ආණ්ඩුව රැකගන්න අවශ්‍ය වුනොත් පාරට බැහැලා එම වගකීම ඉටු කරන්න ජනතාව සූදානමින් ඉන්නවා..- ටිල්වින් කියයි

Apr 6, 2026 at 05:44 AM

|

Lanka Leader

ආණ්ඩුව ආරක්ෂා කර ගැනීමට අවශ්‍ය වුවහොත් පාරට බැස හෝ එම වගකීම ඉටු කිරීමට ජනතාව සූදානම් බවත්, ඒ පිළිබඳ පූර්ණ විශ්වාසයක් පවතින බවත් ජනතා විමුක්ති පෙරමුණේ ප්‍රධාන ලේකම් ටිල්වින් සිල්වා මහතා පවසයි.

වවුනියාවේ පැවති 53 වන අප්‍රේල් විරු සමරු උත්සවය අමතමින් ඔහු මේ බව අවධාරණය කළේ විපක්ෂයේ වත්මන් ක්‍රියාකලාපය දැඩි ලෙස විවේචනය කරමිනි.

ශ්‍රී ලංකාවේ වත්මන් විපක්ෂය වැනි විපක්ෂයක් ලෝකයේ වෙනත් කිසිදු රටකින් දැකගත නොහැකි බවත්, ඔවුන් රටට සැබෑ සාපයක් වී ඇති බවත් ලේකම්වරයා සඳහන් කළේය.

ප්‍රජාතන්ත්‍රවාදීව ජනතාව සංවිධානය කර බලය ලබා ගැනීමට උත්සාහ කරනවා වෙනුවට, විපක්ෂය සැමවිටම බලා සිටින්නේ කුමන්ත්‍රණ මගින් හෝ රටට විපතක් සිදුවන තෙක් බව ඔහු චෝදනා කළේය.

ජාතික ජන බලවේගය 3% ක ඡන්ද ප්‍රතිශතයක සිට ආරම්භ කර, ජනතාව අතරට ගොස් ඔවුන් දැනුවත් කරමින් විශාල වෙහෙසක් දරා බලය ලබාගත් බව සිහිපත් කළ ටිල්වින් සිල්වා මහතා, විපක්ෂයට ජනතාව සංවිධානය කර පාරට බැස්සවීමට පවා නොතේරෙන බව ප්‍රකාශ කළේය.

විපක්ෂය විසින් වරින් වර දෙසැම්බර් සහ අප්‍රේල් මාසවල ආණ්ඩුව පෙරළෙන බවට දින වකවානු ලබා දුන්නද, ජනතාව පාරට බසින්නේ ආණ්ඩුව පෙරළීමට නොව එය රැකගැනීමට බව ඔහු වැඩිදුරටත් පැවසීය.

තෙල් හිඟයක් නොමැති අවස්ථාවල පවා කෘතිම පෝලිම් නිර්මාණය කරමින් ජනතාව කුපිත කිරීමට විපක්ෂය උත්සාහ කළ බවත්, පාස්කු ප්‍රහාරය සහ මහ බැංකු වංචාව වැනි සිදුවීම්වල මහ මොළකරුවන් ආරක්ෂා කිරීමට පොත් ලියූ පිරිස් අද විපක්ෂයේ සිටින බවත් ඔහු අනාවරණය කළේය.

සමාජ මාධ්‍ය හරහා සිදුකරන අවලාද, බොරු ප්‍රචාර හෝ පුද්ගල අපහාස මගින් තම ව්‍යාපාරයේ ගමන නැවැත්විය නොහැකි බව ටිල්වින් සිල්වා මහතා අවධාරණය කළේය.