රැඳවුම් නියෝගය අහෝසි කරන ලෙස ඉල්ලා සුරේෂ් සලේගේ බිරිඳගෙන් ජනපතිට ලිපියක්..

Jun 10, 2026 at 11:46 AM

|

Lanka Leader

රාජ්‍ය බුද්ධි සේවයේ හිටපු ප්‍රධානී, විශ්‍රාමික මේජර් ජනරාල් සුරේෂ් සලේ මහතාට එරෙහිව නිකුත් කර ඇති රැඳවුම් නියෝගය අවලංගු කරන ලෙස ඉල්ලා ඔහුගේ බිරිඳ වන මනෝරි සලේ මහත්මිය ජනාධිපති අනුර කුමාර දිසානායක මහතා වෙත විශේෂ සහ සංවේදී ලිපියක් යොමු කර තිබේ. 

සුරේෂ් සලේ මහත්මිය ජනාධිපතිවරයා වෙත යොමු කළ ලිපිය මඟින් ද එම චෝදනා සහ ඔහුගේ බරපතළ සෞඛ්‍ය තත්ත්වය තහවුරු කර ඇත.

සුරේෂ් සලේ මහත්මිය පවසන්නේ තම සැමියාගේ රැඳවුම් නියෝගය තවත් දින 90කින් දීර්ඝ කර ඇති බවයි. මැයි 20 වනදා මහේස්ත්‍රාත් අධිකරණය වෙත ඉදිරිපත් කරන ලද අධිකරණ වෛද්‍ය නිලධාරී (JMO) වාර්තාවට අනුව, සුරේෂ් සලේ මහතා රඳවා තබා ගැනීමේදී දරුණු ශාරීරික හා මානසික වධහිංසාවලට ලක්ව ඇති බවත්, ඔහු දැඩි මානසික ආතතියෙන් (PTSD) පෙළෙන අතර සියදිවි නසාගැනීමේ ඉහළ අවදානමක පසුවන බවත් තහවුරු වී තිබේ.

ජූනි 6 වනදා ඔහුව බැලීමට ගිය ඔහුගේ පුත්‍රයා සහ මස්සිනා වෙත සලේ මහතා ප්‍රකාශ කර ඇත්තේ, තමන්ට තවදුරටත් මෙම අමානුෂික වධහිංසා දරාගත නොහැකි බැවින් "ජීවිතය පූජා කිරීමේ උපවාසයක්" ආරම්භ කළ බවයි. එහිදී තම අවසන් කැමැති පත්‍රය සකස් කිරීමට නීතිඥයන් අමතන ලෙසත්, මියගිය පසු ඇස් දන් දීමට අවශ්‍ය බවත් ඔහු පුතාට පවසා ඇත. දීර්ඝකාලීන වධහිංසා සහ හුදෙකලා කිරීම හේතුවෙන් ඔහු මෙවැනි තීරණ ගන්නා තත්ත්වයට පත්ව ඇති බව බිරිඳ පවසන්නීය.

රෝගී තත්ත්වය දැඩි ලෙස අසාධ්‍ය වීමෙන් පසු ඔහුව කොළඹ ජාතික රෝහලට ඇතුළත් කර ඇති අතර, වෛද්‍යවරුන් පවසන්නේ ඔහුගේ රුධිරයේ සීනි මට්ටම බරපතළ ලෙස පහත වැටී ඇති බවයි. ආහාර නොගැනීම, නිදි වැරීම, නිසි වාතාශ්‍රයක් නොමැති කාමරයක රඳවා තැබීම සහ නියමිත ඖෂධ ලබා නොදීම නිසා ඔහුගේ අභ්‍යන්තර ඉන්ද්‍රියන් අකර්මණ්‍ය වීමේ සහ හෘදයාබාධයක් වැළඳීමේ දැඩි අවදානමක් පවතී.

තම සැමියා මෙම මාරාන්තික උපවාසය අත්හැරීමට නම් රජය පාර්ශවයෙන් පියවර තුනක් ගත යුතු බව ඇය ජනාධිපතිවරයාගෙන් ඉල්ලා සිටී. එනම්, ත්‍රස්තවාදය වැළැක්වීමේ පනත (PTA) අහෝසි කිරීමට හෝ සැකකරුවන්ගේ ආරක්ෂාව තහවුරු වන පරිදි සංශෝධනය කිරීමට රජය නිල වශයෙන් පොරොන්දු වීම, ඔහුව අපරාධ පරීක්ෂණ දෙපාර්තමේන්තු (CID) භාරයෙන් ඉවත් කර සාමාන්‍ය බන්ධනාගාර භාරයට පත් කිරීම සහ වත්මන් CID අධ්‍යක්ෂවරයා පෞද්ගලික වෛරයකින් ක්‍රියා කරන බැවින්, මෙම විමර්ශනය CID බලපෑමෙන් තොර වෙනත් පොලිස් අංශයකට පැවරීමයි.

තමන් මෙම ඉල්ලන්නේ තම සැමියාට විශේෂ සැලකිල්ලක් හෝ නීතියෙන් නිදහසක් නොවන බවත්, ඔහු වරදක් කරලා තියෙනවා නම් සාධාරණ අධිකරණ ක්‍රියාවලියකට මුහුණ දීලා දඬුවම් විඳින්න සූදානම් බවත් ඇය පවසන්නීය. නමුත් රජයේ අත්අඩංගුවේ ඉන්න පුරවැසියෙක්ව මේ විදිහට ශාරීරිකව සහ මානසිකව වට්ටලා මරණයට පත් නොකරන ලෙස මනෝරි සලේ මහත්මිය ආයාචනා කරයි.

දශක ගණනාවක් රට වෙනුවෙන් සේවය කළ නිලධාරියෙකු අධිකරණ තීන්දුවකින් නොව, බන්ධනාගාරය තුළ වධහිංසාවට ලක්ව මියගිය බවට ඉතිහාසගත වීමට ඉඩ නොදෙන ලෙසත්, දේශපාලන ඇසින් නොව මානුෂීය ඇසින් බලා වහාම මැදිහත් වන ලෙසත් ඇය ජනාධිපති අනුර කුමාර දිසානායක මහතාගෙන් ඉල්ලා සිටී.