පාස්කු සිද්ධියේ තෙවැනි සැකකරු ලෙස සලේ නම් කෙරේ..

Mar 5, 2026 at 05:13 PM

|

Lanka Leader

අපරාධ පරීක්ෂණ දෙපාර්තමේන්තුව විසින් ත්‍රස්තවාදය වැළැක්වීමේ පනත යටතේ රඳවා ප්‍රශ්න කරන විශ්‍රාමික මේජර් ජෙනරාල් තුවාන් සුරේෂ් සලේ යන අය පාස්කු ඉරු දින සිදු වූ ප්‍රහාරයන්ට අදාලව සිදු කරන විමර්ශනයේ තෙවන සැකකරු ලෙස නම් කරන බව අපරාධ පරීක්ෂණ දෙපාර්තමේන්තුව අද (5) කොටුව මහේස්ත්‍රාත් ඉසුරු නෙත්තිකුමාර හමුවේ දැනුම් දුන්නේය.

එම සිද්ධියට අදාලව 2026 යේ පෙබරවාරි මස 25 වන දින අත්අඩංගුවට ගැනීමක් සිදු කළ බවත් එම සිද්ධිය සම්බන්ධයෙන් සිදු කරනු ලබන විමර්ශනයට අදාලව ඔහු මේ වනවිට අවසරය මත දින 90 රඳවා ප්‍රශ්න කරනු ලබන බවත් අපරාධ පරීක්ෂණ දෙපාර්තමේන්තුව අධිකරණයට දන්වා සිටියේය.

මෝසමක් ගොනු කරමින් අපරාධ පරීක්ෂණ දෙපාර්තමේන්තුව මේ බව අධිකරණයට දැනුම් දුන්නේය.

සැකකරුවෙක් ලෙස නම් කිරීමට සාක්ෂි තිබේදැයි මහේස්ත්‍රාත්වරයා එහිදී විමසා සිටි අතර මෙතෙක් කරන ලද විමර්ශන අනුව සාක්ෂි අනාවරණය වී ඇතැයි අපරාධ පරීක්ෂණ දෙපාර්තමේන්තුව අධිකරණයට දන්වා සිටියේය.

එසේම සැකකරු රැඳවුම් නියෝග මත සිටින බැවින් සැකකරු නිරීක්ෂණය කරන ලෙසද අපරාධ පරීක්ෂණ දෙපාර්තමේන්තුව අධිකරණයෙන් ඉල්ලා සිටියේය.

මෙම සිද්ධියට අදාලව නැගෙනහිර පළාතේ හිටපු පොලිස් ස්ථානාධිපතිවරයෙක් ඇතුලු තවත් දෙදෙනෙක් සැකකරුවන් ලෙස නම්කර තිබේ.

පාස්කු ප්‍රහාර මාලාවට පෙර සිදු වූ වව්නතිව් පොලිස් නිලධාරින් දෙදෙනා ගේ ඝාතනය සහ සයින්දමරුදු බෝම්බ පුපුරුවා හැරිමේ සිද්ධිය සම්බන්ධයෙන් වන සංවේදී තොරතුරු සම්බන්ධයෙන් මෙම විමර්ශනය සිදු කරනු ලබන බවද අපරාධ පරීක්ෂණ දෙපාර්තමේන්තුව අධිකරණයට දැන්වීය.

සිදු කරනු ලබන විමර්ශනයට අදාලව වැඩිදුර වාර්තාවක්ද අධිකරණයට ඉදිරිපත් කරනු ලැබීය.