වාමාංශික ලේබලය ගහගත් ආණ්ඩුවක් රුසියාව වැනි සමාජවාදී රටක් ප්‍රතික්ෂේප කර ඇමරිකානු ගැති ප්‍රතිපත්තියක් අනුගමනය කිරීම..

Mar 21, 2026 at 08:36 AM

|

Lanka Leader

ඊයෙ පාර්ලිමේන්තුවේදී අනුර කුමාර දිසානායක ජනාධිපතිවරයා කරපු කතාවෙදි අපිට එච්චර සීරියස් නොවුන ඒත් රුසියාව සහ ඇමරිකාව අනිවාර්යයෙන්ම පික් කරන බරපතල කතා දෙකක් කිව්වා..

එකක් තමයි මේ කතාව..

" අපේ අපනයන වලින් 25% ක් යන්නෙ එක්සත් ජනපදයට.. ඔබට මතක ඇති අපේ අසල්වැසි රාජ්‍යයන්ට පවා මේ ටැරිෆ් ප්‍රශ්ණය නිසා රුසියාව සමග තියෙන ගනුදෙනු අඩාල කරන්න සිද්ධ උනා.."

ජනාධිපතිවරයා මේ නොකිය කිව්වෙ මොකක්ද...? 

' හූ කෙයාර්ස් රුසියාව.. අපිට මේ වෙලාවෙ වැදගත් ඇමරිකාව කියලා... " 

ඔව් ආර්ථික දත්ත එක්ක අරගෙන බලනකොට මේ කතාව 100% ක් හරි වෙන්න පුළුවන්. ඒත් කටට ආ පලියට මේ වගේ කතාවක් රටක ජනාධිපතිවරයෙක් කිව යුතුද...?

රුසියාව කියන්නෙ අපිට එදා ඉඳන්ම හිටපු මිතුරෙක්.. විශේෂයෙන්ම අපි ත්‍රස්තවාදී යුද්ධය ඉවර කරාට පස්සෙ UN එකේදි අපිට විරුද්ධව යෝජනා එනකොට කොන්ද කෙලින් තියාගෙන අපිත් එක්ක කෙලින් හිටගත්ත රටක්.. රුසියාව, චීනය වගේ රටවල් එදා අපිත් එක්ක එකට හිටගත්තෙ නැත්නම් අපිට සම්බාධක පවා වැටෙන්න තිබ්බා.

ඉතිහාසයේ පලවෙනි වතාවට අපේ රටේ ජනාධිපතිවරයා 2025 BRICS සමුළුවට කරපු ආරධනාව ප්‍රතික්ෂේප කරනවා. (BRICS කියන්නෙ Brazil, Russia, India, China, සහ South Africa කියන රටවල මුල් අකුරුවලින් හදාගත්ත නමක්). එය ප්‍රධාන නැගී එන ආර්ථිකයන් අතර දේශපාලන, ආර්ථික සහ ආරක්ෂක සහයෝගීතාව වැඩි දියුණු කිරීම සඳහා ඉහළම මට්ටමේ රාජ්‍ය තාන්ත්‍රික රැස්වීමක්

මේ ආරාධනාව ප්‍රතික්ෂේප කිරීම පිළිබඳව රුසියානු තානාපති එල්. ධාගරියන් ( S. Dzhagaryan ) වරක් මාධ්‍ය හමුවකදි ප්‍රකාශ කරේ..

" අපි ඔහුට ආරාධනා කරා එය ඔහුට තේරුනාද දන්නෙ නෑ " කියලා ජනාධිපතිතුමාගෙ භාෂාමය දැණුම පිළිබඳව සමච්චල් කරමින්. ඒ සමච්චලය ඇතුළෙ තිබ්බෙ රුසියාවෙ නොරිස්සුම.

ඊටපස්සේ මේ මැතකදි නැවතත් රුසියානු තානාපතිවරයා ප්‍රකාශයක් කරනවා..

" ශ්‍රී ලංකාවේ ක්‍රියාත්මක වන කිසිදු සෘජු රුසියානු ආයෝජන ව්‍යාපෘතියක් නෑ. අපි ආයෝජනයට සූදානම්. ඒත් කොහේද ආයෝජනය කරන්නේ. කිසිම ව්‍යාපෘතියක් වෙන්නෙ නෑනෙ?. සමහර තානාපතිවරු ශ්‍රී ලංකාවේ ආයෝජන වටපිටාව ගැන කනස්සල්ලෙන් ඉන්නෙ.. " 

මේවා රාජ්‍යතාන්ත්‍රිකව අපේ රට පිළිබඳව එල්ල වෙන බරපතල ප්‍රකාශ..

විශේෂයෙන්ම වාමාංශික ලේබලය ගහගත් ආණ්ඩුවක් රුසියාව වගේ සමාජවාදී රටක් ප්‍රතික්ෂේප කරලා ඇමරිකානු ගැති ප්‍රතිපත්තියක් අනුගමනය කිරීම පුදුමයක්. ( ජවිපෙ සමාජවාදය සහ සමානාත්මතාවය තියෙන්නෙ බෝඩ් ලෑලි වල විතරයි කියන්ක මේ හොඳම නිදර්ශනයක්)

උග්‍ර ඇමරිකානු ගැත්තෙක් ලෙස ජනප්‍රියව සිටි ඒ නිසාම " යැංකි ඩිංකි" ( Yankee Dinky)  ලෙස නමක් පවා පටබැඳුණු ජේ ආර් ජයවර්ධන පවා රුසියාව සමග ගනුදෙනු කරේ පරිණත රාජ්‍යතාන්ත්‍රිකයෙකු ලෙසයි.

රුසියාව කියන්නෙ ශ්‍රී ලංකාවේ එදා ඉදන්ම හිටපු අතිශය කලණ මිතුරෙක් 

📕 ආපදා සහ මානුෂීය සහන : ඉතිහාසයේ පටන්ම ශ්‍රී ලංකාවේ හදිසි ආපදා තත්ත්වයන්හිදී රුසියානු රජය මානුෂීය ආධාර සපයා ඇත. 

📕 ආර්ථික ආධාර සහ ඉන්ධන: රුසියානු-යුක්රේන අර්බුදය මධ්‍යයේ වුවද, රුසියාව ශ්‍රී ලංකාවට ඉන්ධන සැපයීම වැනි ආර්ථික සහයෝගයන් ලබා දී ඇති අතර, රුසියානු ධජය යටතේ යාත්‍රා කරන ඉන්ධන ප්‍රවාහන නෞකා මගින් ඉන්ධන සැපයුම් ලැබී ඇත.

📕 වෙළෙඳ : රුසියාව ශ්‍රී ලංකාවේ තේ සඳහා විශාලම වෙළඳපොළකි.

📕 අධ්‍යාපන සහ තාක්ෂණික ආධාර: රුසියාව ශ්‍රී ලාංකික සිසුන් සඳහා ශිෂ්‍යත්ව ලබා දීම සහ තාක්ෂණික අංශයේ පුහුණුවීම් ලබා දීම හරහා මානව සම්පත් සංවර්ධනයට ආධාර කරයි.

මතකද එකපාරක් මෛත්‍රීපාල සිරිසේන ජනාධිපතිවරයා රුසියාවෙන් ගේන ඇස්බැස්ටස් වාරණය කරලා අපේ තේ වලට කුරුමිණියෙක් දාලා සමස්ත තේ අපනයනයම තහනම් කරපු හැටි. අන්තිමට අපිට ඇස්බැස්ටස් තීරණය රිවර්ස් කරන්න උනා.

අප නොබැඳි විදේශ පිලිවෙතක් අනුගමනය කරන රටක්. එවැනි අවස්ථාවකදි එක් බල කඳවුරක් වෙනුවෙන් වක්‍රාකාරව හෝ පෙනී සිටීම නොකල යුතුය.

ජනාධිපතිවරයාගෙ කතාවෙදි එක් අතකින් රුසියාව සමග ගැටුමකට අත්පොත තැබූ අතර අනිත් පසින් ඇමරිකාව සමග විරසකයකටද මග පාද ගත්තේය..

" එක්සත් ජනපදයෙන් ඉල්ලා සිටියා. ට්‍රිබියුටි රාජ්‍ය ආසන්නයේ තියෙන නාවික හමුදාවට අයත් ප්‍රහාරක ගුවන් යානා දෙකක් ශ්‍රී ලංකාවේ මත්තල ගුවන්තොටුපළට පැමිණෙන්න අවසර දෙන්න කියලා. අපි අවසර දුන්නෙ නෑ " 

ප්‍රතිපත්තිමය වශයෙන් එය ඉතා හොඳ තීරණයක්. ඒත් කෝපි කඩේ එංසිනා වගේ ඕවා අගුපිල් ගාන්නෙ කියව කියව යන්න ඕන ඒවා නෙවේ.

ඇමරිකානුවන්ගෙ අංක එක තමයි අභිමානය. ඒ වෙනුවෙන් ඔවුන් ඕනෑම කැපකිරීමක් කරනවා. ඒ වගෙ රටක් සමග මේ වගෙ යුධ වාතාවරණයකදි, ඩොනල්ඩ් ට්‍රම්ප් වගෙ හිතට එන එන දේ කරන පිස්සු කෙලින නායකයෙක් එක්ක ගනුදෙනු කරනකොට මීට වඩා ගොඩක් ප්‍රවේශමෙන් වචන පාවිච්චි කරන්න ඕන.

ශ්‍රී ලංකාව වගේ රටක් ඒ මොහොතේ ඇමරිකානු ඉල්ලීම ප්‍රතික්ෂේප කිරීම ඔවුන් සාධාරණ දෙයක් කියලා පිලිගත්තත් මං පොර වෙන්න අනුර ප්‍රසිද්ධියෙ එවැනි ඉල්ලීමක් ප්‍රතික්ෂේප කිරීම පිළිබඳව පාර්ලිමේන්තුවේ ප්‍රකාශ කිරීම ( හරිම වචනෙ පාරම්බෑම ) ඔවුන් කෙසේ පිළිගනී දැයි සැක සහිතය.

" හොඳට නරකට දෙකට කටමය " කියලා පැරැන්නො කියලා තියෙන්නෙ නිකං නෙවෙයි.

රාජ්‍ය නායකයෙක්ගෙ වචන නිදි යහනෙ කපල් එකකගෙ වචන වගෙ වෙන්න ඕන. කරන හැමදේම එළිපිට කියන්නෙ නෑ. අපේ ජනාධිපතිතුමා අර හෙඩ් ප්‍රිෆෙක්ට් වගේ කියනවා විතරක් නෙවේ වීඩියොත් ලීක් කරනවා.

භූදේශපාලනය ( Geopolitics) ගැන මෙලෝ අවබෝධයක් නැතුව කටට එන්නන් වාලෙ වචන කියවීම මගින් හානියක් සිද්ධ වෙන්නෙ පෞද්ගලිකව අනුරට නොව සමස්ත රටටමය.

මේ කතා කරන්නේ තඹුත්තේගම තනි සිග්නල් කණුව යට රන් බංඩාගෙ පුතා නොව ශ්‍රී ලංකා ප්‍රජාතන්ත්‍රවාදී සමාජවාදී ජනරජයේ විධායක ජනාධිපති අනුර කුමාර දිසානායක රටේ උත්තරීතර ආයතනය වන පාර්ලිමේන්තුවේදීය.

රාජ්‍ය නායකයෙක්ගෙ වචන හැසිරවීම පිළිබඳව මම එක් සුන්දර උදාහරණයක් දෙන්නම්..

1963 දී සිරිමාවෝ මැතිණිය රුසියාවට යනවා...

එවකට ඈ ලෝකයෙ පලමු වෙනි කාන්තා අගමැතිනිය.

ඇය රුසියාවට යන විට රුසියාවෙ ශීත සෘතුව පැමිණිලා. රුසියාවේ සීතල කොපමණ දැඩිද කියලා කියන්න මම එක් උදාහරණයක් පමණක් කියන්නම්.

දෙවන ලෝක යුද්ධයෙහිදී ජර්මනිය රුසියාවට පහර දෙනවා. රුසියාව තමන්ගෙම නගර විනාශ කරමින් පසුබසිනවා. ඒක උපක්‍රමික පසුබැසීමක්. 

ඔවුන් පසු බැස්සෙ ශීත සෘතුව පැමිණෙන තුරු. ශීත ඍතුව පැමිණි වහාම රුසියානු රතු හමුදාව ජර්මනියේ නාසි හමුදාවට පහර දී පරාජය කරනවා. රුසියාවේ ඒ ජයග්‍රහණයට හේතුව වූයේ ශීත සෘතුව.

මැතිණිය රුසියාවට සම්ප්‍රාප්ත වූ වහාම රුසියානු අගමැති නිකීතා කෲෂප් මැතිණියට මෙහෙම කියනවා 

" සරත් සෘතුවේ හිතුවක්කාර ශිතල ඔබතුමියට කරදර කරනවා "

මැතිණිය මෙහෙම උත්තර දෙනවා.. 

" ලංකාවේ ජනතාවට ඔබේ ජනතාව දක්වන මිත්‍රත්වයේ උනුසුම නිසා මට ඒ ශීතල බිදක්වත් දැනෙන්නෙ නැහැ"

බලන්න ඒ වචනවල තියෙන ලෙංගතු බව. තැනට සුදුසු බව... ලෝකය දිනන්නෙ එහෙමයි..

- නිලන්ත සත්සර ගමගේ ගේ මුහුණු පොතෙන්