රිමාන්ඩ් කර සිටින බලංගොඩ කස්සප හිමියන් ඇතුළු පිරිස අද යළි අධිකරණයට..

Feb 11, 2026 at 09:37 AM

|

Lanka Leader

ත්‍රිකුණාමළය බුදු පිළිම සිද්ධිය සම්බන්ධයෙන් රක්ෂිත බන්ධනාගාර ගතකර සිටින බලංගොඩ කස්සප හිමියන් සහ තවත් හිමිවරු තුන්දෙනෙකු ඇතුළු දසදෙනා අද (11) යළි ත්‍රිකුණාමලය මහේස්ත්‍රාත් අධිකරණය වෙත ඉදිරිපත් කිරීමට නියමිතයි.

එසේම, සැකකරුවන් ඉදිරිපත් කළ ඇප අයැදුම පිළිබදව තීන්දුව ත්‍රිකුණාමලය මහාධිකරණයේදී අද ප්‍රකාශයට පත් කිරීමට ද නියමිතයි.

ත්‍රිකුණාමලය ශ්‍රී සම්බුද්ධ ජයන්ති බෝධිරාජ විහාරස්ථාන පරිශ්‍රයේ කුටියක් ඉදිකර බුදු පිළිමයක් තැන්පත් කිරීමේ සිද්ධියට අදාළව බලංගොඩ කස්සප හිමි සහ තවත් හිමිවරුන් තුන්දෙනෙකු ඇතුළු 10 දෙනෙකු පළමුවට රක්ෂිත බන්ධනාගාරගත කෙරුණේ පසුගිය ජනවාරි මස 14 වැනිදායි.

එම අවස්ථාවේ සිට මේ දක්වා අවස්ථා කිහිපයකදී භික්ෂූන් වහන්සේලා ඇතුළු පිරිස අධිකරණයට ඉදිරිපත් කිරීමෙන් පසුව රිමාන්ඩ් කෙරිණි.

අවසන් වරට බලංගොඩ කස්සප හිමියන් ඇතුළු පිරිස පෙරේදා ත්‍රිකුණාමලය මහේස්ත්‍රාත් එස්.එම්.එස්. සම්සුදීන් හමුවට ඉදිරිපත් කිරීමෙන් අනතුරුව අද දක්වා රක්ෂිත බන්ධනාගාර ගත කෙරිණි.

එහිදී බලංගොඩ කස්සප හිමියන් අධිකණය හමුවේ ප්‍රකාශයක් කරමින් කියා සිටියේ තමන් වහන්සේට සිර මැදිරියේදී ආහාර ලබාදීම සිදු කරන්නේ ස්වාමීන් වහන්සේලාට ආහාර වැළඳීමට කැප වන කාලය පසුවී පස්වරු කාලයේ බවයි.

ඒ හේතුවෙන් දින කිහිපයක් තමන් වහන්සේ නිරාහාරව සිටි බවද උන්වහන්සේ අධිකරණය හමුවේ සඳහන් කළහ.

එහිදී බන්ධනාගාර නිලධාරීන් සඳහන් කළේ 400කට අධික රැඳවියන් පිරිසක් සිටින බන්ධනාගාරයේ එක් අයෙකුට පමණක් ආහාර එක් වේලාවක ලබා දිය නොහැකි බැවින් එකවර සියලු‍ දෙනාට ආහාර ලබා දෙන බවයි.

එමෙන්ම ඒ සම්බන්ධයෙන් වැඩිදුර කරුණු දැක්වූ බලංගොඩ කස්සප හිමියන් වෙනුවෙන් පෙනී සිටි නීතිඥ සංජීව වීරවික්‍රම සඳහන් කළේ උන්වහන්සේ බන්ධනාගාරය තුළ සිදු කළ පොහොය දින සිල් සමාදන් වීම සහ භාවනා වැඩසටහන්වලට බන්ධනාගාර නිලධාරීන් බාධා කළ බවයි.

බන්ධනාගාරය තුළ බුද්ධරූපයක් තිබෙන ස්ථානයක් ඇති බවත් එම ස්ථානයේ ආගමික කටයුතු පවා සිදු කිරීමට නිලධාරීන් ඉඩ ලබා නොදෙන බවත් නීතිඥවරයා සඳහන් කළේය.

එහිදී විනිසුරුවරයා ප්‍රකාශ කළේ කිසිදු අයුරකින් ආගම ඇදහීමේ අයිතියට බාධාවක් සිදු කිරීමට නොහැකි බැවින් ඒ සම්බන්ධයෙන් බන්ධනාගාර අධිකාරිවරයාට දැනුම් දෙන ලෙසයි.

ඒ අනුව බලංගොඩ කස්සප හිමියන් ඇතුළු ස්වාමීන් වහන්සේලාට දානය වැළඳීමට කැප කාලය තුළ ආහාර ලබාදීමටත් බන්ධනාගාරය තුළදී උන්වහන්සේලා සිදුකරන ආගමික කටයුතුවලට බාධා නොකරන ලෙසත් මහේස්ත්‍රාත්වරයා බන්ධනාගාර නිලධාරීන්ට පෙරේදා නියෝග කළේය.