හැකර්වරුන් සිදුකළ සොරකමට එරෙහිව පොලිස්පතිට පැමිණිල්ලක්.. භාණ්ඩාගාර ලේකම් ඉවත් කළ යුතු බව සජබය කියයි..

Apr 23, 2026 at 02:51 PM

|

Lanka Leader

විදෙස් රටක ණය ගෙවීමකට අදාළ මහා භාණ්ඩාගාරයේ ඩොලර් මිලියන 2.5ක මුදලක් පරිගණක හැකර්වරුන් අතට පත් වී ඇතැයි කියන සිද්ධිය පිළිබදව විමර්ශනයක් ඉල්ලා පොලිස්පතිවරයා වෙත අද පැමිණිල්ලක් ඉදිරිපත් කෙරුණි.

විද්‍යුත් තැපෑලෙන් මෙම පැමිණිල්ල ගොනු කර තිබුණේ, සත්‍ය ගවේෂකයෝ සංවිධානය විසින්. 

එහිදී ඔවුන් පොලිස්පතිවරයාගෙන් වැඩිදුරටත් ඉල්ලා ඇත්තේ මෙම සිද්ධිය පිළිබදව සොයා බැලීමට දැනටමත් අදාළ ප්‍රශ්නගත දෙපාර්තමේන්තුවේ නිලධාරීන්ගෙන් සමන්විත තාක්ෂණික විමර්ශන කමිටුවක් පමණක් ප්‍රමාණවත් නොවන බවයි.

ඇමරිකානු ඩොලර් මිලියන 22.9ක ණය මුදලක් ගෙවීමට තිබූ රටකට ණය පියවීමක් ලෙස මහා භාණ්ඩාගාරය මගින් ‍ගෙවූ ඇමරිකානු ඩොලර් මිලියන 2.5ක මුදලක් පරිගණක හැකර්වරුන් අතට පත් වී ඇති බවට මේ වන විට කරුණු රැසක් වාර්තා වී තිබේ.

ෆ්‍රී ලෝයර්ස් සංවිධානයද ලිපියක් මගින් අදාළ සිද්ධිය පිළිඳව කරුණු රැසක් අනාවරණය කර තිබිණි.

එහි සභාපති ජනාධිපති නීතිඥ මෛත්‍රී ගුණරත්නගේ අත්සනින් නිකුත් කළ ලිපියක් මගින් පෙන්වා දී තිබුණේ ශ්‍රී ලංකා රජය 2025 වසරේ සැප්තෑම්බර් මස අග වන විට ඩොලර් මිලියන 22.9 ක ණය මුදලක් ගෙවීමට තිබු රටකට, ණය පියවීමක් ලෙස ඉන් කොටසක් එනම්, ඩොලර් මිලියන 2.5 ක මුදලක්, මහා භාණ්ඩාගාරය විසින් 2025 වසරේ දෙසැම්බර් සිට 2026 ජනවාරි 31 වැනිදා දක්වා කාලය තුල පියවා ඇති බවයි.

නමුත් එම මුදල් අදාළ ණයහිමියා වෙත නොව, තුන්වැනි පාර්ශවයකට එනම් පරිගණක හැකර්වරුයෙකු වෙත යොමු කර ඇති බවද අදාළ ලිපියේ දැක්වේ.

මේ අතර, සමගි ජනබලවේගයේ අද කැදවා තිබූ ප්‍රවෘත්ති සාකච්ඡාවට එක්වෙමින් පාර්ලිමේන්තු මන්ත්‍රී මුජිබර් රහුමාන් කියා සිටියේ මෙම සිද්ධියට අදාළව මහා භාණ්ඩාගාර ලේකම්වරයා ඉවත් කළ යුතු බවයි.