විල්පත්තු කැලෑ පූසා ගැන වැදගත් සටහනක්..

Feb 4, 2026 at 08:42 AM

|

Lanka Leader

මේ දවස්වල සමාජ මාධ්‍ය පුරාම විල්පත්තුවේ ඉන්න "කැලෑ පූසා" (Jungle Cat) ගැන ලොකු කතාවක් යනවා නේද? සාමාන්‍යයෙන් හරිම ලැජ්ජාශීලී සහ මිනිස් ඇසට හසුනොවී රහසිගතව ජීවත් වෙන්න කැමති සතෙක් වුණත්, මේ දවස්වල විල්පත්තුවේ ඉන්න මේ කැලෑ පූසා නම් සෆාරි යන වාහන ලඟටම ඇවිත් හරිම අපූරු විදිහට "Pose" කරන්න පවා පුරුදු වෙලා ඉන්නවා. වනජීවී ලෝලීන් හැමෝම මේ දුර්ලභ දසුන කැමරා කාචයේ සටහන් කරගන්න දැන් විල්පත්තුවට පොරකන්නේ ඒ නිසයි.

විද්‍යාත්මකව Felis chaus ලෙස හඳුන්වන මේ සත්වයා පෙනුමෙන් අපේ ගෙවල්වල ඉන්න සාමාන්‍ය පූසන්ට වඩා තරමක් විශාලයි. දිගු පාද සහ මුළු ඇඟම එකම රන්වන් දුඹුරු පැහැයක් ගන්නා මොහුගේ සුවිශේෂීම ලක්ෂණය තමයි උල් වූ කන් දෙක කෙළවර තියෙන කළු පැහැති රෝම කූර. මේ සුවිශේෂී පෙනුම නිසාම මොවුන්ව "කුඩා ලින්ක්ස්" (Lynx) කෙනෙක් විදිහටත් බොහෝ දෙනා හඳුන්වනවා. 

ස්වභාවික පරිසරයේදී සාමාන්‍යයෙන් අවුරුදු 10ත් 12ත් අතර කාලයක් ජීවත් වන මේ පූසන්, වසරකට වරක් හෝ දෙවරක් පැටවුන් බෝ කිරීමට කටයුතු කරනවා. වරකදී පැටවුන් දෙදෙනෙකුත් පස්දෙනෙකුත් අතර ප්‍රමාණයක් බිහි කරන මව, මාස දෙකක් පමණ යනතුරු ඔවුන්ට කිරි ලබා දී පසුව ඉතා දක්ෂ ලෙස දඩයම් කිරීමට හුරු කරනවා. පැයට කිලෝමීටර් 32ක පමණ වේගයෙන් දිවීමට වගේම ඉතා දක්ෂ ලෙස පිහිනීමටත් මොවුන්ට සහජ හැකියාවක් තියෙනවා.

සතෙක් මෙහෙම වාහන ලඟට එන එක අපිට ලොකු අත්දැකීමක් වුණත්, ඒකෙන් සතාගේ ස්වභාවික දඩයම් රටාවට බාධා වෙන්න පුළුවන් බව අපි නිතරම මතක තබාගත යුතුයි. ඒ නිසා ඔබත් මේ දවස්වල විල්පත්තුවට ගියොත්, පාර මැදටම ඇවිත් ඔයාලව පිළිගන්න ඉන්න මේ "Viral" තරුවව දකින්න ලැබේවි. එවැනි වෙලාවකදී සතාට කෑම දෙන්න හෝ කරදර කරන්න යන්නේ නැතුව, හරිම ආදරයෙන් දුර ඉඳන් මේ අපූරු අමුත්තාව නරඹලා ඒ සුන්දර මතකය විතරක් අරන් එන්න වගබලා ගන්න.

(මුහුණු පොතෙන් උපුටාගන්නා ලදී)