ප්රභාකරන්ගේ ගෙයත් හදලා වඳින්න පුදන්නත් ඉඩදෙන අලුත්ම නාටකය..
යාපනය දිස්ත්රික්කයේ වැල්වැටිතුරේ හි පිහිටි ඒ තනි තට්ටුවේ නිවස ඒ පළාතේ අනෙකුත් නිවාස මෙන්ම සාමාන්ය ප්රමාණයේ නිවසක් විය.වැදගත් රාජ්ය සේවකයකු මෙන්ම ප්රදේශයේ පිළිගැනීමට ලක් වූ තැනැත්තකු වූ තිරුවෙන්කාදම් වේලුපිල්ලේ සිය දහඩිය මහන්සියෙන් ඉදි කර ගත් මෙම නිවසේ සතුට උතුරා ගිය කාලයක්ද විය. ඒ වේලුපිල්ලේ මහතා සිය දයාබර බිරිය වූ වල්ලිපුරම් පාර්වති සමඟ දියණියන් දෙදෙනකුත් පුතුන් දෙදෙනකුත් උස් මහත් කරමින් සිටි කාලයයි. දරුවන් හතර දෙනා අතරින් වඩාත්ම දඟකාරයා වූ පවුලේ බඩපිස්සා හෙවත් බාලයා කළ දඟකාරකම්වල කෙළවරක් නොමැති විය. විටෙක මිදුල පුරා පාපැදි සවාරි ගිය ඔහු තවත් විටෙක කැටපෝලයක් ගෙන ලේනුන්ට, හූනන්ට, කටුස්සන්ට මෙන්ම කුරුල්ලන්ටද විද්දේය. ළමයකු ලෙස එදා ඔහු මේ කළ දේ කිසිවකු එතරම් ගනන් නොගත්තද ඔහු හැදී වැඩෙමින් සිටියේ දයානුකම්පා රහිතව අරමුණ වෙනුවෙන් ඝාතනයන් දියත් කරවන ත්රස්තවාදී
නායකයකුගේ ගමන් මඟට අවශ්යවන්නා වූ මානසික දැඩි භාවය ග්රහණය කර ගනිමිනි. ගෙමිදුලේ වූ තණකොළ පෑගෙන්නට අඩිය නොතබන තරම් සංසුන්කමින් දිවි ගෙවූ තිරුවෙන්කාදම් වේලුපිල්ලේ ගේ ඒ බාල පුතා වූයේ වේලුපිල්ලේ ප්රභාකරන් නමින් පසු කලෙක ලොවම හැඳිනගත් කොටි නායකයාය.එම කුප්රකට කිතුගොස පැතිරීමටත් පෙර සිටම ආරක්ෂක අංශවල උකුසු ඇස ප්රභාකරන් දෙස යොමු වීම හේතුවෙන් තිරුවෙන්කාදම් ගොඩනැඟූ ඒ සුන්දර නිවසේ සතුට, සැනසුම වරින් වර පලා ගියේ හිටි අඩියේ සිදුවන ආරක්ෂක හමුදා කඩා වැදීම් හේතුවෙනි. කාලයත් සමඟ ප්රභාකරන්ගේ බලසම්පන්න භාවය ඉහළ ගියද වැල්වැටිතුරේ නිවස මුහුණ පෑ අභාග්යයන් ඉහළ යමින් පැවතිණි. ශ්රී ලංකා ධරණි තලය බෙදා ඊළාම් රාජ්ය පිහිටුවීම එකම සිහිනය කර ගත් ප්රභාකරන් තිස් වසරක් තිස්සේ නොයෙක් ආකාරයේ ම්ලේච්ඡ ප්රහාර එල්ල කරමින් මරාගෙන මැරෙන බෝම්බකරුවන් යොදවා ගෙන රටේ සෑම තැනකම වාගේ මහත් විනාශයන් කරමින් සිවිල් වැසියන් පවා ඝාතනය කළේය. විදෙස් අත පෙවීම් දැඩිව තිබූ බැවින් කොතෙක් හිසරදයක් වූවත් වරින් වර පත් වූ රාජ්ය පාලකයන්ට ත්රස්තවාදය මර්දනය කිරීම අසීරු වූ හැටි අපට මතකය. තිස් වසරක යුද්ධයක් අවසන් කරමින් මවුබිමේ ඒකීයතාව ආරක්ෂා කරගැනීමට අවසානයේදී හැකි වූයේ 2009 මැයි 18දාය. එදා කොටි නායක ප්රභාකරන් වෙල්ලමුල්ලි වයික්කාල්හිදී අවසන් හුස්ම හෙළීය.
පසු කලෙක ප්රභාකරන් වාසය කළේ ඔහු බාල විය ගෙවූ වැල්වැටිතුරේ නිවසේ නොවේ. ඔහු බංකරයක සැඟ වී දැඩි ආරක්ෂාව මැද එල්.ටී.ටී.ඊ. කොටි සංවිධානයේ යුද්ධය මෙහෙය වීය. යුදමය පසුබිම තුළ කිනම් හෝ කාලයක කෙසේ හෝ ඔහුගේ සහෝදර සහෝදරියන් තිදෙනා විදෙස් රටවලට ගොස් තිබිණි.යුද්ධයෙන් පසුව ප්රභාකරන්ගේ පියා සහ මව මැණික් ෆාම් අවතැන් කඳවුරේ සිට ආරක්ෂක හමුදා භාරයට ගත් අතර ඔවුන් දෙදෙනා ස්වාභාවික තත්ත්වයන් යටතේ මිය ගිය බව වාර්තා විය.
අවි ගත් කොටින්ගේ දැඩි ආරක්ෂාව සහිතව ජීවත් වූ ප්රභාකරන්ගේ බිරිය සහ දරුවන් තිදෙනා යුද්ධයේ අවසන් කාලය තුළ මරුමුවට පත් වූ බව කියැවෙයි.
ශ්රී ලංකා රජය කොටි ත්රස්තවාදය පරාජයට පත් කරමින් අත්පත් කර ගත් යුද ජයග්රහණයෙන් පසුව දශක තුනක් තිස්සේ උතුරට අඩිය තැබීමේ වරම් අහිමිව සිටි අනෙක් ප්රදේශවල ශ්රී ලාංකිකයෝ උතුරේ සංචාරයන්ට රොද බැඳ ගත්හ. ඔවුන්ගේ නැරඹුම් ස්ථාන අතරට ප්රභාකරන් සැඟ වී සිට යුද්ධය මෙහෙය වූ භූගත බංකරය මෙන්ම ප්රභාකරන් බාල කාලය ගෙවූ වැල්වැටිතුරේ නිවසද අයත් විය.
කෙසේ නමුත් ආරක්ෂක හමුදා 2010 අප්රේල් මාසයේදී පමණ මෙම ස්ථාන සම්පූර්ණයෙන්ම විනාශ කරලීමට කටයුතු කළේය. එහෙයින් අද ප්රභාකරන් ළමා කාලය ගෙවූ නිවස පිහිටි තැන කිසිවක් නැත. ඇත්තේ හිස් බිමක් පමණි.
වේලුපිල්ලේ ප්රභාකරන්ගේ නාමය මුහුණ දුන්නේද ලෝකයේ අන් කවර තැනක වුවත් පරාජිත ත්රස්තවාදියකු හෝ විප්ලවාදියකු මුහුණ දෙන්නා වූ අමතක කරනු ලැබීමකටය. වෙල්ලමුල්ලි වයික්කාල්හි වෙඩි වැදී මරුමුවට පත්ව වැටී සිටි ප්රභාකරන්ගේ දේහය මූලික හඳුනා ගැනීම්වලින් පසුව තහවුරු කර ගැනිණි. එම දේහය භාර ගැනීමට කිසිවකු ඉදිරිපත් නොවූවා සේම එය කිසිවකුට භාරදීමක්ද සිදුනොවිණි. එම දේහය පිළිබඳ ඉනික්බිති සිදු වූ දෙයක්ද වාර්තා වී නැත. මිහිදන් කළ තැනක් හෝ අවම වශයෙන් අළු ටිකක් පවා නොමැත. ප්රභාකරන් ඉපදුණු වැල්වැටිතුරෙහි නිවස සහමුලින්ම අතුගා දමා ඇත. ඔහු ත්රස්තවාදය මෙහෙය වූ බංකරයද නොමැත. මේ සියල්ල එසේ පැවතීමට හැරියා නම් ඔහුගේ නෑයින්, ළබැඳියන් මෙන්ම අනුගාමිකයන් එම ස්ථාන ඔහුව අනුස්මරණය කරන දේවස්ථානයන් ලෙස යොදා ගනු ඇත. මතකයන් ආවර්ජනය කරන නොයෙකුත් ක්රියාකාරකම්වලට යොදවා ගනු ඇත. පරාජයට පත් කරනු ලැබූ ශ්රී ලංකා රාජ්යයට අයත් භූමිය බෙදීමේ සංකල්පය ව්යාප්ත කරන මධ්යස්ථානයන් බවට එවන් ස්ථාන පත් කරනු ඇත.
මෙසේ අතුගා දමන ලද්දා වූ ප්රභාකරන් පිළිබඳ මතකයන් නිතරම අලුත් කිරීමට උත්සාහ ගන්නා අය නැතුවාම නොවේ. වෙනත් රටවලට සංක්රමණය වී සිටින කොටි හිතවාදී ඩයස්පෝරාව තවමත් ශ්රී ලංකා රාජ්යයට අයත් භූමිය බෙදීමේ පරාජයට පත් වූ සංකල්පය අල්ලාගෙන එයට පණ දීමට වලිකයි.
මිය ගිය ප්රභාකරන්ට පණ දීමට දඟලන මෙරට සිටින චරිතයන් අතර කැපී පෙනෙන්නෙක් වන්නේ හිටපු පාර්ලිමේන්තු මන්ත්රි එම්. කේ. සිවාජිලිංගම්ය. ඔහු තමා ප්රභාකරන්ගේ මස්සිනා බව කියා ගනී. ප්රභාකරන්ට ඔහුගේ නෑකම කෙසේ ඇති වූවක්දැයි දන්නා කෙනකු නොමැති වුවද ඒ නෑකම මත ප්රභාකරන්ගේ උපන් දිනය දා වැල්වැටිතුරේ ප්රභාකරන්ගේ නිවස ඉදිරිපිට කේක් කැපීම ඔහු සිරිතක් කරගෙන සිටී.
මිය ගිය ප්රභාකරන් මතින් සිය දේශපාලන දිවිය ගොඩ දාගැනීමට හදන සිවාජිලිංගම් මේ වන විට වැල්වැටිතුරේ නගර සභාවේ සභාපතිවරයාය.
දැන් සිවාජිලිංගම් අරඅඳින්නේ ප්රභාකරන් උපත ලද ඔහු බාල කාලයේ හැදී වැඩුණු නිවස එදා තිබූ ආකාරයෙන්ම නැවත ගොඩ නැඟීමටයි. ඉබ්බා දියට වැටුණු කලෙක මෙන් ප්රභාකරන්ගේ උපන් බිම අයත් පළාත් පාලන ආයතනය වන වැල්වැටිතුරේ නගර සභාවේ බලය අල්ලාගෙන සභාපති පදවියට පත්ව සිටින සිවාජිලිංගම් දැන් ප්රභාකරන්ට පණ දීම අරඹා තිබේ. පෙනී යන ආකාරයට ඒ සඳහා ඔහු නිර්මාණාත්මක වැඩ කොටසක් ඉටු කරමින් සිටී.
යුද්ධයෙන් පසු ආරක්ෂක හමුදා විසින් ඉවත් කරණු ලැබූ ප්රභාකරන් උපත ලද එමෙන්ම බාල කාලයේ හැදී වැඩුණු වැල්වැටිතුරේ පිහිටි නිවස තිබූ අයුරින්ම ගොඩනැඟීමට වැල්වැටිතුරේ ප්රාදේශීය සභාවේ සූදානමක් පවතින බව දින කිහිපයකට පෙර අසන්නට ලැබිණි. ඒ සම්බන්ධයෙන් ප්රභාකරන්ගේ මස්සිනා බව කියන හිටපු පාර්ලිමේන්තු මන්ත්රි එම්. කේ. සිවාජිලිංගම් විසින් ඉදිරිපත් කරන ලද යෝජනාවක්ද ඒකමතිකව සම්මත වී තිබේ. එම සභාව නියෝජනය කරමින් පාලක පක්ෂය වන ජාතික ජන බලවේගයේ මන්ත්රිවරුන් තිදෙනකු සිටියද ඔවුන්ද, එම සභාවේ සිටින එල්.ටී.ටී.යට පෙර සිට විරුද්ධ ඊ.පී.ඩී.පී.පක්ෂයේ මන්ත්රිවරුන්ද මුනිවත රකිමින් එම යෝජනාවට එකඟ වීම අවාසනාවකි.
මේ සම්බන්ධයෙන් මව්බිම වැල්වැටිතුරේ නගර සභාවේ සභාපති සිවාජිලිංගම් මහතාගෙන් කළ විමසීමකදී ඔහු කියා සිටියේ ප්රභාකරන්ගේ වැඩිමහල් සොහොයුරිය වන ජෙගදීෂ්වරී මේ වන විට ඇමරිකාවේ වෙසෙන බවත් ඔවුන්ගේ වැල්වැටිතුරේ නිවසේ ඉඩමේ ( ප්රභාකරන් උපන් නිවස තිබූ තැන ) තට්ටු කිහිපයක ගොඩනැඟිල්ලක් සෑදීමට ඇය නගර සභාවට අයදුම් කර ඇති බවත්ය. ඊට අවශ්ය ඇටෝර්නි බලපත්රය ඇය නාගරික සංවර්ධන අධිකාරියේ හිටපු සභාපතිවරයකුද වන ආනන්ද රාජ් මහතාට ලබාදී ඇති බවත්ය. ඔවුන් ඉල්ලා ඇත්තේ තට්ටු දෙක තුනක් සහිත පුස්තකාලයක් ඉදි කිරීමට බවද සිවාජිලිංගම් මහතා කීය.
මෙය සභාවට ඉදිරිපත් කර ඇති බව ඔහු කීය. එම ස්ථානයේ වෙනත් ගොඩනැඟිල්ලක් සෑදීම වෙනුවට එතැන කලින් තිබූ ආකාරයටම නිවස තැනීම වඩාත් සුදුසු බවට සභාව එම අවස්ථාවේදී තීරණය කළ බවද කී ඒ මහතා එය ඓතිහාසික ස්ථානයක් හෙයින් වෙනත් ගොඩනැඟිල්ලක් ඉදිකිරීමෙන් එම ඓතිහාසික තත්ත්වයට හානි වීම ගැන සලකා බලන බව පැවසීය.
“දැන් පුස්තකාල ප්රයෝජනයට ගන්න කට්ටිය අඩුයි. ඒවා හදලා වැඩක් නෑ” යනුවෙන් කී සිවාජිලිංගම් මහතා “එතැන කලින් තිබූ විදිහටම ගොඩ නංවලා ප්රභාකරන්ගෙ අම්මගෙයි තාත්තගෙයි ඡායාරූපත් තියන්න ඕනෙ කියලයි අපි කියන්නේ” යනුවෙන්ද පැවසීය.
මෙහිදී අප නැඟූ ප්රශ්නය වූයේ ප්රදේශයේ නිවසක් සෑදීම පිළිබඳ අනුමැතිය ලබා ගන්නේ නගර සභාවේ ගොඩනැඟිලි අංශයෙන් බැවින් මෙම ගොඩනැඟිල්ල පිළිබඳ ප්රශ්නය සභාවට යොමු කෙරෙන්නේ ඇයිද යනුවෙනි. එවිට සිවාජිලිංගම් මහතා කියා සිටියේ ප්රභාකරන් දෙමළ ජනතාවගේ ජාතික නායකයකු වන නිසා එය වැදගත් දෙයක් හෙයින් සභාවට යොමු කළ බවයි.
මෙම ගොඩනැඟිල්ල සම්බන්ධයෙන් තීරණයක් බ්රහස්පතින්දා ගැනීමට නියමිතව ඇති අතර එය සිකුරාදා දැනුම් දෙන බව සිවාජිලිංගම් මහතා කීය.එහෙත් සිකුරාදා කතා කළ විට ඔහු පැවසුවේ සඳුදා මාධ්ය නිවේදනයක් නිකුත් කරන බවයි. ඒ සම්බන්ධයෙන් වාචිකව පිළිතුරු දීම ඔහු ප්රතික්ෂේප කළේය.
කෙසේ නමුත් මේ සම්බන්ධයෙන් ටැමිල් ගාඩියන් හි මුලින් පළ වූ ප්රවෘත්තියෙන් කිය වෙන්නේද දෙමළ ඊළාම් විමුක්ති කොටි (එල්.ටී.ටී.ඊ.) නායක වේලුපිල්ලේ ප්රභාකරන් ජීවත් වූ ඉඩමේ නව ගොඩනැඟිල්ලක් ඉදි කිරීම වෙනුවට, ඔහු පදිංචිව සිටි මුල් නිවස පිළිබිඹු කරන ව්යුහයක් ප්රතිසංස්කරණය කිරීම වඩාත් සුදුසු බව වැල්වැටිතුරෙයි නගර සභාව තීරණය කර ඇති බවයි.
පසුගිය රැස්වීමේදී ප්රභාකරන්ගේ නිවස කලින් තිබූ ස්ථානයේ නව ගොඩනැඟිල්ලක් ඉදි කිරීමට අනුමැතිය ඉල්ලා ඉඩමේ නීත්යනුකූල හිමිකරු වන ප්රභාකරන්ගේ සහෝදරිය වන එම්. ජෙගතීස්වරී විසින් ඉදිරිපත් කරන ලද ඉල්ලීමක් මන්ත්රිවරුන් විසින් සාකච්ඡා කළ බවද එහි සඳහන් වෙයි.
ටැමිල් ගාඩියන් හි තවදුරටත් සඳහන් වන පරිදි රැස්වීම අතරතුර කතා කළ සභා සාමාජික මයුරන් සඳහන් කළේ ඉඩම නීත්යනුකූලව ප්රභාකරන්ගේ සහෝදරියට අයත් වුවද, එය මහජනතාව විසින් “ප්රභාකරන්ගේ ඉඩම” ලෙස පුළුල් ලෙස පිළිගෙන ඇති බවත් මුල් නිවස කඩා දමා ඇතත්, හිස් ඉඩම තවමත් ප්රභාකරන්ගේ නිවස ලෙස හඳුන්වන බවත් ඔහු කියා ඇත. ඒ අනුව මුල් ව්යුහයට සමානකමක් නොදක්වන නව ඉදිකිරීම් මඟින් ස්ථානයේ ඓතිහාසික ස්වභාවය වෙනස් නොකර ආරක්ෂා කළ යුතු බව ඔහුගේ අදහස වී තිබේ.
කෙසේ නමුත් පෞද්ගලික ඉඩමක ඉදි කිරීම් වැළැක්වීමට වැල්වැටිතුරෙයි නගර සභාවට නීතිමය බලයක් නොමැති බව සභාවේ සාමාජිකයන් පිළිගෙන ඇත. සදාචාරාත්මක හේතූන් මත ඉඩම් හිමි ප්රභාකරන්ගේ සහෝදරියට සහ ඇගේ නීතිමය නියෝජිතයාට ඉල්ලීමක් ඉදිරිපත් කළ යුතු බවට එකඟවී තිබේ. නව ගොඩනැඟි ලි ඉදිකිරීමෙන් වැළකී ප්රභාකරන් ජීවත් වූ මුල් නිවස පිළිබිඹු වන ආකාරයෙන් ඉදි කිරීම් කටයුතු කරගෙන යෑමට ඔවුන්ව පොලඹ වන ලෙස සභාව තීරණය කර ඇත.
ලෝකයේ කවර රටක කවර සංස්කෘතියක වුවද ද්රෝහීන් යැයි හංවඩු ගැසෙන පුද්ගලයන් සම්බන්ධයෙන් අනුගමනය කරන ක්රියා පටිපාටියක් වෙයි. ඒ ඔවුන් වෙනුවෙන් කිසිදු මතකයක් ඉතිරි නොකිරීමයි. ඔවුන් සම්බන්ධයෙන් වූ මතකයන්, සිහිවටන සියල්ල අතුගා දැමීමට කටයුතු කෙරෙන්නේ මනෝ විද්යාත්මක කාරණයක් හේතුවෙනි. ඒ එවැන්නන් කෙරෙහි නොයෙක් ආකාරයෙන් බැඳුණු අය එම ද්රෝහීන්ගේ මතකයන් , මතවාදයන් , සංකල්ප හෝ ඉගැන්වීම් දිගින් දිගටම පවත්වා ගැනීමට එම ද්රෝහීන් හා සම්බන්ධිත දෑ යොදා ගන්නා බැවිනි. ජර්මනියේ ඒකාධිපති අඩොල්ෆ් හිට්ලර්, බ්රිතාන්ය රජ පවුලට ද්රෝහී වූ ඔලිවර් ක්රොම්වෙල්, ඉතාලියේ බෙනිටෝ මුසලොනි, ලිබියාවේ මුවමර් ගඩාෆි, ඔසාමා බින් ලාඩන් , සදාම් හුසේන් , පොල්පොට් ආදීන් ලෝකයේ මෙබඳු ඉරණම්වලට ලක් වූවන්ට නිදසුන් සේ දැක්විය හැකිය.
ශ්රී ලංකා රාජ්ය දෙකඩ කිරීමේ අරමුණින් බිහිසුණු සහ ම්ලේච්ඡ ත්රස්තවාදයක් වපුරමින් සිටි වේලුපිල්ලේ ප්රභාකරන්ගේ එම ද්රෝහී අරමුණු පරාජයකොට මේ වන විට වසර 16ක් ගත වී තිබේ.ලෝකයේ සෑම සංස්කෘතියකම පරාජයට පත් වූ ත්රස්තවාදී නායකයකුට හිමි වන ආකාරයෙන්ම පරාජයට පත් වූ අරමුණු මෙන්ම ඔහු හා සබැඳි මතකයන්ද ස්මාරක සේ ගොඩනැංවීමට මේ භූමිය තුළ ඉඩක් තබා නොමැත.ප්රභාකරන්ගේ දේහය මෙන්ම ඔහු වෙනුවෙන් ගොඩනැඟිලිද නොමැත. සියල්ල අතුගා දමා තිබියදී යමකු එවැනි ස්මාරකයක් ගොඩනැංවීමට යත්න දරන්නේ නම් එය රාජ්ය බලයට කරන්නා වූ ඍජු අභියෝගයකි.
- රු කාරියවසම්
(මව්බිම)
සම්බන්ධිත පුවත් | Related News
ප්රධාන පුවත්
කන්කසන්තුරේ තිස්ස රජමහා විහාරය දෙකට කරමින් මැදින් පාරක්.. අමරපුර නිකායේ දැඩි විරෝධය..
''මේ රටේ ගෝඨාභය මරාදමා හෝ විදේශ මැදිහත් වීමෙන් අන්තර්කාලීන පාලනයක් ගොඩනගන්න හැදුවා.. ආණ්ඩුව පවාදීම් රැසක් මේ වන විට කර අවසන්.." - වෛද්ය වසන්ත බණ්ඩාර
සම්බුද්ධ ශාසනයේ ප්රධාන අංගයක් වන පෙරහැර විකාරයක් බව අගමැතිනිය කියන්නේ කොහොමද?.. - වෛද්ය වසන්ත බණ්ඩාර
සවුදිය, තුර්කිය සහ පාකිස්ථානය 'නේටෝ' වැනි යුද සංවිධානයකට අවතීර්ණ වෙයි.. 'මක්කා ඒකාබද්ධ ආරක්ෂක ගිවිසුම' අත්සන් තබයි..
විනිසුරුවන්ගේ විශ්රාම යෑමේ වයස අවුරුදු 67 දක්වා දිගු කිරීමට ජනමත විචාරණයක් අවශ්යයි.. - ශ්රේෂ්ඨාධිකරණය 2022 වසරේදී තීන්දු කරලා..
22වන ව්යවස්ථා සංශෝධන පනත් කෙටුම්පත ගැසට් කෙරේ..
වර්තමාන අර්බුද හමුවේ නාට්යකරුවන් අපේක්ෂාභංගත්වයට පත්වෙලා.. – නාට්යවේදී අඛිල සපුමල්
ලොවටම සහන සැලසූ චීනයේ ගෝලීය සංවර්ධන මුලපිරුමට වසර 5යි: ගෝලීය දකුණේ අනාගතය වෙනුවෙන් චීනයෙන් නව පොරොන්දුවක්..
බන්ධනාගාර කොමසාරිස් තුෂාර උපුල්දෙණියව අයින් කරන්න ආණ්ඩුවට අවශ්ය වුනා.. ආණ්ඩුව දේශපාලනිකව පොලිසිය මෙහෙයවනවා ද යන්න ගැටළුවක්.. - නීතිඥ සංජීව වීරවික්රම
බෞද්ධ සභ්යත්වයට එරෙහිව දියත්වන ප්රහාර උච්ඡතම ස්ථානයකට පැමිණිලා.. ෂානක්කියන්ලා, සුමන්තිරන්ලාගෙන් බෞද්ධ උරුමය විනාශ කරන්න පුරාවිද්යා දෙපාර්තුමේන්තුවටත් බලපෑම්.. දළදා පෙරහැරේ කරඬුව වඩම්මන ඇතුන්ටත් තහංචි වැටෙන ලකුණු!
මැගසින් බන්ධනාගාරය තුළ නොසන්සුන්තාවක්..
උතුරු-නැගෙනහිර බෞද්ධ උරුමය විනාශ කිරීමට සැලසුම්සහගත ප්රහාරයක්.. පුරාවිද්යා වාර්තා වෙනස් කරන්න දෙමළ මන්ත්රීන්ගෙන් බලපෑම්.. - වෛද්ය වසන්ත බණ්ඩාරගෙන් සුවිශේෂී හෙළිදරව්වක්..
පළාත් සභා ඡන්දය ඉක්මනින් පවත්වන්නැයි ඉන්දියාවෙන් දන්වයි..
ඇමරිකානු - ඉරාන යුද්ධය අවසන් ද? - ආචාර්ය ජගත් චන්ද්රවංශගෙන් අනාවරණයක්
'පාස්කු ප්රහාරය ගැන විමර්ශකයින් පත්කරලා තියෙන්නේ කතෝලික පල්ලියෙන්' - අතරමැදි පෙත්සම්කරුවෝ අධිකරණයට කියති..
ගම්මන්පිල, විමල්, දිලිත් ඇතුළු හය දෙනෙක් අධිකරණයට අපහාස කිරීමේ ප්රකාශ ගැන අභියාචනාධිකරණයට දැනුම් දීමට තීරණ කළා.. - කොටුව මහේස්ත්රාත්