භාණ්ඩාගාරයේ ඉතිරි ට්‍රිලියනය අරන් තියෙන්නේ 11.5% පොලියට.. අවුරුද්දට කෝටි දෙදහසක් ගෙවනවා.. - පාඨලී චම්පික රණවක

Mar 12, 2026 at 05:24 AM

|

Lanka Leader

වත්මන් රජය මේ වන විට බිය තුනකින් හෙවත් ‘තුම්බියකින්’ පෙළෙමින් සිටින බව හිටපු අමාත්‍ය පාඨලී චම්පික රණවක මහතා පවසයි.

මාධ්‍ය හමුවක් අමතමින් ඒ මහතා කියා සිටියේ ඇත්ත හෙළිදරව් වීමේ බිය, නොහැකියාවේ බිය සහ අන් අයගේ හැකියාව පිළිබඳ බිය රජය දැඩි ලෙස ග්‍රහණය කරගෙන ඇති බවයි.

රජය බලයට පත්වීමට පෙර කළ ප්‍රකාශ සහ වර්තමාන ක්‍රියාකලාපය අතර ඇති පරස්පරතාවය හේතුවෙන් ඔවුන් දැඩි ලැජ්ජාවකට පත්ව ඇති බව රණවක මහතා සඳහන් කළේය. 2025 ජනවාරි මස අගභාගයේදී මතුවූ කන්ටේනර් 323ක ගැටලුව සහ ඉන් දෙකක තිබී හමු වූ ‘අයිස්’ මත්ද්‍රව්‍ය පිළිබඳ පරීක්ෂණවලට සිදුවූ දෙයක් නැති බවත්, ඒ පිළිබඳ මුදල් අමාත්‍යාංශ වාර්තාව මෙතෙක් පිළිගෙන නැති බවත් ඔහු අනාවරණය කළේය.

එසේම, 2025 පෙබරවාරි 9 වනදා පානදුර උපපොළට වඳුරෙකු පැනීමෙන් විදුලිය බිඳ වැටුණු බව පැවසුවද, සත්‍ය වශයෙන්ම එය වික්ටෝරියා ජලාශයේ විදුලිය විසන්ධි වීමක් (Trip) බවත්, එමගින් රුපියල් කෝටි 660ක පාඩුවක් සිදුවූ බවත් ඒ මහතා පැවසීය. මීට අමතරව, ‘දිට්ඨවා’ සුළි කුණාටුව පිළිබඳව මහවැලි දත්ත මධ්‍යස්ථානය කලින්ම අනතුරු අඟවා තිබියදීත්, බලධාරීන් නිසි පියවර නොගෙන රාත්‍රී කාලයේ පොල්ගොල්ල හා කොත්මලේ ජලාශවල ගේට්ටු විවෘත කිරීම නිසා විශාල ජීවිත හා දේපළ හානියක් සිදුවූ බවට ඔහු චෝදනා කළේය.

රජය ආර්ථිකය හසුරුවන ආකාරය පිළිබඳව විවේචනය කළ හිටපු ඇමතිවරයා, මහා බැංකුවේ රුපියල් කෝටි ලක්ෂයක් ඉතිරි වී ඇති බව පැවසුවද, එය නඩත්තු කිරීම සඳහා වාර්ෂිකව කෝටි 2000ක් වැය වන බවත්, එම මුදල් ලබාගෙන ඇත්තේ 11.5%ක ඉහළ පොලියකට බවත් පෙන්වා දුන්නේය. ලංකා ඉතිහාසයේ පළමු වතාවට ප්‍රාග්ධන වියදම් 14%ක සීමාවට ගෙන ආ එකම ආණ්ඩුව මෙය බවත්, මෙය ඇමතිවරුන්ගේ නොහැකියාව පෙන්නුම් කරන බවත් ඔහු පැවසීය.

සුළි කුණාටුවෙන් මාස හතරක් ගතවී ඇතත් වින්දිතයන් තවමත් කූඩාරම්වල දිවි ගෙවන බවත්, ස්වේච්ඡා සංවිධානවල සහාය පවා රජය ප්‍රතික්ෂේප කර ඇති බවත් රණවක මහතා වැඩිදුරටත් සඳහන් කළේය.

රජය තම නොහැකියාව වසා ගැනීමට හැකියාව ඇති පුද්ගලයින් දඩයම් කරමින් සිටින බවත්, පොලිස් රාජ්‍යයක් හරහා දේශපාලන පක්ෂ මර්ධනය කිරීමට උත්සාහ කරන බවත් හිටපු ඇමතිවරයා චෝදනා කළේය,. රෝහණ විජයවීර මහතා වරක් ජේ.ආර්. ජයවර්ධන මහතාට කළ අනතුරු ඇඟවීමක් සිහිපත් කළ රණවක මහතා, "මර්ධනය කරන්න පුළුවන්, හැබැයි මර්ධනය පෙරළා එනවා" යන දර්ශනය ආණ්ඩුව මතක තබා ගත යුතු බව අවධාරණය කළේය.

අවසාන වශයෙන් ඔහු කියා සිටියේ, නොහැකියාවෙන් පෙළෙන රජය හැකියාව ඇති මිනිසුන් දඩයම් කිරීමට ගන්නා උත්සාහය දෙස තමන් විමසිල්ලෙන් බලා සිටින බවයි