මත්තල පෞද්ගලික අංශයට..

May 12, 2026 at 04:48 AM

|

Lanka Leader

වසරකට රුපියල් බිලියන 3 ක පමණ දැවැන්ත පාඩුවක් ලබමින් පවතින මත්තල රාජපක්ෂ ජාත්‍යන්තර ගුවන් තොටුපළ වාණිජමය වශයෙන් ලාභ ලබන මධ්‍යස්ථානයක් බවට පත් කිරීම සඳහා ශ්‍රී ලංකා රජය නව උපායමාර්ගික සැලසුමක් ප්‍රකාශයට පත් කර තිබේ.

ඒ අනුව වරාය, නාවික සහ ගුවන් සේවා අමාත්‍යාංශය මගින් මේ සඳහා, ආයෝජකයන්ගෙන් අභිලාෂ කැඳවීමේ (EOI – Expression of Interest) ක්‍රියාවලියක් ආරම්භ කර ඇති අතර, එමගින් දේශීය මෙන්ම විදේශීය ආයෝජකයින්ට මත්තල ගුවන් තොටුපළ සංවර්ධනය කිරීම සඳහා එක්වීමට අවස්ථාව හිමිවනු ඇත.

මෙම නව ආයෝජන අවස්ථාව යටතේ අක්කර 600ක පමණ භූමි ප්‍රමාණයක විහිදී ඇති ගුවන් තොටුපළ පරිශ්‍රය තුළ විවිධ අංශ රැසක් සංවර්ධනය කිරීමට රජය සැලසුම් කර ඇත.

ඒ අනුව ගුවන් යානා මෙහෙයුම් කටයුතු, භාණ්ඩ ප්‍රවාහන සහ සැපයුම් මධ්‍යස්ථාන, ගුවන් යානා නඩත්තු හා අලුත්වැඩියා ඒකක මෙන්ම ගුවන් යානා කොටස් නිෂ්පාදන කලාප ද මෙහි අලුතින් ස්ථාපිත කිරීමට නියමිතය.

මීට අමතරව සංචාරක හෝටල්, නිවාඩු නිකේතන සහ සූර්ය බලශක්ති උද්‍යාන වැනි බලශක්ති ව්‍යාපෘති සඳහා ද මෙහිදී ප්‍රමුඛතාවයක් ලබා දීමට බලධාරීන් තීරණය කර තිබේ.

මත්තල ගුවන් තොටුපළ පුද්ගලික අංශය සමග ඒකාබද්ධව හෝ පෞද්ගලීකරණය කර නව ජීවයක් ලබා දීමේ අරමුණින් ක්‍රියාත්මක වන මෙම ව්‍යාපෘතිය සඳහා වන යෝජනා කැඳවීම 2026 අප්‍රේල් 27 දින ආරම්භ වූ අතර එය ජුනි මස මුල් සතිය දක්වා ක්‍රියාත්මක වනු ඇත.

අදාළ ලියකියවිලි ජුනි මස 8 වැනිදා දක්වා ලබා ගත හැකි අතර, නියමිත දිනට පෙර සියලු යෝජනා ශ්‍රී ලංකා ගුවන් තොටුපළ හා ගුවන් සේවා සමාගම වෙත ඉදිරිපත් කළ යුතුය.

- සිරිමන්ත රත්නසේකර

Divaina