පාස්කු ප්‍රහාරයේ මහ මොළකරු සහරාන් - ගම්මන්පිල හෙළි කරයි..

Apr 1, 2026 at 05:46 AM

|

Lanka Leader

පාස්කු ඉරුදින මරාගෙන මැරෙන ප්‍රහාර මාලාවේ මහ මොළකරු සහරාන් හෂිම් බව පිවිතුරු හෙළ උරුමයේ නායක, හිටපු අමාත්‍ය උදය ගම්මන්පිල මහතා අද(31) අවධාරණය කරයි.

ඔහු මේ බව සඳහන් කළේ ඔහු විසින් රචිත පාස්කු ප්‍රහාරයේ මහ මොළකරු සොයා යෑම කෘතිය ජනගත කිරීමේ අවස්ථාවට එක්වෙමින්.

ඊයේ සවස මෙම ජනගත කිරීමේ උත්සවය පැවැත්වූයේ හිටපු ජනාධිපති මහින්ද රාජපක්ෂ මහතාගේ ප්‍රධානත්වයෙන්.

හිටපු ජනාධිපතිවරුන් වන මෛත්‍රිපාල සිරිසේන ,ගෝඨාභය රාජපක්ෂ ,විපක්ෂ නායක සජිත් ප්‍රේමදාස ඇතුළු දේශපාලන පක්ෂ රැසක නායකයින් සහ නියෝජිතයින් විශාල පිරිසක් මෙම අවස්ථාවට එක්ව සිටියහ.

සහරාන් හෂිම් විසින්ම පුපුරණ ද්‍රව්‍ය රැස් කිරීම, බෝම්බ නිෂ්පාදනය සහ අවි ආයුධ එක්රැස් කිරීම සිදු කර ඇති බවයි එහි දැක්වෙන්නේ.

මෙහිදී වැඩිදුරටත් අදහස් දැක්වූ උදය ගම්මන්පිල ප්‍රකාශ කළේ පුහුණු කඳවුරු පවත්වමින් මරාගෙන මැරෙන බෝම්බකරුවන්ගේ මනස ඒ සඳහා සකස් කර ඇත්තේ සහරාන් විසින් බව අනාවරණය වන බවයි.

බෝම්බ පිපිරවිය යුතු ස්ථාන සහ මරාගෙන මැරෙන බෝම්බකරුවන් කවුරුන්ද යන්න තීරණය කිරීමේ සම්පූර්ණ බලය සහරාන් සතු වූ බව මෙම කෘතියෙන් පෙන්වා දී ඇති බවද ගම්මන්පිල සදහන් කළේය.

මෙහිදී වැඩිදුරටත් අදහස් දැක්වූ ගම්මන්පිල මහතා මෙසේද ප්‍රකාශ කළේය.

"ප්‍රහාරයට අවශ්‍ය සියලුම තාක්ෂණික සහ ද්‍රව්‍යමය පහසුකම් සහරාන්ගේ මූලිකත්වයෙන් සපයාගෙන තිබෙනවා."

මෙම ප්‍රහාරය සඳහා අවශ්‍ය වූ පුපුරණ ද්‍රව්‍ය එක්රැස් කිරීම, මරාගෙන මැරෙන බෝම්බකරුවන් තෝරා ගැනීම සහ ප්‍රහාරක ඉලක්ක තීරණය කිරීම යනාදී සියලුම මූලික මෙහෙයුම් සහරාන් හෂීම් විසින්ම සිදු කර ඇති බවත්, ඒ සඳහා අවශ්‍ය යටිතල පහසුකම් මෙන්ම රුපියල් මිලියන 300කට අධික මූල්‍යමය ප්‍රතිපාදන ජාතික ජන බලවේගයට සම්බන්ධ දේශපාලනඥයෙකු වන මොහොමඩ් ඊබ්‍රහීම් විසින් සපයා ඇති බවත් ගම්මන්පිල මහතා එහිදී පෙන්වා දුන්නා.

ජාත්‍යන්තර අයි.එස්.අයි.එස් (ISIS) සංවිධානයේ ශ්‍රී ලංකා නායකයා ලෙස සහරාන් මෙම ප්‍රහාරය මෙහෙයවා ඇති බැවින් ඔහු හැර වෙනත් මහ මොළකරුවෙකු නොමැති බවත්, මේ සම්බන්ධයෙන් තමා සතුව අමෙරිකා එක්සත් ජනපදයේ අධිකරණයක් ඉදිරියේ ලබා දුන් දිවුරුම් ප්‍රකාශයක් පවා පවතින බවත් හෙතෙම වැඩිදුරටත් කියා සිටියේය.

උදය ගම්මන්පිල මහතාගේ කෘතිය මගින් සහරාන්ගේ සෘජු මැදිහත්වීම පිළිබඳ කරුණු රැසක් ඉදිරිපත් කර තිබේ.