ඩීසල් සහ පෙට්‍රල් මිල ඉහළ යෑමට හේතුව චන්න ජයසුමන හෙළිකරයි..

Jun 1, 2026 at 12:55 PM

|

Lanka Leader

ඩීසල් සහ පෙට්‍රල් මිල ඉහළ යෑමට හේතුව ඇමරිකා එක්සත් ජනපදය සහ ඉරානය අතර  පවතින යුධ ගැටුම් යැයි ආණ්ඩුවේ නියෝජිතයේ පැවසුවද, අන් සියලු රටවලට වඩා ලංකාවේ ඩීසල් සහ පෙට්‍රල් මිල ප්‍රතිශතයක් වශයෙන් ඉහළ යෑමට හේතුව එම යුද්ධය නොවන බව හිටපු පාර්ලිමේන්තු මන්ත්‍රී ආචාර්ය චන්න ජයසුමන මහතා පවසයි.

සිය මුහුණු පොතේ සටහනක් තබමින් ඒ මහතා පවසන්නේ දුර්වල ආර්ථික කළමනාකරණය, අවිචාරවත් ලෙස වැඩි මිලට මිලදී ගැනීම, වංචාව, බාල ගල් අඟුරුවලින් සිදුවූ පාඩුව ඩීසල් සහ පෙට්‍රල්වලින් ආවරණය කර ගැනීම, බදු ඉහල නැංවීම යන කරුණු මෙයට හේතු විය හැකි බවයි.

ඒ  මහතා මුහුණුපොතේ තබා ඇති සටහන පහළින්..

ඩීසල් සහ පෙට්‍රල් මිල ඉහළ යෑමට හේතුව ඇමරිකා එක්සත් ජනපදය සහ ඉරානය අතර  පවතින යුධ ගැටුම් බව ආණ්ඩුව සහ එහි නියෝජිතයෝ පුනරැච්ඡාරණය කරති. අපගේ හිත මිතුරන් බොහෝ දෙනෙකු ද එය එසේම යැයි සිතා සිටින බව පෙනේ.

මෙහි දැක්වෙන්නේ ඇමරිකා එක්සත් ජනපදය ඉරානයට පහර දීම ඇරඹූ 2026 පෙබරවාරි මස 28  සිට ඊයේ (2026 මැයි 31) දක්වා ගෙවී ගිය මාස 3 කාලය තුළ දකුණු සහ අග්නිදිග ආසියාතික රටවල සහ ඈත පෙරදිග රටවල ඩීසල් සහ පෙට්‍රල් මිල  ඉහළ ගිය ප්‍රතිශතයි.

අන් සියලු රටවලට වඩා ලංකාවේ ඩීසල් සහ පෙට්‍රල් මිල ප්‍රතිශතයක් වශයෙන් ඉහළ යෑමට හේතුව ඇමරිකා-ඉරාන යුද්ධය විය නොහැකි ය.  දුර්වල ආර්ථික කළමනාකරණය, අවිචාරවත් ලෙස වැඩි මිලට මිලදී ගැනීම, වංචාව, බාල ගල් අඟුරුවලින් සිදුවූ පාඩුව ඩීසල් සහ පෙට්‍රල්වලින් ආවරණය කර ගැනීම, බදු ඉහල නැංවීම හෝ මෙහි නොකියැවෙන වෙනත් කරුණක් හෝ ඊට හේතු විය හැකිය.  

අවාසනාවකට අනුර කුමාර දිසානායක මැතිතුමා අද විපක්ෂයේ නොසිටින නිසා ඒ කරුණු මොනවාදැයි නිශ්චිත වශයෙන්ම ප්‍රකාශ කිරීමට සමතෙක්  අද මෙරට විපක්ෂයේ සිටින බවක් නොපෙනේ.