සුරේෂ් සලේට අමානුෂික ලෙස සැලකීම ව්‍යවස්ථා විරෝධියි.. - එජාපයෙන් නිවේදනයක්

Jun 9, 2026 at 04:07 PM

|

Lanka Leader

රාජ්‍ය බුද්ධි අංශයේ හිටපු ප්‍රධානී මේජර් ජනරාල් සුරේෂ් සලේ අත්අඩංගුවට ගෙන රඳවා තබා ගැනීමේදී ඔහුට අමානුෂික අන්දමින් සලකා ඇති බව පවසමින් එක්සත් ජාතික පක්ෂය (එජාප) විශේෂ නිවේදනයක් නිකුත් කර තිබේ.

දැනට අසනීප තත්ත්වයෙන් කොළඹ ජාතික රෝහලට ඇතුළත් කර සිටින ඔහුගේ සෞඛ්‍ය තත්ත්වය කිසිසේත්ම යහපත් නොවන බව ඔහුගේ බිරිඳ සහ පුත්‍රයා ප්‍රසිද්ධියේ අනාවරණය කර ඇති බවයි එම පක්ෂය පෙන්වා දෙන්නේ.

හිටපු ජනාධිපතිවරුන් වන ගෝඨාභය රාජපක්ෂ සහ රනිල් වික්‍රමසිංහගේ පාලන සමයන්හිදී රාජ්‍ය බුද්ධි අංශ ප්‍රධානියා ලෙස රටට සේවය කළ සලේට එරෙහිව එවකට මෙවැනි චෝදනා එල්ල නොවූ බවත්, වත්මන් ගැටලුව වන්නේ ඔහුට එල්ල වී ඇති චෝදනා නොව, අත්අඩංගුවට ගත් පුද්ගලයෙකුට සලකන අමානුෂික ආකාරය බවත් නිවේදනයේ සඳහන්.

ආණ්ඩුක්‍රම ව්‍යවස්ථාව සහ ජාත්‍යන්තර සම්මුතීන් උල්ලංඝනය කිරීමක්

රෝහල්ගත කිරීමෙන් පසු ලැබෙන තොරතුරුවලට අනුව සුරේෂ් සලේට අතිශය අමානුෂික ලෙස සලකා වද හිංසා පමුණුවා ඇති බව පෙනී යන බවයි එජාපය පවසන්නේ.

ශ්‍රී ලංකා ආණ්ඩුක්‍රම ව්‍යවස්ථාවේ 11 වැනි වගන්තියට මුළුමනින්ම පටහැනි වීමක් බවයි එම පක්ෂය පෙන්වා දෙන්නේ.

එමෙන්ම 1966 සිවිල් හා දේශපාලන අයිතිවාසිකම් පිළිබඳ ජාත්‍යන්තර සම්මුතිය (ICCPR) බරපතළ ලෙස උල්ලංඝනය කිරීමක් බවත් ත්‍රස්තවාදය වැළැක්වීමේ පනතේ (PTA) 9(අ)(1) වගන්තිය සහ 1994 අංක 22 දරන වධහිංසා වැළැක්වීමේ සම්මුති පනත මඟින් සිරකරුවෙකුට ලබාදී ඇති ආරක්ෂාව අහිමි කිරීමක් බවත් එම ලිපියේ සඳහන්.

මෙම සිදුවීම දැනටමත් ජාත්‍යන්තරයේ අවධානයට ලක්ව ඇති බැවින්, සුරේෂ් සලේට සලකා ඇති ආකාරය පිළිබඳව වහාම පරීක්ෂා කර බැලීමට පාර්ලිමේන්තු මන්ත්‍රීවරුන්ගෙන් සමන්විත කණ්ඩායමක් යැවිය යුතු බවත් එක්සත් ජාතික පක්ෂය රජයෙන් ඉල්ලා සිටී.

මාලිමා රජය බුද්ධ ශාසනය පාලනය කිරීමේ දැවැන්ත උත්සාහයක යෙදී සිටින මොහොතක මේ ප්‍රවණතාවය බෞද්ධ භික්ෂූන් වහන්සේලාට එරෙහිවද ක්‍රියාත්මක වීමට පුළුවන් බවත් මෙම සියලු තත්ත්ව එක්සත් ජාතික පක්ෂයේ දැඩි අවධානයට ලක්ව ඇති බවත් එම ලිපියෙහි සඳහන්.

එක්සත් ජාතික පක්ෂය දැනුම් දෙන්නේ මේජර් ජනරාල් සුරේෂ් සලේට එරෙහිව ගන්නා හැම ක්‍රියා මාර්ගයක්ම ආණ්ඩුක්‍රම ව්‍යවස්ථාවට සහ ජාත්‍යන්තර සම්මුතියට අනුකූල විය යුතු බවයි.