කියුබානු දේශසීමා ආරක්ෂකයින් විසින් අමෙරිකානු බෝට්ටුවකට වෙඩි තබයි..

Feb 26, 2026 at 04:08 PM

|

Lanka Leader

කියුබානු දේශසීමා ආරක්ෂකයින් විසින් අමෙරිකා එක්සත් ජනපදයේ ලියාපදිංචි (speedboat) බෝට්ටුවකට වෙඩි තබා පුද්ගලයින් සිව්දෙනෙකු ඝාතනය කර තිබේ. 

ඒ අනුව අමෙරිකා එක්සත් ජනපදයේ ලියාපදිංචි බෝට්ටුවකින් (speedboat) කියුබානු මුහුදු සීමාවට ඇතුළු වූ පුද්ගලයින් සිව්දෙනෙකු මෙලෙස වෙඩි තබා ඝාතනය කර ඇති බව කියුබානු රජය පවසයි.

කියුබාවේ උතුරු වෙරළ තීරයේ දූපතක් අසල සිදු වූ මෙම සිද්ධියෙන් තවත් මගීන් හය දෙනෙකු තුවාල ලබා තිබේ.

කියුබාවේ අභ්‍යන්තර කටයුතු අමාත්‍යාංශය පවසන්නේ බෝට්ටුවේ මගීන් ඔවුන් වෙත පැමිණි කියුබානු වෙරළාරක්ෂක නෞකාවකට වෙඩි තබා තිබෙන බවයි.

ෆ්ලොරිඩා ප්‍රාන්තයේ FL7726SH අංකය යටතේ ලියාපදිංචි කර ඇති  වේග බෝට්ටුවේ සන්නද්ධ පුද්ගලයින් 10 දෙනෙකු සිටි බව බලධාරීන් තහවුරු කර ඇති අතර, ඔවුන් රඳවාගෙන සිටි අයගේ මූලික ප්‍රකාශයන්ට අනුව, ත්‍රස්තවාදී අරමුණු සඳහා ආක්‍රමණයක් සිදු කිරීමට අදහස් කර ගෙන සිට ඇති බවද අනාවරණය වී තිබේ.

එම බෝට්ටුවේ තිබී ප්‍රහාරක රයිෆල්, අත් තුවක්කු, වැඩිදියුණු කළ පුපුරණ ද්‍රව්‍ය (මොලොටොව් කොක්ටේල්), ශරීර සන්නාහ, දුරේක්ෂ දර්ශන සහ සැඟවුණු නිල ඇඳුම් ආදිය අත්අඩංගුවට ගෙන ඇත.

මූලික ප්‍රශ්න කිරීම් මත පදනම්ව, අමිජයිල් සැන්චෙස් ගොන්සාලෙස්, ලියොර්ඩන් එන්රික් කෲස් ගෝමස්, කොන්රාඩෝ ගැලින්ඩෝ සාරියෝල්, ජෝස් මැනුවෙල් රොඩ්‍රිගස් කැස්ටෙලෝ, ක්‍රිස්ටියන් අර්නස්ටෝ අකොස්ටා ගුවේරා, රොබර්ටෝ අස්කෝරා කොන්සුග්‍රා යන පුද්ගලයින් හඳුනාගෙන ඇති අතර, මියගිය අය අතර මයිකල් ඔර්ටෙගා කැසනෝවා නම් පුද්ගලයාවද හඳුනාගෙන ඇත. 

ඔවුන් සියලුදෙනා එක්සත් ජනපදයේ පදිංචි කියුබානු ජාතිකයන් වන බවත්, එක්සත් ජාතීන්ගේ ආරක්ෂක කවුන්සිලයේ 1373 යෝජනාව, ජාත්‍යන්තර නීතිය සහ කියුබානු දේශීය නීති සම්පාදනයට අනුකූලව නම් කරන ලද කියුබාවේ පුද්ගලයින් සහ ආයතනවල ජාතික ලැයිස්තුවේ පෙනී සිටින අමිජයිල් සැන්චෙස් ගොන්සාලෙස් සහ ලියොර්ඩන් එන්රික් කෲස් ගෝමස් ඇතුළු බොහෝ දෙනෙකුට අපරාධ සහ ප්‍රචණ්ඩකාරී ක්‍රියාකාරකම් සම්බන්ධ පූර්ව වාර්තා ඇති බවත් කියුබාවේ අභ්‍යන්තර කටයුතු අමාත්‍යාංශය පවසයි.

ඔවුන් දැනට අපරාධ විමර්ශනයකට ලක්ව සිටින අතර කියුබාවේ හෝ විදේශයන්හි ත්‍රස්තවාදී ක්‍රියා ප්‍රවර්ධනය කිරීම, සැලසුම් කිරීම, සංවිධානය කිරීම, මූල්‍යකරණය කිරීම, සහාය දීම හෝ ක්‍රියාත්මක කිරීම සම්බන්ධයෙන් චෝදනා එල්ල වී ඇති පුද්ලයන් සම්බන්ධයෙන් කියුබානු බලධාරීන් විසින් පරීක්ෂණ පවත්වමින් සිටියි.