බලංගොඩ කස්සප හිමි උපවාසය අත්හැරීමට හේතුව මෙන්න..

Jan 16, 2026 at 03:57 PM

|

Lanka Leader

ත්‍රිකුණාමලය ශ්‍රී සම්බුද්ධ ජයන්ති බෝධිරාජ විහාරයේ බුද්ධ ප්‍රතිමාවක් තැන්පත් කිරීමේ සිදුවීමට අදාළව පෙරේදා අධිකරණය හමුවේ පෙනී සිටීමෙන් පසු බන්ධනාගාරගත කරනු ලැබ සිටින බළන්ගොඩ කස්සප හිමියන් ආරම්භ කළ උපවාසය ඊයේ සවස් භාගයේ අත්හැරීමට කටයුතු කළහ.

ඒ අසිරිමලේ සේනාසන සංකීර්ණයේ අධිපති පනාමුරේ තිලකවංශ හිමියන් වැඩමකර සිදුකළ සාකච්ඡාවකින් අනතුරුවය.

නැගෙනහිර ප්‍රදේශයේ බුදු දහමට සහ භික්ෂුන් වහන්සේට සිදුවන වෙනස්කම් පිළිබඳව අවධානය යොමු කරමින් මෙම උපවාසය අරඹා තිබිණි.

මෙසේ ත්‍රිකුණාමලය බන්ධනාගාරය තුළ උපවාසයක නිරත වන්නේ, බළන්ගොඩ කස්සප හිමියන් බැහැ දැකීමට ගිය අය උන්වහන්සේ වෙනුවෙන් ගෙනගිය දාන මානාදිය ද ප්‍රතික්ෂේප කර ඇත.

උපවාසයේ යෙදී සිටින බළන්ගොඩ කස්සප හිමියන් ඥාතියෙකු වෙත උපවාසය තුළින් ක්‍රියාත්මක කරවා ගැනීමට අදහස් කරන කාරණා කිහිපය හෙළිදරව් කොට ඇති අතර එම ඥාතියා ‘ ප්‍රකාශ කළ එම කාරණා පහත පරිදි වෙයි.

• ත්‍රිකුණාමලය මුහුදු කලාපයේ වෙරළ සංරක්ෂණ කලාපය තුළ ඉදිකර ඇති අනවසර අන්‍යාගමික පල්ලි, කෝවිල්වලටත් නීතිය ක්‍රියාත්මක කිරීම, සාම්බල්තිව් කලපුවේ අනවසර, බලහත්කාරී, අනීතික අත්පත් කර ගැනීම් හා ඉදිකිරීම් වෙනුවෙන් වහා නීතිය ක්‍රියාත්මක කිරීම, කන්දල්කාඩු වන රක්ෂිතය, ගෝමරන්කඩවල, මොරවැව යන මහා වන රක්ෂිත හෙළිපෙහෙළි කර අන්‍යාගමිකයන් විසින් ඉඩම් අල්ලාගෙන කරන නීති විරෝධී ජනපද කරණයට එරෙහිව නැගෙනහිර සිංහලයන්ට වෙමින් තිබෙන ඓතිහාසික අසාධරණයට,නීතිමය භාෂාමය, පරිපාලනමය, සංස්කෘතිකමය, ජනවාර්ගිකමය කොන් කිරීම්වලට එරෙහිව කටයුතු කිරීම.

• 1983දී නැගෙනහිරින් පලවා හැරී සිංහලයන් 97,000ක් දෙනා නැවත නැඟෙනහිර බිමේ පදිංචි කරවීමට ආණ්ඩුවට බල කිරීම. සම්පූර්ණයෙන් බහුතර සිංහලයන් වෙසෙන පදවි ශ්‍රීපුර ප්‍රාදේශීය ලේකම් කොට්ඨාසයට දමිළ ජාතික ප්‍රාදේශීය ලේකම්වරයෙක් පත් කිරීමට එරෙහිව කටයුතු කිරීම.

මේ අතර, භික්ෂුන් වහන්සේගේ උපවාසයට සහාය පළ කරමින් ඉහත සිදුවීම සම්බන්ධයෙන් බන්ධනාගාරයේ සිටින සිංහල සංවිධාන එකමුතුවේ කැඳවුම්කරු දුලාර ගුණතිලක මහතා ඇතුළු ගිහි පස්දෙනා සත්‍යග්‍රහයක නිරත වන බව එම සංවිධානයේ විධායක සභික ඓයිශ්චර්ය ගුණරත්න අධිකාරි පැවසීය.

උපවාසය අත්හැරීම සම්බන්ධයෙන් බලංගොඩ කස්සප හිමියන් උන්වහන්සේගේ අත් අකුරින් ලියා ඇති ලිපිය පහළින්..