කපිල චන්ද්‍රසේන මියගිය නිවසේ කාමරයෙන් කොළ පාට පටියක් සොයා ගනී..

Jun 2, 2026 at 04:42 PM

|

Lanka Leader

අබිරහස් ලෙස මියගිය ශ්‍රී ලංකන් ගුවන් සමාගමේ හිටපු ප්‍රධාන විධායක කපිල චන්ද්‍රසේන මියගිය නිවසේ කාමරයේ තිබී කොළ පාට පටියක් සොයා ගත් බව කොළඹ අපරාධ කොට්ඨාසය අද (2) කොටුව මහේස්ත්‍රාත් පසන් අමරසේන හමුවේ දැන්වීය.

එම පටිය රස පරීක්‍ෂක වෙත යැවීමට නියෝගයක් ලබා දෙන ලෙසද කොළඹ අපරාධ කොට්ඨාසය අද අධිකරණයෙන් ඉල්ලා සිටියේය.

සිද්ධියට අදාලව වැඩිදුර වර්තාවක් අධිකරණයට ඉදිරිපත් කරමින් කොළඹ අපරාධ කොට්ඨාශය සඳහන් කර සිටියේ රජයේ රස පරීක්ෂක සමඟ සිදු කරන ලද දුරකථන සංවාදයකදී මරණකරු ගෙලවැල දා ගැනීමට භාවිතා කළ පටියට සමාන පටියක් එම කාමරය තුළ තවත් තිබේදැයි විමර්ශනය කර රස පරීක්ෂක වෙත යොමු කරන ලෙස දන්වා තිබූ බවයි.

ඒ අනුව කොළඹ අපරාධ කොට්ඨාශය විසින් කපිල චන්ද්‍රසේන මියගිය කාමරයේ තිබී තවත් කොළ පාට පටියක් රස පරීක්ෂක වෙත යැවීමට අද දින අධිකරණයේ නියෝග ඉල්ලා සිටියේය.

තවද සිද්ධියට අදාලව වැඩිදුර වාර්තාවක් අධිකරණයට ඉදිරිපත් කරමින් කොළඹ අපරාධ කොට්ඨාශය සඳහන් කර සිටියේ මෙම මරණය සිදු වූ නිවසේ සීසීටීවී පිවිසුම් හතරක් ඔස්සේ මේ වන විටත් විමර්ශනය කර ඇති බවයි.

එම සීසීටීවී දර්ශන අනුව කිසිදු සැකකටයුතු කෙනෙක් අනාවරණය නොවන බවද කොළඹ අපරාධ කොට්ඨාසය අධිකරණයට දැන්වුවේය.

එම අවස්ථාවේදී මහේස්ත්‍රාත්වරයා සඳහන් කර සිටියේ කපලි චන්ද්‍රසේනගේ ජංගම දුරකථනය සම්බන්ධයෙන් මේ වන විට කුමන විමර්ශනයක් සිදු කරන්නේද යන්නයි.

එහිදී කොළඹ අපරාධ කොට්ඨාශය සඳහන් කර සිටියේ අධිකරණ අමාත්‍යංශයේ සහකාර ලේකම්ට මෙම ජංගම දුරකථන සම්බන්ධයෙන් ලිපියක් මඟින් දැනුම් දී ඇති බවයි.

තවද FBI ආයතනය හරහා ඇමරිකාවේ ඇපල් සමාගමට මෙම ජංගම දුරකථනය යොමු කිරීමට කටයුතු කරමින් පවතින බවද විමර්ශන නිලධාරියා අධිකරණයට කරුණු දැක්වූවේය.

සිද්ධියට අදාල නඩුව ලබන 5 කැඳවීමට නියමිතය. එදිනට වැඩිදුර සාක්ෂි විභාග පැවැත්වීමට නියමිතය.