මුදල් අමාත්‍යංශ ලේකම් වහා අත්අඩංගුවට ගන්න - මෛත්‍රී ගුණරත්න

Apr 25, 2026 at 05:47 AM

|

Lanka Leader

මහා බැංකුවේ සිදුව ඇතැයි කියන මූල්‍ය අක්‍රමිකතා සම්බන්ධයෙන් වත්මන් මුදල් හා භාණ්ඩාගාර ලේකම් හර්ෂණ සූරියප්පෙරුම මහතා වහාම අත්අඩංගුවට ගෙන අධිකරණයට ඉදිරිපත් කළ යුතු බව නීතීඥ මෛත‍්‍රී ගුණරත්න මහතා අවධාරණය කරයි. 

මෙම මූල්‍ය වංචාව සම්බන්ධයෙන් විධිමත් විමර්ශනයක් ආරම්භ කළ යුත්තේ ඔහුව ප්‍රධාන සැකකරු ලෙස නම් කිරීමෙන් පසුව බව ද ඒ මහතා පවසා සිටියි.

භාණ්ඩාගාර ලේකම්වරයාගේ හෝ අදාළ උසස් නිලධාරීන්ගේ අනුමැතියකින් තොරව ඩොලර් මිලියන 2.5ක් වැනි අතිවිශාල මුදලක් භාණ්ඩාගාරයෙන් බැහැර වීමට කිසිසේත්ම නොහැකි බව ගුණරත්න මහතා පෙන්වා දෙයි. රජයේ සාමාන්‍ය දෙපාර්තමේන්තුවක හෝ උසාවියක රුපියල් 25,000ක මුදලක් හෝ රෙජිස්ට්‍රාර්වරයාගේ අනුමැතියකින් තොරව ලබාගත නොහැකි පසුබිමක, මෙවැනි මහා පරිමාණ මුදල් හුවමාරුවක් ලේකම්වරයා නොදැනුවත්ව සිදුවිය නොහැකි බව ඔහු තර්ක කරයි.

මෙම මුදල් අස්ථානගත වීම හැකර්වරුන් විසින් සිදු කරන ලද්දක් බවට ඉදිරිපත් වන තර්ක ප්‍රතික්ෂේප කරන මෛත‍්‍රී ගුණරත්න මහතා, එවැනි හැකර්වරුන් ලංකාව තුළ නොසිටින බවත්, ඔවුන් විදේශගතව සිට මුදල් ලබාගත් පසු ඒවා යළි ලබා ගැනීම කළ නොහැක්කක් බවත් සඳහන් කරයි. මෙය හුදෙක් සැබෑ වංචාව වසා ගැනීමට උත්සාහ කරන කරුණක් බව ඔහු පවසයි.

සාමාන්‍ය පුරවැසියෙකුට රුපියල් දෙදහසක ඇප මුදලක් ගෙවා ගැනීමට පවා දින ගණනාවක් රිමාන්ඩ් බන්ධනාගාරයේ සිටීමට සිදුවන නීතිමය පද්ධතියක් පවතින රටක, මහජන මුදල් අවභාවිත කරන මෙවැනි නිලධාරීන්ට එරෙහිව නීතිය ක්‍රියාත්මක නොවීම බරපතල අසාධාරණයක් බව ඔහු පෙන්වා දෙයි. 

රජයේ සාමාන්‍ය නිලධාරීන්ට වඩා තෙගුණයක වැටුපක් ලබන මෙම නිලධාරීන් මෙවැනි දූෂණවලට සම්බන්ධ වීම ජනතාවට කරන ද්‍රෝහිකමක් බව ද ඔහු වැඩිදුරටත් කියා සිටියි.

සී.අයි.ඩී එක ඇතුළු විමර්ශන ආයතන අඩපණ කර ඇති බවත්, මීට සම්බන්ධ කැබිනට් මණ්ඩලයේ පිරිස් ආරක්ෂා කිරීම සඳහා ආණ්ඩුව සහ කථානායකවරයා සිය බලතල භාවිතා නොකරන බවත් ගුණරත්න මහතා චෝදනා කරයි. 

"විපක්ෂයේ කෙනෙකු මේ දේ කළා නම් ඔහුගේ නිවසේ සිටින බල්ලා පවා අත්අඩංගුවට ගන්නා" බව පවසන ඒ මහතා, වත්මන් රජය පාරදෘශ්‍ය බව පැවසුවද ක්‍රියාවෙන් එය සිදු නොවන බව පවසයි.

මෙම සිද්ධියට අදාළව ජනාධිපතිවරයා ඇතුළු අනුමැතිය ලබා දුන් සියලු නිලධාරීන් අත්අඩංගුවට ගෙන විමර්ශනය කළ යුතු බවත්, දැනට පවතින විමර්ශන සම්බන්ධයෙන් සෑහීමකට පත්විය නොහැකි බැවින් සති දෙකක් ඇතුළත මෙම නඩුව යළි කැඳවන ලෙස ඉල්ලා සිටින බවත් ඔහු වැඩිදුරටත් ප්‍රකාශ කර සිටියි.