සතොස කැරම් බෝඩ් වංචා නඩුවේ නීතිපති ස්ථාවරය හදිසියේ වෙනස් වෙයි.. තෙවන විත්තිකරු මුදා හරී..

Mar 31, 2026 at 07:32 PM

|

Lanka Leader

2015 ජනාධිපතිවරණ සමයේ රුපියල් මිලියන 39ක් වටිනා කැරම් බෝඩ් සහ දාම් ලෑලි බෙදාහැරීමේ සිද්ධිය සම්බන්ධයෙන් පවරා ඇති නඩුවේ ඊයේ (මාර්තු 30)  නීතිපති දෙපාර්තමේන්තුව එතෙක් දැරූ දැඩි ස්ථාවරය හදිසියේම වෙනස් කරමින් කළ ඉල්ලීමක් මත නඩුවේ තෙවන විත්තිකරු වූ විශ්‍රාමික මේජර් ජෙනරාල් නන්ද මල්ලවාරච්චි මහතා මුදා හැරීමට කොළඹ මහාධිකරණය නියෝග කළේය.

ක්‍රීඩා අමාත්‍යාංශයේ හිටපු  ලේකම්වරයා නඩුවෙන් මුදා හැරීම සඳහා නීතිපතිවරයා විසින් අපරාධ නඩු විධාන සංග්‍රහය පනතේ 194  වගන්තිය යටතේ ඉල්ලීම සිදුකළ අතර  කෙසේ වෙතත්, මෙය 'නිදොස් කර නිදහස් කිරීමක්' නොවන බව මහාධිකරණ විනිසුරු බුද්ධික සී. රාගල මහතා මෙහිදී අවධාරණය කළේය.

වඩාත් විශේෂ සිදුවීම නම් මෙම නඩුව මෙතෙක් මෙහෙයවනු ලැබූ නියෝජ්‍ය සොලිසිටර් ජනරාල් මාධව තෙන්නකෝන් මහතා, විත්තිකරුවන් තිදෙනාම වගකිව යුතු බවට දැරූ ස්ථාවරය ඊයේ දින නීතිපති දෙපාර්තමේන්තුව විසින් අත්හැර දැමීමයි.

නියෝජ්‍ය සොලිසිටර් ජනරාල්  මාධව තෙන්නකෝන් වෙනුවට අතිරේක සොලිසිටර් ජනරාල් ලක්මාලි කරුණාරත්න මෙම නඩුවට මැදිහත්ව මෙසේ වෙනස් ස්ථාවරයක් ගෙන ඒම සම්බන්ධව  නීති ක්ෂේත්‍රයේ ද  දැඩි අවධානයක් යොමුව තිබේ.

අල්ලස් හෝ දූෂණ විමර්ශන කොමිසමේ අධ්‍යක්ෂ ජෙනරාල් ධුරය සඳහා වැඩිම ලකුණු ලබා සිටියදී එම පත්වීම මාධව තෙන්නකෝන් මහතාට අහිමි වීමත්, ඉන් පසු මෙම නඩුවේ ස්ථාවරය වෙනස් වීමත් පිටුපස කිසියම් අදෘශ්‍යමාන  හස්තයක් ක්‍රියාත්මක වන්නේද යන්න කෙරෙහිද ඔවුන් අතර සැකසංකා මතුව තිබේ.  

මේ අතර, තමන්ට එරෙහිව නැවත නඩු පැවරීම නීති විරෝධී බව පවසමින් හිටපු අමාත්‍යවරුන් වන මහින්දානන්ද අලුත්ගමගේ සහ නලින් ප්‍රනාන්දු වෙනුවෙන් නීතිඥවරුන් ඉදිරිපත් කළ මූලික විරෝධතා ද  අධිකරණය ප්‍රතික්ෂේප කළේය.

 අල්ලස් කොමිසම මීට පෙර නඩු පවරා තිබුණේ අල්ලස් පනතේ 70 වන වගන්තිය යටතේ වුවද, නීතිපතිවරයා මෙම නඩුව පවරා ඇත්තේ අපරාධ නඩු විධාන සංග්‍රහයේ 170 වන වගන්තිය යටතේ රජයේ මුදල් සාවද්‍ය පරිහරණය සම්බන්ධයෙන් බව විනිසුරුවරයා පෙන්වා දුන්නේය. 

චෝදනාවල සංඝටක එකිනෙකට වෙනස් බැවින් මෙම නඩුව ඉදිරියට පවත්වාගෙන යාමට අධිකරණය තීන්දු කළ අතර නඩුව ජූනි මස 26 වනදා නැවත කැඳවීමට නියමිතය.