ඊශ්‍රායලය ලෙබනනයට එල්ල කරන දැවැන්ත ප්‍රහාර මාලාව හේතුවෙන් ඉරානය හෝමූස් යළි වසා දමයි..

Apr 9, 2026 at 05:02 AM

|

Lanka Leader

ඉරානය සහ අමෙරිකාව ඇතිකරගත් සටන් විරාමය මධ්‍යයේ ඉරානය ඊයේ (8) පස්රුවේ හෝමූස් සමුද්‍ර සන්ධිය වසාදමා තිබේ.

දෙපාර්ශ්වය සටන් විරාමය ඇතිකරගැනීමත් සමග ඉරානය හෝමූස් සමුද්‍ර සන්ධිය යළි විවෘත කිරීමට පියවරගෙන තිබුණි.

කෙසේ නමුත් ඊශ්‍රායලය විසින් ලෙබනනයට එල්ල කරන දැවැන්ත ප්‍රහාර මාලාව හේතුවෙන් හෝමූස් හරහා ගමන්ගන්නා නෞකාවලට මෙම තහනම පැනවූ බව ඉරාන මාධ්‍ය වාර්තා සඳහන් කරයි.

ඒ අනුව නෞකාවලට හෝමූස් හරහා යාත්‍රා කිරීම තහනම් බවත්, අවසරයකින් තොරව ගමන් කිරීමට උත්සාහ කරන ඕනෑම නෞකාවක් විනාශ කරන බවත් ඉරාන විප්ලවීය ආරක්ෂක බළකාය පර්සියානු බොක්කේ නවතා ඇති නෞකාවලට දැඩි ලෙස අනතුරු අඟවා ඇති බව විදෙස් මාධ්‍ය පවසයි.

ප්‍රමුඛ පෙළේ නැව් තැරැව්කාර සමාගමක් වන 'SSY' ආයතනයද මේ බව තහවුරු කර තිබේ.

ඉරාන විප්ලවීය ආරක්ෂක බළකාය පර්සියානු බොක්කේ යාත්‍රා කරන නෞකා වෙත රේඩියෝ පණිවුඩ මගින් මෙම දැනුම්දීම සිදු කර ඇති බව සඳහන්ය.

ඉරානය සහ අමෙරිකාව අතර ඇති කරගත් සටන් විරාම ගිවිසුමේ ප්‍රධාන කොන්දේසියක් වූයේ මෙම සමුද්‍ර සන්ධිය හරහා තෙල් නැව්වලට ගමන් කිරීමට ඉඩ ලබා දීමය.

ඉරාන විප්ලවීය ආරක්ෂක බලකායට අනුබද්ධ Fars පුවත් ඒජන්සිය වාර්තා කරන්නේ, ඊයේ (8) උදෑසන ඉරානයේ අවසරය ඇතිව තෙල් නැව් දෙකක් ගමන් කළද, ඉන් අනතුරුව එම මාර්ගයේ නැව් ගමනාගමනය සම්පූර්ණයෙන්ම නතර කර ඇති බවය.

ඊශ්‍රායලය විසින් ලෙබනයට එරෙහිව ‍මෙහෙයුම් ආරම්භ කිරීමෙන් අනතුරුව අද දැවැන්ත ප්‍රහාරයක් එල්ලකළ අතර, එය ගොඩබිම් මෙහෙයුම් ආරම්භ කිරීමෙන් පසු ලෙබනනයට එල්ලකළ විශාලතම ප්‍රහාරය විය.

මේ අතර, ඊශ්‍රායලය විසින් ලෙබනය පුරා එල්ලකළ ප්‍රහාර මාලාවෙන්  පුද්ගලයින් 254 දෙනෙකු මියගොස් තවත් 1,165 දෙනෙකු තුවාල ලබා ඇති බව ලෙබනනයේ සිවිල් ආරක්ෂක අංශ වාර්තා කර තිබේ.