මෙතරම් බාල ගල් අඟුරු කිසිදා ගෙනැත් නෑ..- CEB ඉංජිනේරු සංගමය

Feb 25, 2026 at 03:46 PM

|

Lanka Leader

නොරොචෝලේ ලක්විජය බලාගාරය සඳහා මෑතකදී ආනයනය කරන ලද ප්‍රමිතියෙන් තොර ගල් අඟුරු තොග හේතුවෙන් ලංකා විදුලිබල මණ්ඩලයට සහ පාරිභෝගිකයාට රුපියල් බිලියන ගණනක අලාභයක් සිදුව ඇති බව ලංකා විදුලිබල මණ්ඩල ඉංජිනේරු සංගමය (CEBEU) පවසයි. 

මෙම අලාභයට වගකිව යුතු පාර්ශවයන් වහාම හඳුනාගෙන ඔවුන්ට එරෙහිව දැඩිව නීතිය ක්‍රියාත්මක කළ යුතු බව එම සංගමය අවධාරණය කර සිටී.

විශේෂ මාධ්‍ය නිවේදනයක් නිකුත් කරමින් එම සංගමය පෙන්වා දෙන්නේ, ලක්විජය බලාගාරයේ ආරම්භයේ සිට මේ දක්වා විවිධ සමාගම් හරහා ගල් අඟුරු ආනයනය කර ඇති නමුත්, මෙවැනි මට්ටමේ ප්‍රමිතියෙන් තොර ගල් අඟුරු තොගයක් මීට පෙර වාර්තා වී නොමැති බවයි.

මෙරට වාර්ෂික විදුලි අවශ්‍යතාවයෙන් 40% ක් පමණ සපයන ලක්විජය බලාගාරය පද්ධතියේ පවතින අවම පිරිවැය සහිත තාප විදුලි බලාගාරය වේ. එබැවින් එහි සිදුවන මෙවැනි අක්‍රමිකතා පාරිභෝගිකයාගේ විදුලි බිල කෙරෙහි සෘජුවම බලපානු ලබයි.

මෙම අලාභය ගණනය කිරීම අමාත්‍යාංශ අභ්‍යන්තර කමිටුවකට පමණක් සීමා නොකළ යුතු බවත්, ඒ සඳහා විනිවිදභාවයකින් යුත් නිවැරදි තාක්ෂණික ඇගයීමක් අවශ්‍ය බවත් සංගමය පෙන්වා දෙයි.

මෙම අක්‍රමිකතාවල සත්‍යය හෙළි කිරීමට ඉදිරිපත් වන බලාගාර සේවකයින්ට හෝ ඉංජිනේරු සංගමයේ සාමාජිකයින්ට කිසිදු ආකාරයක බලපෑමක් එල්ල නොකළ යුතුය. එවැනි බලපෑමක් එල්ල වුවහොත් ඊට එරෙහිව දැඩි වෘත්තීය සමිති ක්‍රියාමාර්ග ගන්නා බවටද සංගමය අනතුරු අඟවා සිටී.

මෙම තත්ත්වය ඉතා බරපතල වෘත්තීයමය ගැටලුවක් ලෙස නිරීක්ෂණය කරන බව පවසන ලංවිම ඉංජිනේරු සංගමය, මහජන මුදල් අවභාවිත වීම වැළැක්වීමට බලධාරීන් කඩිනමින් මැදිහත් විය යුතු බවද සඳහන් කරයි.