අභිරහස් ලෙස මියගිය නිලධාරියා භාණ්ඩාගාර කොල්ලයේ පළමු පැමිණිලිකරුයි.. වැඩ තහනමට ලක්වූ තවත් නිලධාරියෙක් දැඩි පීඩනයක... - රජිත් කීර්ති තෙන්නකෝන් හෙළිකරයි

May 1, 2026 at 11:29 AM

|

Lanka Leader

භාණ්ඩාගාර මුදල් වංචාව සම්බන්ධයෙන් විධිමත් විමර්ශන නිලධාරීන්ට පළමු පැමිණිල්ල ඉදිරිපත් කළ, විදේශ සම්පත් දෙපාර්තමේන්තුවේ සහකාර අධ්‍යක්ෂවරයකු වූ රංග නිශාන්ත මහතාගේ මරණය අතිශය අභිරහස් බවත්, ඒ සම්බන්ධයෙන් භාණ්ඩාගාර ලේකම්වරයා වගකිව යුතු බවත් හිටපු ආණ්ඩුකාර රජිත් කීර්ති තෙන්නකෝන් මහතා පවසයි.

හිරු රූපවාහිනී නාලිකාවේ පැවැති සාකච්ඡාවකට එක්වෙමින් ඒ මහතා අවධාරණය කළේ, මෙම මංකොල්ලය සම්බන්ධ ඊමේල් පණිවිඩය කියවා ඒ පිළිබඳව ඉහළ නිලධාරීන් දැනුවත් කරමින් විමර්ශන සඳහා මුල් වූයේ මියගිය රංග නිශාන්ත මහතා බවයි.

ශ්‍රී ජයවර්ධනපුර විශ්වවිද්‍යාලයේ ආදි ශිෂ්‍යයකු වන ඔහු, ඉතා අවංක සහ හොරකම් නොකරන නිලධාරියෙකු ලෙස ඔහුගේ සමීපතමයින් හඳුන්වන බවද තෙන්නකෝන් මහතා මෙහිදී සඳහන් කළේය,.

මෙම සිදුවීමෙන් පසු පත් කළ කමිටු වාර්තාව මගින් අදාළ නිලධාරීන් හතර දෙනෙකුට අභ්‍යන්තර ස්ථාන මාරුවීම් ලබා දීමට නිර්දේශ කර තිබුණද, භාණ්ඩාගාරය විසින් එම නිර්දේශ පසෙකලා ඔවුන්ගේ වැඩ තහනම් කිරීමට පියවර ගෙන ඇති බව හෙළි විය.

සාමාන්‍ය රාජ්‍ය පරිපාලන රෙගුලාසි හා ස්වභාවික යුක්ති ධර්මය අනුව මූලික විමර්ශනයක් පැවැත්වීමකින් තොරව මෙලෙස වැඩ තහනම් කිරීම බරපතළ ගැටලුවක් බව තෙන්නකෝන් මහතා පෙන්වා දෙයි.

අදාළ නිලධාරීන්ට තමන්ගේ පාර්ශවය ඉදිරිපත් කිරීමට හෝ අවස්ථාවක් ලබා නොදී ඔවුන් සේවයෙන් ඉවත් කර ඇති බවත්, ඉන් අනතුරුව ඔවුන් දැඩි මානසික පීඩනයකට ලක්ව සිටි බවත් ඔහු ප්‍රකාශ කළේය.

මියගිය රංග නිශාන්ත මහතා මෙන්ම මේ වන විට වැඩ තහනමට ලක්ව සිටින තවත් එක් නිලධාරියෙකු මෙ හා සමානම දැඩි මානසික පීඩනයකින් පසුවන බවට තොරතුරු ලැබී ඇතැයි හිටපු ආණ්ඩුකාරවරයා අනතුරු ඇඟවීය. කටවචනයට නියෝග දෙන ලේකම්වරුන් යටතේ රාජ්‍ය නිලධාරීන් අසරණ නොවිය යුතු බවත්, රංග නිශාන්තගේ අභිරහස් මරණයට වගකීම භාණ්ඩාගාර ලේකම්වරයා භාරගත යුතු බවත් ඔහු වැඩිදුරටත් කියා සිටියේය