රුසියාවෙන් ලබාදෙන බොරතෙල් ලබාගන්නා ලෙස ආණ්ඩුවට බල කරමින් දෙවන පරපුර දේශපාලන ව්‍යාපාරය උද්ඝෝෂණයක..

Apr 30, 2026 at 05:50 PM

|

Lanka Leader

පසුගිය දින කොළඹ කොටුව දුම්රිය පොල  ඉදිරිපස දෙවන පරපුර දේශපාලන ව්‍යාපාරය විසින් වර්තමානයේ පවතින බලශක්තිය අර්බුදයට විසඳුමක් ලෙස රුසියාවෙන් ලබාදුන් බොරතෙල් ලබාගන්නා ලෙස බල කරමින් උද්ඝෝෂණයක් සංවිධානය කර තිබිණි.

ඒ අතරතුරම එම සංවිධානය විසින් රුසියාවටත් පූටින් ජනාධිපතිවරයාටත් ශ්‍රී ලංකාවේ රුසියානු තානාපතිතුමන්ටත්, ලංකාවට උදව් කිරීමට ඉදිරිපත් වීම සම්බන්ධයෙන් රුසියානු ධජත් රැගෙන රුසියානු රජයට ස්තුතිය පළ කිරීම ද එහිදී සිදුකරන ලදී. 

එහිදී අදහස් දැක්වූ දෙවන පරපුර පක්ෂයේ නායක උවිඳු විජේවීර කියා සිටියේ වමේ සුවඳ තිබෙන ආණ්ඩුවක් ලෙස වර්තමාන ජනාධිපතිවරයා පත්වී කෙටි කාලයක් ඇතුළත රුසියානු රජයේ ඉහළම නියෝජිතයන් දෙදෙනෙක් මෙරටට පැමිණි අතර එහිදී ඉතාම අඩු සහ සහන මිලට රුසියානු බොරතෙල් ලබා ගැනීමේ ඉතා ඉහළ අවකාශයක් නිර්මාණය වී ඇති බවයි. 

නමුත් මෙම වර්තමාන ආණ්ඩුව එය මඟහරිමින් කල්හරිමින් රටේ ජනතාවට දැවැන්ත සහන් ප්‍රමාණයක් ලබාදිය හැකි මෙම සහන ලබා නොගෙන, එක අතකින් රුසියානු රජයත් මිත්‍රශීලීත්වයෙන් දුරස් කරගෙන අනිත් පසින් මේ රටේ ජනතාවට දෙන්න පුළුවන් සහන සියල්ල වළක්වමින් සිටින්නේ මන්දැයි විමසන ලදී. 

එහිදී ඔහු කියා සිටියේ ඇමෙරිකාවේ හෝ ඉන්දියාවට යටත් වී, එසේත් නැමැති නම් පැරනි ආණ්ඩුවල පවුල් සංස්ථාවන්ගෙන ගිය බලශක්ති මාෆියාවට මේ වර්තමාන ආණ්ඩුව එකඟවී හෝ යටත් වී ඇති බව පෙනෙන බවයි. 

එසේ නොමැතිනම් කුමන තත්ත්වයක් යටතේ ද මෙම රුසියානු බොරතෙල් ප්‍රතික්ෂේප කරමින් ජනතාවට සහන ලබා නොදෙමින් කල් මරමින් සිටින්නේ මන්දැයි ඔහු තවදුරටත් ප්‍රශ්න කර සිටින ලදී. 

මෙහිදී පැරණි ජවිපෙ ආකර්ෂණීය සටන් පාඨ ද මේ උද්ඝෝෂණය පුරාම දකින්නට ලැබිණි.