කොළඹ වරායට ආසන්නව ඇති තවත් ඉරාන නෞකාවක් ගැන සජිත්ගෙන් හෙළිදරව්වක්..

Mar 5, 2026 at 12:38 PM

|

Lanka Leader

තවත් ඉරාන නෞකාවක් කොළඹ වරාය ආසන්නව ඇති බවට තොරතුරු වාර්තා වන බව විපක්ෂ නායක සජිත් ප්‍රේමදාස පවසයි.

එසේම ඒ පිළිබඳව පැහැදිලි ප්‍රකාශයක් රජයෙන් අවශ්‍ය බවයි විපක්ෂ නායකවරයා සඳහන් කළේ.

පාර්ලිමේන්තුවේදී අද (05) විශේෂ ප්‍රකාශයක් සිදු කරමින් මේ බව ඔහු පවසා සිටියේය.

එමෙන්ම ගාල්ල වරාය ආසන්න මුහුදු සීමාවේ මුහුදුබත් වූ ඉරාන නාවුක හමුදාවට අයත් නෞකාවේ නාවිකයන් බේරා ගැනීමට ශ්‍රී ලංකා නාවුක හමුදාව කටයුතු කිරීම සම්බන්ධයෙන් සිය ස්තූතිය පුදකර සිටින බවයි විපක්ෂ නායකවරයා සඳහන් කළේ.

මෙම ප්‍රහාරය සිදු වූ නිශ්චිත ස්ථානය හෝ එය මෙරට මුහුදු සීමාවට හෝ අනන්‍ය ආර්ථික කලාපයට සම්බන්ධද යන්න සහ රජය ගත් රාජ්‍ය තාන්ත්‍රික ආරක්ෂිත පියවර ගැන මෙතෙක් නිල ප්‍රකාශයක් ඉදිරිපත් කර නොමැති බව ඔහු පැවසුවේය.

එක්සත් ජාතීන්ගේ ජාත්‍යන්තර නීතිය අනුවත් ජාත්‍යන්තර මානව නීතිය ඇතුළු නීති අනුව රටක මුහුදු සීමාවන් තුළ කටයුතු කළ ආකාරය දැක්වෙන බවත්, රටේ සෛරීභාවය ඒ්කීය භාවය සහ ජාතික ආරක්ෂාව සම්බන්ධයෙන් කටයුතු කිරීම රජයේ මෙන්ම පාර්ලිමේන්තුවේද යුතුකමක් බවත්, ඔහු සඳහන් කළේය.

එසේම මෙවැනි සංවේදී සිදුවීමක් රට ආසන්නයේ සිදුව තිබියදී සභාව දැනුවත් නොකිරීම මන්ත්‍රීවරුන්ගේ ව්‍යවස්ථානුකූල වගකීම ඉටු කිරිමට බාධාවක් බවයි විපක්ෂ නායකවරයා මෙහි දී පැවසුවේ.

සීඑන්එන්, බීබීසී, අල්ජසීරා ආදිය සබ්මැරීනයක් හරහා ටෝපිඩෝ ප්‍රහාරයක් සිදුව ඇති බවට ජාත්‍යන්තර මාධ්‍ය පවා කියන විට මෙරට ආරක්ෂක අමාත්‍යාංශය එවැනි දෙයක් සිදු නොවන බවට පවසන බවත්, අමෙරිකාවේ ආරක්ෂක ලේකම්වරයා පවා එවැනි සබ්මැරීන් ටෝපීඩෝ ප්‍රහාරයක් එල්ල කළ බව පවසන විට රජය මේ ප්‍රශ්න ගැන නිල ප්‍රකාශයක් කළ යුතු බවත්, විපක්ෂ නායකවරයා සඳහන් කළේය.

ගාල්ලේ මෘත ශරීර විශාල ප්‍රමාණයක් ගෙන්වා ඇති අතර, මේවා තැන්පත් කරන්න අඩි 40 කන්ටේනර් අවශ්‍ය බවට වෛද්‍ය අංශ ඉල්ලා සිටින නිසා එය රජය ලබා දිය යුතු බවත්, ඔහු එහිදී පවසා තිබේ..

ජාතික ආරක්ෂාව ගැන මේසයක් බංකුවක් ගෙන ආවොත් ටියුෂන් දෙන්නම් යැයි කියූ මැති ඇමතිවරුන් ඉන්න වත්මන් රජයේ අය අප රටේ මුහුදු සීමාවේ සහ අනන්‍ය ආර්ථික කලාපයේ සිදුවන දේවල් නොදැන සිටීම පුදුමයට කරුණක් බවයි විපක්ෂ නායකවරයා මෙහි දී වැඩිදුරටත් පැවසුවේ.