ශ‍්‍රී ලංකාව අපේ ඇතැම් නිර්ණායක සපුරා නෑ.. ආර්ථික වර්ධන වේගය 3%ට බහිනවා..- IMF කියයි

May 29, 2026 at 05:12 AM

|

Lanka Leader

පවතින දැඩි අභියෝගාත්මක තත්ත්වයන් මධ්‍යයේ වුවද, ජාත්‍යන්තර මූල්‍ය අරමුදල මඟින් ලබාදුන් විස්තීර්ණ අරමුදල් පහසුකම යටතේ වන ආර්ථික ප්‍රතිසංස්කරණ වැඩසටහන ශ්‍රී ලංකාව විසින් ශක්තිමත් ලෙස ක්‍රියාත්මක කරමින් සිටින බව එම අරමුදල සඳහන් කරයි.

ශ්‍රී ලංකාවේ ආර්ථික ප්‍රතිසංස්කරණ වැඩසටහනට අදාළ පස්වන සහ හයවන සමාලෝචන ඒකාබද්ධව සාර්ථකව නිම කිරීමෙන් පසුව ජාත්‍යන්තර මූල්‍ය අරමුදල විසින් නිකුත් කරන ලද නවතම වාර්තාවක මේ බව දක්වා ඇත.

කෙසේ වුවද, වත්මන් ගෝලීය දේශපාලනික තත්ත්වයන් ශ්‍රී ලංකාවේ ඉදිරි ආර්ථික ගමන කෙරෙහි සෘණාත්මක බලපෑම් එල්ල කරමින් පවතින බවද එහි පෙන්වා දී තිබේ.

විශේෂයෙන්ම වර්තමානයේ පවතින මැද පෙරදිග යුධමය තත්ත්වය හේතුවෙන් ශ්‍රී ලංකාවේ ඉදිරි ආර්ථික දැක්මට සහ සාර්ව ආර්ථික ස්ථාවරත්වයට සැලකිය යුතු මට්ටමේ දැඩි අවධානමක් මෙන්ම අහිතකර බලපෑම් එල්ල වී ඇති බව ජාත්‍යන්තර මූල්‍ය අරමුදල අවධාරණය කරයි.

මෙම යුධමය වාතාවරණය හේතුවෙන් ලෝක වෙළඳපොළේ තෙල් මිල ඉහළ යාම, උද්ධමනය ඉහළ යාමට සහ මෙරට ජංගම ගිණුමේ ශේෂය දුර්වල වීමට හේතු විය හැකි බව එම අරමුදලේ මතයයි.

මීට අමතරව මැද පෙරදිග අර්බුදය නිසා සංචාරක කර්මාන්තයෙන් ලැබෙන ආදායම් පහත වැටීමද ආර්ථිකයට තවදුරටත් බලපෑම් එල්ල කරන බව පෙන්වා දී ඇත.

එමෙන්ම ජාත්‍යන්තර මූල්‍ය අරමුදල සමඟ ඇති කරගත් එකඟතාවලට අනුව, විදේශ ගෙවීම් හිඟය පියවා ගැනීම සඳහා වන ක්‍රියාමාර්ග සහ ආනයන සීමා කිරීම්වලට අදාළ අඛණ්ඩ නිර්ණායකයන් ශ්‍රී ලංකාව විසින් සම්පූර්ණයෙන්ම සපුරා නොමැති බවද එම නිවේදනයේ සඳහන් වේ.

නව බාහිර ගෙවීම් හිඟයන් ඇති නොකර ගැනීම සහ ආනයන සීමාවන් තවදුරටත් දැඩි නොකිරීම වැනි අඛණ්ඩ නිර්ණායකයන් මෙලෙස නිසි පරිදි නිරීක්ෂණය වී නොමැති බව අරමුදල පවසයි.

මේ හේතුවෙන් විදේශීය සංචිත ශක්තිමත් කර ගැනීම සඳහා නම්‍යශීලී විනිමය අනුපාතික ක්‍රමවේදයක් පවත්වා ගැනීම සහ ගෙවුම් ශේෂ පියවීමේ පියවරයන් ක්‍රමයෙන් ඉවත් කිරීම තීරණාත්මක වන බව ඔවුන් පෙන්වා දෙයි.

මෙම බාහිර කම්පන සහ අභියෝගාත්මක තත්ත්වයන් හේතුවෙන් මේ වසරේ ශ්‍රී ලංකාවේ ආර්ථික වර්ධන වේගය සියයට 3 ක් දක්වා මන්දගාමී වනු ඇති බවට ජාත්‍යන්තර මූල්‍ය අරමුදල මෙහිදී පුරෝකථනය කර තිබේ.

කෙසේ වුවද, පසුගිය කාලසීමාව තුළ ක්‍රියාත්මක කරන ලද දැඩි ආර්ථික ප්‍රතිසංස්කරණ නිසා මෙරට ආර්ථිකයේ ඔරොත්තු දීමේ හැකියාව වර්ධනය වී ඇති බවත්, එමඟින් පීඩාවට පත් වූ ජනතාව රැකගැනීම සඳහා සහන සැලසීමට රජයට අවස්ථාව ලැබී ඇති බවත් ජාත්‍යන්තර මූල්‍ය අරමුදල වැඩිදුරටත් ප්‍රකාශ කර සිටියි.