භාණ්ඩාගාර වංචාව හිතුවට වඩා දරුණු හොරකමක්.. ගෙවීම් දහයක් කරලා..

May 1, 2026 at 05:35 AM

|

Lanka Leader

රජයේ භාණ්ඩාගාරයට අයත් ඩොලර් මිලියන 2.5ක මුදලක් අස්ථානගත වීම සම්බන්ධයෙන් සිදුකළ මූලික විමර්ශනවලදී අතිශය බරපතළ තොරතුරු රැසක් අනාවරණය වී ඇතැයි රාජ්‍ය මුදල් කාරක සභාවේ සභාපති, පාර්ලිමේන්තු මන්ත්‍රී ආචාර්ය හර්ෂ ද සිල්වා මහතා පවසයි.

මුදල් අමාත්‍යාංශයේ ලේකම්වරයා ඇතුළු ජ්‍යෙෂ්ඨ නිලධාරීන් සහ මහ බැංකුවේ ජ්‍යෙෂ්ඨ නිලධාරීන් කැඳවා පැය තුනකට අධික කාලයක් සිදුකළ දීර්ඝ ප්‍රශ්න කිරීම් හමුවේ මෙම තොරතුරු අනාවරණය වී තිබේ.

එහිදී හෙළි වී ඇති වැදගත්ම කරුණක් වන්නේ පසුගිය නොවැම්බර් මාසය සහ ජනවාරි මාසය අතර කාලය තුළ කිසිදු සොයා බැලීමකින් හෝ විමර්ශනයකින් තොරව අවස්ථා 10කදී මෙම මුදල් ප්‍රශ්නගත ගිණුමට බැර කර ඇති බවයි.

මෙම ගෙවීම් දහයෙන් එකක්වත් අදාළ පාර්ශවයට ලැබී නොමැති බවත්, ඒ සියල්ල වංචාවකට ලක්ව ඇති බවත් රජය සෘජුවම දැනගෙන ඇත්තේ මාර්තු මාසයේදීය.

මෙම ගෙවීම් සම්බන්ධයෙන් මුලින්ම "රතු කොඩි" එසවී ඇත්තේ ජනවාරි මාසයේදී වුවද, ඉන් පසුවද ක්‍රියාමාර්ග ගැනීමේ ප්‍රමුඛතාවය පිළිබඳ ගැටලු මතු වී තිබේ.

විශේෂයෙන්ම ඕස්ට්‍රේලියාවෙන් දැනුම් දෙන තෙක් මෙම ගෙවීම් අදාළ පාර්ශවයට ලැබී නැති බව මෙරට බලධාරීන් දැන නොසිටීම බරපතළ ගැටලුවක් බව සභාපතිවරයා පෙන්වා දුන්නේය.

මේ සම්බන්ධයෙන් අදහස් දැක්වූ හර්ෂ ද සිල්වා මහතා,

"මුදල් ලේකම් මුදල් කාරක සභාවට පැමිණීමට නොහැකි බව ඊයේ (29) දැන්වීමට අපගේ විරෝධය ප්‍රකාශ කිරීමෙන් පසුව අද (30) මුදල් ලේකම්වරයා සහ මුදල් අමාත්‍යංශයේ ජ්‍යෙෂ්ඨ නිළධාරීන් මුදල් කාරක සභාවට පැමිණියා. 

එහිදී අනාවරණය වුණේ මේ ඩොලර් මිලියන 2.5 සම්බන්ධයෙන් දැවැන්ත හොරකමක් සිදුව ති⁣⁣බෙන බවයි. අවස්ථා දහයකදී මෙම ගෙවීම කර තිබෙන බව මෙහිදී වැඩිදුරටත් හෙළිවුණා. මේ සම්බන්ධයෙන් මාසයක් ඇතුළත සවිස්තරාත්මක වාර්තාවක් දෙන්නැයි කාරක සභාව ලෙස අපි නිර්දේශ කළා."