සමන් බලන්න චන්ද්‍රිකාත් වැලිකඩ එයි..

Feb 18, 2026 at 01:40 PM

|

Lanka Leader

දැනට රිමාන්ඩ් බන්ධනාගාරගත කර සිටින හිටපු ජනාධිපති ලේකම් සමන් ඒකනායකගේ සුවදුක් විමසීම සඳහා හිටපු ජනාධිපතිනි චන්ද්‍රිකා බණ්ඩාරනායක කුමාරතුංග මැගසින් බන්ධනාගාරය වෙත ගොස් තිබේ.

බන්ධනාගාරයෙන් පිටතට පැමිණි පසු මාධ්‍ය වෙත විශේෂ ප්‍රකාශයක් කරමින් ඇය සඳහන් කළේ, තමන් සාමාන්‍යයෙන් බන්ධනාගාරවලට නොපැමිණෙන නමුත්, සමන් ඒකනායක මහතා "යහපත් පුද්ගලයෙකු සහ දක්ෂ පරිපාලකයෙකු" වන බැවින් ඔහුව බැලීමට පැමිණි බවයි.

ඇය වැඩිදුරටත් පවසා සිටියේ මෙවැනි අදහසක්.

''මම සාමාන්‍යයෙන් හිර ගෙවල්වලට එන්නේ නැහැ .මම ඇයි අද ආවේ කියන ප්‍රශ්නෙට මම කෙටියෙන් උත්තරයක් දෙන්නම්. විජය කුමාරතුංග මගේ මහත්මයා හිරේ හිටපු කාලේ මම හැමදාම බත් ඇද්දා විජයට. රෑට කෑමවත් ගෙනියන්න දුන්නෙ නෑ අනිත් හිරකරුවන්ට වගේ. දවල්ටයි රෑටයි එකට ගෙනියන්නේ. රෑ කෑමත් පිළුණු වෙලා විසි කරනවා කියනවා. කොහොම හරි ඒක වෙන කතාවක්.

මම ආවේ පළවෙනි වතාවට, ඊට අතරතුර එක සැරයක් ඇවිල්ල තියෙනවා. කෙටියෙන්ම ලොකු විශ්වාසයක් මගේ තියෙනවා රටේ හිටපු ජ්‍යෙෂ්ඨ පාලකයෙක් සහ සාර්ථකව රට පාලනය කරපු කෙනෙක් හැටියට මේ රට ඉදිරියට ගෙන යන්න නම් අපට දක්ෂ අත්දැකීම් තියන රාජ්‍ය සේවයක් අවශ්‍යයි . රජය, කැබිනට් එක රැඳෙන්නේ පරිපාලන සේවය මත. මම හැමදාම පරිපාලන සේවයට කිව්වේ ඔබගේ දේශපාලනය දොරෙන් එළියට තියලා එන්න කියලා. කාර්යාලයට එනකොට කාර්‍යාල කටයුතු ඉටු කරන්න ඕනේ රජයේ ප්‍රතිපත්ති .ගෙදර ගියාට පස්සේ ඕන එකක් කරන්න. ඒක නිසා මම මගේ විරෝධතාවය ප්‍රකාශ කරන්න මේ මම ආවේ. එතුමා බොහොම හොඳ පුද්ගලයෙක් .මම එතුමත් එක්ක බොහොම කිට්ටුවෙන් වැඩ කරලා තියෙනවා පහුගිය කාලවල. දක්ෂ පාලකයෙක් ඒක නිසා මම එතුමා බලන්න ආවා. ''