ඉන්ධන හිඟයෙන් වී අස්වනු නෙළීමේ කටයුතුවලටත් බලපෑම්..

Mar 3, 2026 at 11:03 AM

|

Lanka Leader

ඉන්ධන හිඟය නිසා වී අස්වනු නෙළීමේ කටයුතුවලටත් බලපෑම් සිදුවෙමින් තිබෙන බවත් ඇතැම් ප්‍රදේශවල ඉන්ධන පිරවුම්හල් වෙත අස්වනු නෙළන යන්ත්‍ර රැගෙන ගොස් ඉන්ධන ලබා ගැනීමට සිදුව තිබෙන බවත් ජාතික ගොවිජන එකමුතුව සඳහන් කරයි.

ඇතැම් ඉන්ධන පිරවුම්හල්  වසා දමා තිබූ බවත් මීට අමතරව සමහර ඉන්ධන පිරවුම්හල්වලින් බූලිවලට ඉන්ධන ලබා නොදීම නිසා වී අස්වනු නෙළන යන්ත්‍රවලට අවශ්‍ය ඉන්ධන සපයා ගැනීමට නොහැකි වූ බව ද එම සංගමයේ සභාපති අනුරාධ තෙන්නකෝන් පවසයි.

පසුගිය දිනවල ඇති වූ වැසි තත්ත්වය නිසා අස්වනු නෙළීමේ කටයුතුවලට දැඩි ලෙස බාධා සිදුවූ බවත් මේ දිනවල පවතින වියළි කාලගුණ තත්ත්වය හමුවේ ඉන්ධන හිඟයක් මතුවීමෙන් අස්වනු නෙළා ගැනීමට නොහැකි වී තිබෙන බවත් ඔහු සඳහන් කළේ ය.

වර්ෂා තත්ත්වය නිසා වී ඇට පොළොවට වැටී නැවත පැළවීම් සිදුව තිබෙන බවත් අධික ලෙස වියළී තිබෙන ගොයම් නිසි අවස්ථාවේදී අස්වනු නෙළා ගැනීමට නොහැකි වුවහොත් වී ඇට පොළොවට හැලෙන බව ත් ඒ තුළින් ද ගොවීන්ට විශාල පාඩුවක් සිදුවන බව ද සභාපතිවරයා සඳහන් කළේ ය.

මේ නිසා කෝටා ක්‍රමයක් යටතේ හෝ අස්වනු නෙළන ප්‍රදේශවල පිහිටි අස්වනු නෙළන යන්ත්‍ර සඳහා ඉන්ධන ලබා දීමට කඩිනමින් වැඩපිළිවෙළක් සකස් විය යුතු බව ත් මෙවර කන්නය ආරම්භයේදී ඇති වූ ආපදා තත්ත්වය නිසා සැලකිය යුතු කුඹුරු ප්‍රමාණයකට හානි සිදුවී තිබෙන නිසා මාස් කන්නයේ අස්වැන්න අඩු වන බවත් පැවසීය.

පවතින ඉන්ධන අර්බුදකාරි තත්ත්වයත් සමග පොළොන්නරුව ඇතුළු මහවැලි බී කලාපයේ වී අස්වනු නෙළීමේදී යන්ත්‍රසූත්‍ර හිමිකරුවන් අක්කර දෙකහමාරක වී අස්වනු නෙළීම සඳහා රුපියල් 45,000- 50,000ත් අතර මිලක් අය කර ගැනීමෙන් තමන් දැඩි අසීරුතාවට පත්ව ඇති බව මහවැලි බී කලාපයේ ගොවි සංවිධාන නියෝජිතයෝ සහ ගොවීහු සඳහන් කරති.

මීට පෙර කන්නවලදී එම යන්ත්‍රසූත්‍ර හිමිකරුවන් අක්කර දෙකහමාරක වී අස්වනු නෙළීමට අය කරනු ලැබුවේ රුපියල් 40,000ක පමණ වැනි මිලක් බව ත් මෙවර ඔවුන්ට පවතින ඉන්ධන අර්බුදය සහ ඉන්ධන ලබා ගැනීමේදී මුහුණ පා ඇති ගැටලුකාරී තත්ත්වය හේතුවෙන් රුපියල් 45,000ත් 50,000ත් අතර මිලක් අය කර ගැනීමට කටයුතු කිරීමෙන් තමන් දැඩි අසීරුතාවට පත්ව ඇති බවත් ගොවීහු කියති.

- මව්බිම