බ්‍රික්ස් සමුළුවට ගියා නම් මීට පෙර රුසියාවෙන් තෙල් ගන්න තිබුණා - නාමල්

Mar 29, 2026 at 05:33 AM

|

Lanka Leader

ජනාධිපතිවරයා බ්‍රික්ස් සමුළුවට ගියා නම් තෙල් සම්බන්ධයෙන් මීට වඩා හොඳ ප්‍රතිචාරයක් රුසියාවෙන් මීට පෙර ලබා ගැනීමට තිබුණු බව ශ්‍රී ලංකා පොදුජන පෙරමුණේ ජාතික සංවිධායක, පාර්ලිමේන්තු මන්ත්‍රී නාමල් රාජපක්ෂ මහතා ප්‍රකාශ කරයි.

ඔහු මේ බව පැවසුවේ බත්තරමුල්ල ශ්‍රී ලංකා පොදුජන පෙරමුණ පක්ෂ මූලස්ථානයේ දී පැවැති රැස්වීමකින් අනතුරුවයි.

"බ්‍රික්ස් සමුළුවට ආරාධනා කරපු අවස්ථාවේදී එම සමුළුව මගහැරියා. බ්‍රික්ස් සමුළුවට ඒ අවස්ථාවේදී ජනාධිපතිවරයා ගියානම් මීට වඩා හොඳ ප්‍රතිචාරයක් රුසියාවෙන් තෙල් පිළිබඳව මීට පෙර ලබා ගැනීමට තිබුණා. එහෙනම් රුසියාවේ බලශක්ති නියෝජ්‍ය ඇමතිවරයා ශ්‍රී ලංකාවට පැමිණෙනකන් ඉන්න ඕන වෙන්නෑ සාකච්ඡා කරන්න. ඒ අවස්ථාවේදීම බලශක්ති සම්බන්ධයෙන් සාකච්ඡා කරන්න ඉඩ තිබුණා. කමක් නැහැ. පහුවෙලා හරි කරපු එක ගැන සතුටු වෙනවා."

දැනට අත්අඩංගුවේ පසු වන හිටපු බුද්ධි අංශ ප්‍රධානී සුරේෂ් සලේ සම්බන්ධයෙන්ද අදහස් දැක්වූ ඔහු කියා සිටියේ මෙවැනි සිද්ධි නිසා ජාතික ආරක්ෂාව බරපතල ආකාරයෙන් අර්බුදයකට යන බවයි.

"බුද්ධි අංශ දුර්වල කරලා, හමුදාව දුර්වල කරලා ජාතික ආරක්ෂාව ගැන සෑහීමකට පත්වෙන්න පුළුවන්ද? පහුගිය යහපාල ආණ්ඩුව කාලෙදිත් මේ වැරැද්දම කළා. බුද්ධි අංශ දුර්වල කරලා, ආරක්ෂක අංශ දුර්වල කරලා ජාතික ආරක්ෂාවේ ප්‍රශ්නයක් ඇති වුණා. අපේ ආණ්ඩුවලදී විතරයි ඒ ආකාරයට බුද්ධි අංශ හෝ ආරක්ෂක අංශ කිසිම ආකාරයකින් දුර්වල කිරීමට පියවර නොගත්තේ."

මුදල් වියදම් කරලා කුමන්ත්‍රණකාරී ලෙස ගෝඨාභය රාජපක්ෂ ජනාධිපතිවරයාගේ ආණ්ඩුව පෙරළීමට ක්‍රියා කළ ආකාරය සම්බන්ධයෙන් තම රජයක් යටතේ විශේෂ ජනාධිපති කොමිසමක් මගින් විමර්ශනයක් අනිවාර්යෙන්ම සිදු කරන බවද නාමල් රාජපක්ෂ මහතා මෙහිදී ප්‍රකාශ කළේය.

"එම රජය මුදල් වියදම් කරලා පෙරළපු ආකාරය හොයන්න පාර්ලිමේන්තු තේරීම් කාරක සභාවක් පත්කරන්න කියලා මං කතානායකවරයාගෙන් ඉල්ලීමක් කළා. නමුත් තවම ඊට ප්‍රතිචාරයක් ලැබිලා නෑ. ඒ වගේ දේවල් හොයන්න ඕන. නැත්නම් කිසිම කෙනෙකුට රටක් කරගෙන යන්න හම්බවෙන්නේ නැහැ. ඒක ඕනෑම ආණ්ඩුවකට වෙන්න පුළුවන්. මේ වර්තමාන ආණ්ඩුවටත් ගෝඨාභය රාජපක්ෂ මහත්තයට වෙච්ච දේ වෙන්න ඉඩ තියෙනවා."