LTTEය සිදු කළ “කන්දන් කරුණායි” බන්ධනාගාර සංහාරය දෙමළ ඉතිහාසයේ කුරිරු පරිච්ඡේදයක්.. - අරුන් සිද්ධාර්ත්

Apr 1, 2026 at 07:28 PM

|

Lanka Leader

එල්ටීටීඊය විසින් සිදු කරන ලද “කන්දන් කරුණායි” බන්ධනාගාර සංහාරය දෙමළ ඉතිහාසයේ කුරිරු පරිච්ඡේදයක් බවත් එය වැලිකඩ බන්ධනාගාර සංහාරයට සමාන බවත් සර්වජන බලය පක්ෂයේ යාපනය දිස්ත්‍රික් සංවිධායක සහ සමාජ ක්‍රියාකාරිකයෙකු වන අරුන් සිද්ධාර්ත් ප්‍රකාශ කළේය.

1987 මාර්තු 30 වන දින සිදු වූ මෙම සංහාරයට සම්බන්ධ සහ තවමත් ජීවතුන් අතර සිටින එල්ටීටීඊ සාමාජිකයින් නීතිය හමුවට පමුණුවාලිය යුතු බව ඔහු තවදුරටත් සඳහන් කළේය.

ඊයේ (2026/03/31) ඔහුගේ කාර්යාලයේ පැවති මාධ්‍ය හමුවකදී ඔහු මෙම අදහස් පළ කළේය.

තවදුරටත් විස්තර කරමින් අරුන් සිද්ධාර්ථ් ඔහු මෙසේ ද පැවසීය:

1987 මාර්තු 29 වන දින, එල්ටීටීඊයේ කුප්‍රකට අණ දෙන නිලධාරියෙකු වන සදාසිවම් ක්‍රිෂ්ණකුමාර්, (කිට්ටු ලෙසද හැඳින්වේ), 2 වන හරස් වීදියේ පදිංචි කාන්තාවක් බැලීමට යමින් සිටියදී, එල්ටීටීඊය තුළ අභ්‍යන්තර ගැටුමක් හේතුවෙන් අත්බෝම්බ ප්‍රහාරයකට ලක් විය. මෙම ප්‍රහාරයේ ප්‍රතිඵලයක් ලෙස, ඔහුගේ එක් පාදයක් පසුව කපා ඉවත් කරන ලදී.

මෙම සිදුවීමෙන් කෝපයට පත් අරුණ නමින් හැඳින්වෙන එල්ටීටීඊ සටන්කාමියෙකුගේ නායකත්වය යටතේ, බන්ධනාගාරයක් මෙන් ම  වධකාගාරයක් ලෙස ද ක්‍රියාත්මක වූ “කන්දන් කරුණාවයි” නම් නිවසක සිරකරුවන් ලෙස රඳවා සිටි දෙමළ තරුණයින් 63 දෙනෙකු පමණ එදිනම රාත්‍රියේ වෙඩි තබා ඝාතනය කරන ලදී.

මෙම සංහාරයෙන් දිවි ගලවා ගත් කිහිප දෙනෙකු තවමත් මෙම කුරිරු බන්ධනාගාර ඝාතනයේ සාක්ෂිකරුවන් ලෙස සිටිති.

මෙම සංහාරයට සම්බන්ධ සමහර එල්ටීටීඊ සාමාජිකයින් තවමත් ඇතැම් යුරෝපීය රටවල ජීවත් වෙති. මෙම යුද අපරාධකරුවන් එම අදාළ රටවලදී හඳුනාගෙන දඬුවම් සඳහා ජාත්‍යන්තර අධිකරණ හමුවට ඉදිරිපත් කළ යුතු බව ඔහු අවධාරණය කළේය.

ඊයේ (30/03/2026) ආරම්භ වූ කුරුක්කල්මඩම් හි සමූහ මිනීවළ කැණීමට අදාළ ප්‍රවෘත්ති දෙමළ මාධ්‍ය ආයතන විසින් යටපත් කරන බවට ද ඔහු චෝදනා කළේය.

1990 දී මඩකලපුවේ කුරුක්කල්මඩම් ප්‍රදේශයේ එල්ටීටීඊය විසින් පැහැරගෙන ගොස්, මරා දමා වළලනු ලැබූ පුද්ගලයින්ගේ අධිකරණ නියෝගයකින් යුත් සමූහ මිනීවළ කැණීම දෙමළ මාධ්‍ය හිතාමතාම අවතක්සේරු කරන බව ඔහු තවදුරටත් පැවසීය. මෙම මාධ්‍ය ආයතනම චෙම්මනි සමූහ මිනීවළ කැණීම් පුළුල් ලෙස ආවරණය කර විස්තාරණය කළ අතර, දැන් ඔවුන් එල්ටීටීඊය විසින් ඝාතනය කර වළලනු ලැබූ මුස්ලිම් වින්දිතයින්ගේ සමූහ මිනීවළ කැණීම් පිළිබඳව "සන්නද්ධ කණ්ඩායම් විසින් මරා දමන ලදී" වැනි නොපැහැදිලි යෙදුම් භාවිතා කරමින් වාර්තා කරමින් සිටී.

මෙම මුස්ලිම් සිවිල් වැසියන් එල්ටීටීඊය විසින් පැහැරගෙන ගොස් මරා දැමූ බව ලොව පුරා පුළුල් ලෙස දන්නා කරුණක් වුවද, සත්‍යය වසන් කිරීම සම්බන්ධයෙන් මාධ්‍ය විවේචනය කළ ඔහු, එවැනි මාධ්‍ය ආයතන පුවත්පත් කලාව අතහැර ලොව පැරණිතම වෘත්තිය භාර ගැනීමට ඉඩ ඇති බව ප්‍රකාශ කළේය.

එල්ටීටීඊ නායක ප්‍රභාකරන්ගේ නිවසේ ස්මාරකයක් පිහිටුවීමට ගත් උත්සාහයන් මෙන්ම යාපනය විශ්ව විද්‍යාලයේ ජාතික ධජය ඉවත් කර කළු කොඩියක් සවි කළ සිද්ධිය සම්බන්ධයෙන් ත්‍රස්ත විමර්ශන අංශය සහ පොලිසිය හරහා පරීක්ෂණ ආරම්භ කිරීම සම්බන්ධයෙන් ඔහු රජයට කෘතඥතාව පළ කළේය.

ප්‍රභාකරන්ගේ නිවසේ කිසියම් ස්මාරකයක් ස්ථාපිත කරන්නේ නම්, එය එල්ටීටීඊයේ කන්දන් කරුණායි බන්ධනාගාරයේ දී මියගිය පුද්ගලයින් 63 දෙනා, එල්ටීටීඊයේ තුනුක්කායි වධකාගාරයේ දී මියගිය 4,000 කට අධික පිරිසක් සහ කුරුක්කල්මඩම් හි දී එල්ටීටීඊය විසින් ඝාතනය කරන ලද මුස්ලිම් සිවිල් වැසියන් 168 දෙනා ද සිහිපත් කළ යුතු බව ඔහු තවදුරටත් පැවසීය.