අමරකීර්ති ඝාතනය වූයේ අරගලයට පහර දුන් නිසයි.. 12 දෙනෙකු එල්ලුම් ගස් යැවුවේ බෙදුනු තීන්දුවකින්...- මනුවර්ණ

Feb 15, 2026 at 06:14 AM

|

Lanka Leader

ගාලු මුවදොර අරගල සමයේදී පාර්ලිමේන්තු මන්ත්‍රී අමරකීර්ති අතුකෝරල මහතා ඝාතනය කිරීමේ සිද්ධියට වරදකරුවන් වූ 12 දෙනෙකුට අධිකරණය විසින් මරණ දඬුවම නියම කිරීම සම්බන්ධයෙන් පාර්ලිමේන්තු මන්ත්‍රී ජගත් මනුවර්ණ මහතා සිය අදහස් පළ කළේය. 

අරගලයේ ක්‍රියාකාරී පාර්ශ්වකරුවෙකු ලෙස මෙම පුවත තමන්ට පෞද්ගලිකවම සංවේගයක් දනවන, ඇසීමට අකමැති පුවතක් බව ඔහු සඳහන් කළේය.

බෙදුණු තීන්දුවක් සහ අරගලයේ පසුබිම විනිසුරුවරුන් තිදෙනෙකු ලබා දුන් මෙම තීන්දුව ඒකමතික තීන්දුවක් නොව බෙදුණු තීන්දුවක් බව මන්ත්‍රීවරයා පෙන්වා දුන්නේය. 

අමරකීර්ති අතුකෝරල මහතාගේ මරණය සම්බන්ධයෙන් ද තමන් දැඩි ලෙස කණගාටු වන බවත්, අරගලයක් තුළ එවැනි දෑ සිදු නොවිය යුතු බවත් ඔහු පැවසීය. 

කෙසේ වෙතත්, මෙම ඝාතනය අහම්බෙන් සිදු වූවක් නොව, එදින උදෑසන දේශපාලනඥයන්ගේ මෙහෙයවීමෙන් අරගලකරුවන්ට එල්ල වූ ප්‍රහාර ඇතුළු සිදුවීම් මාලාවක ප්‍රතිඵලයක් බව ඔහු අවධාරණය කළේය.

අධිකරණ මාවතට ගරු කිරීම අධිකරණය විසින් සාක්ෂි මත පදනම්ව ලබා දෙන තීන්දු මහමග කෑකෝ ගසා අභියෝගයට ලක් කළ නොහැකි බවත්, ඊට එරෙහිව යාමට ඇති එකම ක්‍රමය නැවතත් අධිකරණ ක්‍රියාවලියක්ම බවත් මනුවර්ණ මහතා පැවසීය. 

ඒ අනුව, අභියාචනා අධිකරණය හමුවේ මෙම නඩුව නැවත විමසා බැලීමට ඉල්ලීම් කිරීම වැනි නීතිමය මාර්ග ඔස්සේ ඉදිරියට යා හැකි බව ඔහුගේ අදහසයි.

මරණ දඬුවම නියම වූවන් වෙනුවෙන් ජනාධිපති සමාව ඉල්ලා සිටීමට ඇති හැකියාව පිළිබඳව අදහස් දක්වමින් ඔහු කියා සිටියේ, එය ජනාධිපතිවරයාගේ තීරණයක් වුවද, ඊට පෙර උත්සාහ කළ හැකි තවත් නීතිමය අවස්ථා පවතින බවයි.