බාල ගල්අඟුරු නිසා දිනකට රු. මිලියන 75ක පාඩුවක්.. නොරොච්චෝලෙ සහ ඉන්දියා සමාගම දුන් වාර්තා මැති සබයට දෙන්න - සංජීව ධම්මික

Jan 27, 2026 at 07:57 AM

|

Lanka Leader

ආණ්ඩුව විසින් ගෙන ආ බාල ගල් අඟුරු හේතුවෙන් දිනකට රුපියල් මිලියන 75ක පමණ පාඩුවක් සිදුවන බව විදුලිය පාවිච්චි කරන්නන්ගේ සංගමයේ ජාතික ලේකම් සංජීව ධම්මික මහතා පැවසීය. කොළඹදී ඊයේ (26දා) පැවති මාධ්‍ය හමුවකදී ඔහු මේ බව කීවේය.

"ආන්දෝලනාත්මක ගල් අඟුරු නැව් තුනක් ආවා. ඒ අනුව, ජනවාරි 2 සිට 9 දක්වා කාලය තුළ පළමු ගල් අඟුරු නෞකාවෙන් ලබාගත් ගල් අඟුරු පරීක්ෂා කිරීමේදී, නොරොච්චෝලෙ ජනන යන්ත්‍ර එකකින් මෙගාවොට් 15ක නිෂ්පාදන ධාරිතාවක් අහිමි වී ඇති බව තහවුරු වුණා. ජනන යන්ත්‍ර තුනම එකතුවෙන් මෙගාවොට් 45ක බලශක්තිය ඒ අනුව අහිමි වෙනවා.

දෙවන ගල් අඟුරු නෞකාව සම්බන්ධයෙන් මෙතෙක් කිසිදු පැහැදිලි තොරතුරක් නෑ. ඒ පිළිබඳව වගකිවයුතු පාර්ශ්ව කිසිවකු නිශ්චිතවම කතා කරන්නෙත් නෑ.

තෙවන නෞකාවෙ ගල් අඟුරු ගිය මස 20 වැනි දින රාත්‍රියේ සිට 22 වැනි දින උදෑසන දක්වා දින එකහමාරක් තුළ නොරොච්චෝලෙ බලාගාරය පාවිච්චි කළා. එමගින් ජනනය විය යුතු මෙගාවොට් ප්‍රමාණයට වඩා මෙගාවොට් 100කට ආසන්න අඩුවක් පෙන්නුම් කළා.

එම අඩුව පිරවීමට ඩීසල් භාවිතයෙන් විදුලිය ජනනය කිරීමට සිදුවීම හේතුවෙන් ඒ දවසේ රුපියල් මිලියන 75ක අමතර වියදමක් දරා තිබෙනවා. මෙය සෘජුවම විදුලි පාරිභෝගිකයා මත පටවන පාඩුවක්. මේ බාල ගල් අඟුරු වෙනුවෙන් වන්දි ලැබෙන බව ආණ්ඩුව කිව්වට, පාරිසරික හානියට වන්දි ගෙවන්නේ කවුරුන්ද. මේ වන පරිසර හානියට නොරොච්චෝලේ අවට ජනතාවට වහාම වන්දි ගෙවිය යුතුයි.

බොයිලේරුව හරහා පරිසරයට මුදාහැරෙන අළු ප්‍රමාණය හේතුවෙන්, ඉදිරියේදී වැසි සහිත කාලගුණ තත්ත්වයන් සමඟ ජනතාවට සෞඛ්‍ය ගැටලු මතුවිය හැකියි. ගහ කොළට ද දැඩි හානි සිදුවිය හැකියි.

නියමිත ලෙස ගල් අඟුරුවල අළු අන්තර්ගතය සියයට 11ක් විය යුතුයි. එය සියයට 16 ඉක්මවන්නේ නම් එම ගල් අඟුරු ප්‍රතික්ෂේප කළ යුතුයි. මේ ගෙනාපු ගල් අඟුරුවල අළු අන්තර්ගතය සීයයට විසිඑකකට ආසන්නයි. එහෙනම් මේවා ප්‍රතික්ෂේප නොකළේ ඇයි.

මෙම සිද්ධියෙන් පැහැදිලි වන්නේ ආණ්ඩුව ජනතාව හා විදුලි පාරිභෝගිකයා ආරක්ෂා කිරීම නොව, අදාළ සමාගම ආරක්ෂා කිරීම සඳහා ක්‍රියා කරමින් සිටින බවයි.

මේ ගල් අඟුරුවල ප්‍රමිතිය සොයා බැලූ නොරොච්චෝලෙ බලාගාරයේ වාර්තාවත්, ඉන්දියාවෙන් ලබාගත් පරීක්ෂණ වාර්තාවත් පාර්ලිමේන්තුවට ඉදිරිපත් කර ජනතාවට ප්‍රසිද්ධ කළ යුතුයි.

මෙම සිද්ධිය සම්බන්ධයෙන් ශ්‍රී ලංකා මහජන උපයෝගීතා කොමිසම වහාම පරීක්ෂණයක් ආරම්භ කළ යුතුයි."

- දිවයින