 21 වැනිදා පාස්කු ප්‍රහාරය සිදුවන අවස්ථාවේදී ද තමන් සිටියේ ශ්‍රී ලංකාවේ නොව ඉන්දියාවේ බව පෙත්සම්කරු වැඩිදුරටත් සඳහන් කර තිබේ.