එළවළු නිෂ්පාදකයාටත් පාරිභෝගිකයාටත් සහනයක් දිය යුතුයි - දෙවන පරපුර මෙහෙයුම් මණ්ඩල සාමාජික නලින්ද සේනාරත්න

Feb 15, 2026 at 08:46 AM

|

Lanka Leader

පසුගිය 13 දින දෙවන පරපුර පක්ෂය මාධ්‍ය හමුවක් කැදවා පක්ෂයේ මෙහෙයුම් මණ්ඩල සාමාජික නලින්ද සේනාරත්න මහතා පවසා සිටියේ ආර්ථික මධ්‍යස්ථාන සියල්ල එක් රාජ්‍ය සමාගමක් යටතට පත් කිරීම යහපත් ක්‍රියාවක් බවත් එය එළවළු නිෂ්පාදකයාටත් පාරිභෝගිකයාටත් සහනයක් වන්නට නම් ගොඩ නැගිමට නියමිත ආයතනයට විදිමත් වැඩපිළිවෙලක් තිබිය යුතු බවත්ය. 

ඒ් සදහා තම පක්ෂය යෝජනා 10ක් ආණ්ඩුවට ඉදිරිපත් කරන බවත් ඔහු පැවසීය. 

එම යෝජනා පහත පරිදි වේ..

01) එම සමාගම 100% රාජ්‍ය සමාගමක් විය යුතු අතර කිසිසේත්ම එහි කොටස් දේශීය හෝ විදේශීය පුද්ගලික සමාගම්වලට පැවරීමට කටයුතු නොකරන බවට සහතිකයක් ලබා දිය යුතුය.

02) එම සමාගම මගින් ඉටුකළ යුතු පහත සඳහන් ජාතික වගකීම් ඉටු කිරීම සඳහා නව නීතියක් මගින් නීතිගත කළ යුතුය.

03) එම නීතිය මගින් (එතෙක් පවතින සමාගම යටතේ පරිපාලන වශයෙන් පහත සඳහන් වගකීම් සහ කොන්දේසි ඉටුකළ යුතුය)

i)  කෘෂිකර්ම ගොවිජන සේවා සහ හෙට්ට කොබ්බෑකඩුව ගොවි පර්යේෂණ ආයතනය ආදී   ආයතනය නියෝජනය වන ලෙස විශේෂඥ මණ්ඩලයක් පත් කිරීම.

ii)  දැනට පවතින වෙළඳුන් සහ අතරමැදියන්ගේ මැදිහත්වීම සහිත මිලදී ගැනීමේ මධ්‍යස්ථාන ක්‍රමවේදය වෙනුවට ගොවීසංවිධාන සහ ගොවි සමූපකාර පිහිටුවීම සහ ඒවා යොදා ගැනීම මගින් විකිණීම හෙවත් අලෙවි කරන මධ්‍යස්ථාන බවට පත්කළ යුතුය. එනම් කඩ කාමර සියල්ල නිෂ්පාදනාගාර හෙවත් ගොවියා මගින් පාලනය කළ යුතු අතර ඒවා වෙළඳුන්ට නැවත බඳු දීම තහනම් කළ යුතුය.

iii) තෝරා ගත් කෘෂි නිෂ්පාදන ප්‍රමාණයකට නිෂ්පාදනය පිරිවැය අනුව අවම සහායක මිල නියම කළ යුතුය. (ඉන්දියාවේ බෝග 22ක් සඳහා එසේ MSP නියම කර ඇත.) 

iv) එම සමාගම මගින් (අදාල නීතිය මගින්) ගොවී සංවිධාන සහ සමූපකාර හෝ ගොවි සමාගම් නිශ්චිත කොන්දේසිය යටතේ ලියාපදිංචි කළයුතුය.

v) කඩ කාමර සහ සෙසු පහසුකම් සඳහා වෙළඳපළ මිලට වඩා අඩු සාධාරණ මිලක් නියම කළ යුතුය.

vi) ආයතනය ලාභයෙන් යම් ප්‍රතිශතයක් ගොවී ජන සංවර්ධන අරමුදලට බැර කළ යුතු අතර ඒ මගින් ගොවීන්ට පුහුණු සහ තාක්ෂණික දැනුම විශේෂයෙන්ම පශ්චාත් අස්වනු ආරක්ෂාව පිළිබඳව ලබාදිය යුතුය. 

vii) පශ්චාත් අස්වනු ගැටලු සහ නාස්තිය වැළැක්වීම සඳහා කල්තබා ගැනීමේ සීතාගාර පහසුකම් සඳහා සමාගම විසින් ආයෝජනය කළ යුතු අතර ඊට අදාළව ගොවි සංවිධාන වලින් සාධාරණ ගාස්තුවක් අය කළ යුතුය.

viii) අස්වැන්න වැඩිවන විට හෝ වෙනත් හේතු මත මිල පහත වැටීම වැළැක්වීම සඳහා වටිනාකම් එකතු කිරීම හෙවත් සකස් කළ ආහාර වර්ග නිෂ්පාදනය කිරීමේ කර්මාන්ත ආරම්භ කිරීම සඳහා සමාගම සෘජුව මැදිහත්විය යුතුය. ඊට අමතරව ගොවි සමුපකාර හෝ සමාගම් ඒ සඳහා දිරිගැන්වීම මුල්කරගෙන දිරිගැන්වීම් හෙවත් සහන ලබාදිය යුතුය. 

ix) බෙදා හැරීමේ ගැටලු අවම කිරීම මගින් නාස්තිය සහ මිල පහත වැටීම වැළැක්වීම සඳහා සමාගම මුල් වී තොග බෙදා හැරීමේ සමූපකාර සමිතියක් පිහිටුවිය යුතුය. එක් එක් සමාගම මගින් කුලී පදනම යටතේ වාහන ලබා ගැනීම මගින් අන්තර් කාලීනව ගැටලු විසඳිය යුතුය. 

X) අදාල නීතිය මගින් සහ එතෙක් පරිපාලන වශයෙන් සමාගම මගින් ගොවින් සහ මහජනයාගේ ගොවියාගේ ගැටලු සහ පැමිණිලි විභාග කිරීම සඳහා යාන්ත්‍රණයක් පිහිටුවිය යුතුය. එම පැමිණිලි පමණක් විභාග කිරීම සහ ලබාදෙන විසඳුම් ප්‍රසිද්ධ කිරීම සඳහා යාන්ත්‍රණයක් හඳුන්වා දිය යුතුය.