කොපමණ කලක සිට භාණ්ඩාර මුදල් හැකරුන් සොරාගෙන ඇත්දැයි හොයනවා..- ඩිජිටල් නි. ඇමති

Apr 25, 2026 at 04:36 PM

|

Lanka Leader

ඩිජිටල්කරණ ක්‍රියාවලියේදී සයිබර් ප්‍රහාර එල්ල වීම සාමාන්‍ය ලක්ෂණයක් වුවද, මෑතකදී වාර්තා වූ මූල්‍ය වංචාව කොපමණ කාලයක සිට සිදුවූවක්ද යන්න පිළිබඳව දැනට සිදු කෙරෙන පරීක්ෂණවලින් සම්පූර්ණ විස්තරයක් අනාවරණය කරගත හැකි වනු ඇති බව ඩිජිටල් ආර්ථික නියෝජ්‍ය අමාත්‍ය එරංග වීරරත්න මහතා පවසයි.

මෙම සිද්ධිය සම්බන්ධයෙන් අපරාධ පරීක්ෂණ දෙපාර්තමේන්තුව, ශ්‍රී ලංකා පරිගණක හදිසි ප්‍රතිචාර සංසදය (SLCERT) සහ මහ බැංකුවේ මූල්‍ය බුද්ධි ඒකකය (FIU) එක්ව පුළුල් විමර්ශනයක් ආරම්භ කර ඇති බව අමාත්‍යවරයා සඳහන් කළේය. 

මෙම පරීක්ෂණවල ප්‍රතිඵලයක් ලෙස සිද්ධියට කිසිවකු සම්බන්ධ දැයි සහ එය ක්‍රියාත්මක වූ ආකාරය පිළිබඳව ඉදිරියේදී නිවැරදිව දැනගත හැකි වනු ඇත.

අමාත්‍යවරයා වැඩිදුරටත් පෙන්වා දුන්නේ මෙය සෘජුවම ඩිජිටල් පද්ධතියක් හැක් කිරීමට වඩා, ජාත්‍යන්තර සමාගමකට අනුරූපී වන පරිදි සමාන ඩොමේන් නාමයක් සහ ඊමේල් ලිපින භාවිතා කරමින් සිදුකළ නොමඟ යැවීමක් බවයි. 

අදාළ ආයතනයේ නිලධාරීන් එම වෙනස හඳුනා නොගැනීම හේතුවෙන් මෙම ගැටලුව හටගෙන ඇති බවට විශ්වාස කරන බවත්, මෙයට ආයතනය තුළ පුද්ගලයන්ගේ සම්බන්ධයක් තිබේද යන්න පරීක්ෂණවලින් තහවුරු විය යුතු බවත් ඔහු පැවසීය.

මෙම මුදල් බැංකු පද්ධතිය හරහා හුවමාරු වී ඇති බැවින් මුදල් බැර වූ ස්ථානය පිළිබඳව නිවැරදි ඩිජිටල් සලකුණු පවතින බවත්, ජාත්‍යන්තර නීතිය ක්‍රියාත්මක කරන ආයතන සමඟ එක්ව එම මුදල් නැවත ලබා ගැනීමට කටයුතු කරන බවත් අමාත්‍යවරයා අවධාරණය කළේය.

මෙවැනි තත්ත්වයන් වැළැක්වීම සඳහා රජයේ ඩිජිටල් පද්ධති පැය 24 පුරාම නිරීක්ෂණය කෙරෙන ජාතික ආරක්ෂක මෙහෙයුම් මධ්‍යස්ථානයක් ස්ථාපිත කර ඇති බවත්, දැනට ආයතන 12ක් ඒ හා සම්බන්ධ කර ඇති බවත් ඔහු සඳහන් කළේය.