තායිලන්තයෙන් මත්ද්‍රව්‍ය ගෙනා භික්‍ෂුන් 22 මෙහෙයවා ඇත්තේ මාලිමාවේ ප්‍රබල ක්‍රියාකාරී භික්‍ෂුවක්.. - පූජ්‍ය අක්මීමන දයාරත්න හිමි

May 4, 2026 at 11:55 AM

|

Lanka Leader

පසුගිය අප්‍රේල් 26 වනදා තායිලන්තයේ සිට මෙරටට මත්ද්‍රව්‍ය තොගයක් රැගෙන ඒමේ සිද්ධිය සම්බන්ධයෙන් අත්අඩංගුවට ගෙන දැනට රක්ෂිත බන්ධනාගාර ගත කර සිටින භික්ෂූන් වහන්සේලා විසි නම මෙහෙයවා ඇත්තේ ජාතික ජන බලවේගයේ (මාලිමාවේ) ප්‍රබල ක්‍රියාකාරී භික්ෂුවක් බව සිංහල රාවය සංවිධානය පවසයි. 

කොළඹදී පැවැති මාධ්‍ය හමුවකදී එම සංවිධානයේ සභාපති පූජ්‍ය අක්මීමන දයාරත්න හිමියන් සඳහන් කළේ මෙම මත්ද්‍රව්‍ය ජාවාරමේ ප්‍රධාන මෙහෙයවීම් කටයුතු සිදු කර ඇති අමිතානන්ද නැමැති හිමිනම පසුගිය මැතිවරණ සමයේ ජාතික ජන බලවේගය වෙනුවෙන් නිවෙස් වලට ගොස් ඡන්දය ඉල්ලූ අයෙකු බවයි.

මෙම සිද්ධිය සම්බන්ධයෙන් වැඩිදුරටත් අදහස් දැක්වූ උන්වහන්සේ කියා සිටියේ, අදාළ භික්ෂුව මීට පෙර අරගල භූමියේද සක්‍රීයව කටයුතු කර ඇති බවත්, වර්තමාන ආණ්ඩුව බලයට පත් කිරීම සඳහා විශාල දායකත්වයක් ලබා දී ඇති බවත්ය. 

එමෙන්ම දැනට අත්අඩංගුවේ පසුවන භික්ෂූන් විසි නමගෙන් බහුතරයක් ජාතික ජන බලවේගයට සෘජුව සහාය පළ කළ අය බවද මෙහිදී අනාවරණය විය.

මෙම මත්ද්‍රව්‍ය ජාවාරම පිටුපස ඇති දේශපාලන සම්බන්ධය පිළිබඳව අවධාරණය කළ අක්මීමන දයාරත්න හිමියන් පෙන්වා දුන්නේ, මත්ද්‍රව්‍ය මෙහෙයවීම් කළ භික්ෂූන් මෙන්ම සමාජ මාධ්‍ය ඔස්සේ සමස්ත භික්ෂු ප්‍රජාවටම අපහාස කරන පිරිස්ද ජාතික ජන බලවේගය නියෝජනය කරන අය බවයි. 

මෙය බුද්ධ ශාසනය විනාශ කිරීමේ සහ සමාජය තුළ අනාගමික සංකල්පයක් ව්‍යාප්ත කිරීමේ සංවිධානාත්මක උත්සාහයක කොටසක් බවට උන්වහන්සේ චෝදනා කරති.

සම්බුද්ධ ශාසනයට සිදුවන මෙම හානිය වළක්වා ගැනීම සඳහා මහානායක හිමිවරුන් වහා මැදිහත් විය යුතු බව සිංහල රාවය සංවිධානය අවධාරණය කරයි. 

විශේෂයෙන්ම, භික්ෂූන් වහන්සේලා සම්බන්ධ ගැටලු විසඳීම සඳහා ආණ්ඩුක්‍රම ව්‍යවස්ථාවෙන්ම බලය ඇති නීත්‍යානුකූල සංඝාධිකරණයක් වහාම ස්ථාපිත කරන ලෙස උන්වහන්සේලා රජයෙන් ඉල්ලා සිටිති. 

එවැනි අධිකරණයක් මගින් වැරදි කරන පුද්ගලයන්ගේ සිවුරු ගලවා රටේ නීතියට භාර දීමට මහානායක හිමිවරුන්ට බලය ලැබිය යුතු බව පූජ්‍ය අක්මීමන දයාරත්න හිමියෝ වැඩිදුරටත් ප්‍රකාශ කළහ