MCC ගිවිසුම නැවතත් ශ්‍රී ලංකාවට ගේන්න යනවා.. – හර්ෂ ද සිල්වා

Jun 11, 2026 at 10:26 AM

|

Lanka Leader

ඇමරිකා එක්සත් ජනපදය සමඟ අත්සන් කිරීමට යෝජිතව තිබූ MCC ගිවිසුම නැවතත් ශ්‍රී ලංකාවට ලබාගැනීමේ අවස්ථාවක් උදාවී ඇතැයි තමන් දන්නා පරිදි වාර්තා වන බව සමගි ජන බලවේගයේ පාර්ලිමේන්තු මන්ත්‍රී හර්ෂ ද සිල්වා මහතා පළමු වරට අනාවරණය කර තිබෙනවා.

පෞද්ගලික රූපවාහිනී නාලිකාවක ඊයේ (08) පැවැති දේශපාලන වැඩසටහනකට එක්වෙමින් මන්ත්‍රීවරයා මේ බව සඳහන් කළ අතර, මෙම තොරතුර සත්‍යද නැත්ද යන්න වත්මන් ආණ්ඩුව විසින් තහවුරු කළ යුතු බවද ඔහු කියා සිටියා.

ප්‍රතිපත්තිමය ස්ථාවරභාවය ගොඩනැඟීම, බස්නාහිර පළාතේ රථවාහන තදබදය අවම කිරීම, කාර්යක්ෂමතාව ඉහළ නැංවීම මෙන්ම විධිමත් ඉඩම් ලියාපදිංචි කිරීමේ ක්‍රමවේදයක් හරහා ඉඩම් වෙළෙඳපොළක් නිර්මාණය කිරීම අරමුණු කරගනිමින් යහපාලන ආණ්ඩු සමයේ මෙම ගිවිසුම සාකච්ඡා කළ බව හර්ෂ ද සිල්වා මහතා පවසනවා.

එහිදී මාධ්‍යවේදියා නැඟූ ප්‍රශ්නයකට පිළිතුරු දෙමින් හර්ෂ ද සිල්වා මහතා පෙන්වා දුන්නේ, යහපාලන සමයේ මෙම ගිවිසුමට එරෙහිව ජනතා විමුක්ති පෙරමුණ ඇතුළු කණ්ඩායම් දැඩි ලෙස විරෝධතා දැක්වූ බවයි.

අතීතයේදී එම්.සී.සී. ගිවිසුමට එරෙහිව දැඩි ලෙස උද්ඝෝෂණය කළ කණ්ඩායම්, වත්මන් තත්ත්වය හමුවේ එම ගිවිසුම යළි හිමිවන්නේ නම් ඊට කැමැත්ත පළ කරන්නේද යන්න ප්‍රශ්නකාරී බව මන්ත්‍රීවරයා පවසනවා.

තමන් මෙලෙස මතු කළේ බෙහෙවින් සංවේදී මෙන්ම ආන්දෝලනාත්මක මාතෘකාවක් බව පෙන්වා දුන් ඒ මහතා, අදාළ පාර්ශ්වයන් මේ වනවිට සිය ස්ථාවරයන් වෙනස් කර ඇත්නම් සහ නිදහස් වෙළෙඳපොළ ක්‍රියාවලිය කෙරෙහි විශ්වාසය තබා තිබෙන්නේ නම්, ඔවුන් ඉඩම් වෙළෙඳපොළ ප්‍රතිසංස්කරණ මෙන්ම ප්‍රතිපත්තිමය ස්ථාවරභාවයක් වෙනුවෙන් පෙනී සිටීමට සූදානම්ද යන්න පිළිබඳව සොයා බැලිය යුතු බවද අවධාරණය කළා.

යහපාලන ආණ්ඩුව බලයට පත් වූ මුල් අවධියේ එවකට සිටි අමාත්‍ය මංගල සමරවීර මහතාගේ දැනුම්දීම මත තමන් මුලින්ම එම්.සී.සී. කාර්යාලය වෙත ගොස් මේ පිළිබඳව සාකච්ඡා කළ බැවින්, තමන්ට ඒ පිළිබඳව සෘජු අත්දැකීම් සහ සබඳතා පවතින බවද හර්ෂ ද සිල්වා මහතා තවදුරටත් අනාවරණය කළා.

ඔහු පවසන්නේ,  වත්මන් ආණ්ඩුව විපක්ෂයේ සිටියදී නව මහ බැංකු පනත ශ්‍රේෂ්ඨාධිකරණය හමුවේ අභියෝගයට ලක් කළද, වත්මන් ආණ්ඩුවේ නියෝජිතයන් මහ බැංකුවේ ස්වාධීනත්වය පිළිබඳව අද වනවිට සෘජු ප්‍රකාශයන් සිදු නොකරන බවයි..

එමෙන්ම ආර්ථික පරිවර්තන පනත මඟින් ආනයන ආදේශන ක්‍රියාවලිය අධෛර්යමත් වන බව පවසමින් විපක්ෂය එදා ඊට එරෙහිව නඩු පැවරූ බවට හර්ෂ ද සිල්වා මහතාගෙන් විමසා සිටියා.

ඊට ප්‍රතිචාර දක්වමින් මන්ත්‍රීවරයා කියා සිටියේ, ආනයන ආදේශනය මඟින් රට සංවර්ධනය කළ හැකි බව රජය විශ්වාස කරන්නේ නම් එය ප්‍රමුඛතාවක් ලෙස ක්‍රියාත්මක කළ යුතු වුවත්, වත්මන් පාලනය පැහැදිලි ස්ථාවරයක නොමැති බවයි.

මූලාශ්‍ර - news 19